Read Lashi ESAIA 55 Bible Online

ESAIA 55 - Lashi bible

ESAIA 55

¹ASEING tid zigi «Gyid shid bang: yugkhang" moo" we' ri" ge' gyid hid: moo: jo,. Ngei ayoo" bang: we"- ri" ge'. Shivoo: qei wigi zoo: ge'. Ri" ge'. zabyid yhid: yo' nunoug" re" qei shug ge'. Hau: zigi nanu" shid re" ce: aphoug" aca" nghoid da:.

²Nheig atho shid: da" ja: shid re" ciwim yoomo ngei ri yhung: pyam boem la". Ciwim nanu" da" vhu" kung: phoug" ngei ri yhung: pyam wigi zooyoid nyid boem shi" go" la". Ngoo tid ziri tam" gyo: wigi ngoo tid khyo" koid ge'. Nanu" gi ge thang da" zoo: noem dangain" yo' yo" pyo: boem goo" wa.

³«Nga" byumyu" we"- akhid" tam" gyoo: ge' nga" jhang loo ge'. Nga" jhang loo we'. Nanu" kangso' yo" yu wa. Ngoo gi nanu" yo' dang: theing myang" sho' koid wa. David ri ngoo dangsoo" byid: to" da" mainkaid jeju joem ngoo nanu" ri byid: wa.

⁴Ngoo gi nyang: ri vhujhung: yo' byumyu" yi da" gyizoug: bui" nhang: bye:. Nyang: khyo" wigi nga" yoem: so' ri nyangnu" ri ngoo toin" shid bye:.

⁵Akhid" tungbau byumyu" yiri nanu" khe: zheing" yu loo wa. Goonham' nyangnu" gi nanu" ri asi' nghoid ago". Nghoid loug we' akhid" nanu" yo' xo' tei" wa tang" re" nyid boem bye:. Ngoo- nanu" ASEING Mangsoo- Israela da" gyeung" shang: Mangsoo gi he: gu dangain" bui" nhang: wa. Ngoo gi ngi: shab ziyo' phung" yoeb nyangnu" ri byid: wa» ga: tid.

⁶ASEING jhang lheing: lo lho: nyang: ri akyu" mho' ge'. Akhid" nyang: gi jang" moo nyid.

⁷Akhyeing" da" byu yigi nyangnu" akhyeing" da" kangso' dei khyoo: ri to" pyam wigi Nyangnu" myid da" khyoo: ri thid pyam boem goo" baja". Ngoonu" ASEING Mangso jhang khyoo: nyangnu" ri lheing: loo nhang: ge'. Nyang: gi nheig khyeug ziyo' yooboo khyoid byid: wa myab nyid su: nghoid.

⁸ASEING gi «Ngoo myid khyoo: gi nanu" myid ziyo' adu. Nga" khyoo: gi nanu" khyoo: yo' adu goo" nghoid da:.

⁹Mougkhung: gi myidgung tho' myhang: nyid yhang: ti" Nga" khyoo: gi nanu" khyoo: tho'- nga" myid yu" khyoo: gi nanu" myid yu" khyoo: tho' gye" myang: nyid.

¹⁰«Nga" mungdang: gi nghain: yo' moug: gyid yhang: ti" nghoid. Hau: zigi mougkhung: mo gyo" re" wigi mougmyid ri jhu' nhang: da:. Hau: zigi shivoo joem ri yug nhang: wigi sain" wa myoug: shi" yo' zoo: noem ri byid: da:.

¹¹Ngoo tid da" mungdang: we' houg yo' dayhang: ti" bui" wa. Hau: zigi ngoo soin' to" da" khyoo: ri koid wa shid re" ahe: pyam wa. Hau: zigi ngoo zei: nhang: to" da" ja: khang" moo" ri koid loo wa.

¹²«Nanu" gi gau yi ziyo' Babelon mo thu loo goo" wa. Nanu" gi voomoo" khoug: mo ngei pyoo: yug yoo tung" shu" thu loo zi shoug" wa. Boem joem yo' bouggung joem gi jikhoin" khoin" loo goo" wa. Houg: lho: seiggam joem gi gau wigi nyho: loo goo" wa.

¹³Akhid" zu: kyin: gam yug jo, jang" moo gyoin: gam yug thu loo wa. Zu: gam joem da" akhoo: moo maithen" gam joem yug thu loo wa. He: zigi apyaid atoo: jo, jo, wa asoo" nghoid wigi Ngoo ASEING koid lo da" khyoo: ri tid poin" byid: khyoo: nghoid loo wa» ga: tid da:.