Read Lashi ESAIA 54 Bible Online

ESAIA 54 - Lashi bible

ESAIA 54

¹Yerusalem we"- nang gi bougdung: myhi' dayug ti" bue" lid: loo bye:. Nghoid loug we' akhid" nang gi gau wigi jikhoin" khoin" ziyo' yo" nyhoo: bye:. Akhid" nang gi yhoem: seing: phoo wigi khanham we' atoo" kho' da" myiyi: dayug tho' Zooshang: je myo: abye:.

²Re" zoem" ri je gyi: sho' koid we'. Hau: da" tei" joem ri je sheing: sho' koid lho: doung" zeing joem ri teing sho' koid we'.

³Nang gi re" da" moug kyoo" joem ri shoid khang" moo" khyoo: ce" yhe: loo" wa. Akhid" gootu: byumyu" yi wigi seing: ci: da" mungdain: ri re" byu yi doem yo" yu boem goo" wa. Akhid" jham" coug: youg bue" jo, da" voomoo" joem gi voobyu joem yo' byeung" jo, loo goo" wa.

⁴Agyug- nang ngi: yoem" zi doem shoug" wa zi anghoid. Nang nyhoem: khyo' pyam zi shoug" wa zi anghoid. Apyaid nge da" yhoem: seing: myhi' yo' dakhyoo" ti" re" da" jhug azug ziri yo' Cougmoo" myhi' yhang: ti" re" da" nheig kyoo" nheig nge bue" ziyo' nheigloem: gyau: ziri nang to" myhid pyam wa.

⁵Nang ri phain" so: too" su: gi re" yhoem: seing: phoo yhang: ti" nghoid loo wa. Nya: myeing gi myhang: thang ASEING ga: zi nghoid. Israela da" gyeung" shang: Mangsoo gi nang ri khyoid yu wa. Nyang: gi mougmyid goin" da" vhoeb" khang" su: nghoid da:.

⁶Israela we"- nang gi nya: yhoem: seing: pho wigi she: pyam too" khare" wigi xoo: sho' nheigloem: thang byug da" apyaid ngi shi" da" yhoem: seing: myhi' yhang: ti" nghoid nyid da:. Nghoid loug we' ASEING gi nang ri nya: jhang doem khe: tau" yu wigi tid.

⁷«Nang ri ngoo daso' za: datoo" kho' Gye" jheddab myid yo' nang ri ngoo doem khe: tau" yu wa.

⁸Ngoo gi nheig yo: wigi daso' kyeing" nang mo phang: lo" zi nghoid. Nghoid loug we' apyaid atoo: moo nga" jheddab myid ngoo nang ri ci: shug byid: wa» ga: nang ri khyoid yu su: ASEING tid bye:.

⁹«Noa da" pyaid moo mougmyid ri khanham we' dagyid adoem shi: nhang: loo wa ngoo dang: so" byid: too" bye:. Akhid" nang ri ngoo nheig adoem yoo: loo wa ein: ngoo dang: so" byid: bye:. Ngoo gi nang ri juang" we' ajuang"-yooboo dam we' abyid: loo wa.

¹⁰Boem joem yo' bouggung joem gyoeb ri gyoeb loo" goo" wa. Nghoid loug we' nang ri jheddab da" nga" jheddab myid gi khanham we' athang wa. Nga" da" ngei pyo: yug yo da" dang: so" ri apyaid atoo: moo cang nyid wa» ASEING tid. Nang ri jheddab da" ASEING gi hougsu" tid da:.

¹¹ASEING tid zigi «O" yau: khe" kyi" khyeug kham zo: ziyo' asho" ajhen: bue" nyid wigi nang ri nheig teing byid: wa hang" anyid da" Yerusalem nang we". Ngoo gi re" apoem: ayang: ri phoug" dab da" lug joem wigi zhug wa.

¹²Ngoo gi re" pyuzung joem ri patemya" wigi koid wa. Re" vang khyam: khoem" joem ri myi: yhang: ti" bang da" lug joem wigi ngoo koid wa. Houg: lho: nang ri lheing khoem to" da" vang khyam: joem rigi phoug" dab da" lug zi joem wigi koid wa.

¹³Re" voobyu yiri ngoo nyang: jhau" shid wa. Nyangnu" ri yoo" zoo: yoo" shug khyoo: yo' ngei pyo: yug yo khyoo: ri byid: wa.

¹⁴Tarha" deingmain" ziyo' jo zigi nang ri yoem: boo nhang: loo wa. Nang gi zeig zo: ziyo' gyoug ci' jang" mo goem loem zi shoug" yu wa.

¹⁵Nang ri dayug yug khaid zain: ri nyang: gi nga" myid veing" khyoo: aboo loo: za: hau: ziri akoid wa. Nang ri gyi khaid da" su: hang" nghoid loug we' gyoeb gyo" loo" wa.

¹⁶«Myikhyoem koid lho: sham: lham: baid su: ri ngoo phain" so: too" bye:. Ngoo gi byu said wa hau: gyi jonu" ri ci: da" gyizoo: ri we' ngoo phain" so: too" bye:.

¹⁷Nghoid loug we' nang ri ce: gyi jonu" wigi we' dam ayo" tab wa. Nang ri yooboo zhug da" bang: dangain" ri phug tid wa dang: nang yo" loo wa. Ngoo gi nga" dei zoo: yiri goem loem byid: wigi Nyangnu" ri oung: doid nhang: wa» ga: tid ASEING tid bye:.