Read Lashi ESAIA 57 Bible Online

ESAIA 57 - Lashi bible

ESAIA 57

¹Byu gi yi shid: wigi hang" we' hau: ziri ase' gyoo:- ci: lang" we' ajhoo: nghoid ago". Nghoid loug we' nyangnu" shid: lo" boem uri kyi" kyeug yau: khi" ce: ja: wigi we' nyangnu" ri dam ayo" tab nghoid da:.

²Ge khyo" kangso' dei bang: gi shid: jang" moo ngei pyoo: yug yoo za: dougno: zi shau" da:.

³Yooboo yoo" bang: nanu" we"- dang: phyed wa shid re" hid: khyoo: loo ge'. Nanu" gi join: zei: bang:- myi: shoid- lang shoid bang:- shava myhi' koid bang: tho' ci: aje gi nghoid ago".

⁴Nanu" hang" ri yi nau tu' nyid boem la". Nanu" mhoug foeb yi hang" ri juang" nyid boem la".

⁵Nanu" gi hau: nanu" nya: da" gyeung" shang: seiggam yang: moo gung shoo" zoem" da" moo" koid wigi myo: lug je: be: byid: da" yu phara" joem ri no' ago". Gyid gyung: zoo: nam moo jo, da" lug khyung: joem moo xoin" khyo" nanu" nya: zooshang: yiri ngei" byid: boem.

⁶Nanu" gi hau: joyoo mo jhoid jhoid wim da" lugzeing joem ri koid: yu wigi yu phara" khyo" hau: joem ri no' ago". Hau: joem ri ngei" byid: da" xoin" khyo" nanu" gi zabyid yhid: ri foid shoin" byid: wigi shivoo: xoin" hau: joem ri ci: ri" byid: boem. He: gu: dangain" ri ngoo vho: ngei ein: nanu" jhoo: go" rhe".

⁷Xoin" ngei" byid: wa shid re" yo' gung shoo" zoem" wa shid re" myhang: da" boem joem khyoo: nanu" do, lo" ago".

⁸Yhoem: shidkhoin" mo khoem" bung akhoug: shoid moo nyang: nanu" da" aco' ajhoid nghoid da" yu phara" soolhoo: joem ri nanu" zhung: to" ago". Nanu" ngoo ri she: pyam' pyam' abye:. Nanu" da" byimi joem ri khyoid pyam' lho: nanu" yo' dage" yhoeb wa shid re" aphoug" byid: to" da" nanu" da" jheddab bang: yo' dage" nanu" da" yhoeb koug moo" joem atho' khyoo: do, lo" ago". Houg moo nanu" da" mhain: nyid khyoo: ri nheugdeug sho' koid boem bye:.

⁹Nanu" gi shoem: nam pyo: su: ri yo' xu: joem ri gyoid ci: wigi Meleg yu phara" ri no' wa yhe: boem da:. No' wa da" yu phara" joem ri shoo: wa shid re" nanu" gi lagyoo: joem ri vi: khyoo: nhang: kaid boem. Moovo moug: khyoo: lang" nhang: kaid ago".

¹⁰Gootu: yu phara" joem ri sho: jang" moo nanu" nya: gung myung: byug abye: go". Nghoid loug we' nanu" khanham we' asoem" abyid: nghoid ago". Nanu" da" aco' ajhoid da" phara" soolhoo: joem gi nanu" ri yoem: byid: wigi nanu" khanham we' yoem: aneing: ga: nanu" jho: boem.

¹¹ASEING tid zigi «Nanu" ngoo ri mhau' tid wa yo' ngoo ri bain sho' to" myhid pyam' wa shid re" nanu" ri gyoug nhang: da" yu phara" gi khate" zi nghoid boem la". Ngoo gye myang" sho' sam: zoo: nyid nyid yoomo ngoo ri ngi: shab byid: wa ziri nanu" theing: pyam' ago" la".

¹²Nanu" koid da" lo, moo" jo ga: nanu" jho: ago". Nghoid loug we' nanu" lo, moo" ri ngoo toin" shed byid: wa. Houg lho: nanu" yu phara" soolhoo: joem gi nanu" ri ci: ayo" pang" thoug byid: nghoid da:.

¹³Pang" thug wa shid re" nanu" mho' yoid uri hau: nanu" nya: da" yu phara" soolhoo: joem ri nanu" ri khyoid yu nhang: ge'. Lid dalheing: hau' wigi nyangnu" ri moid tang" lo" byug wa. Nghoid loug we' ngoo ri loem khoug: bang: gi hau: mungdain: moo dei nyid wigi nga" Noku Yhoem: Moo" moo ngoo ri noku loo goo" wa» ga: tid da:.

¹⁴ASEING tid zigi «Nga" byumyu" yi nga" jhang doem lheing: loo ge'. Nyangnu" da" khyoo: moo kung" keig da" ja: khang" moo" ri yu pyam' ge'. Khyoo: phang wigi jen" jen" koid ge'.

¹⁵«Ngoo gi myhang: wigi apyaid atoo: moo dei nyid da" gyeung" shang: Mangsoo nghoid. Ngoo gi myhang: da" joyoo yo' gyeung" shang: da" joyoo moo nyid su: nghoid. Nghoid loug we nyangnu" myid loem ziyo' myid byu ziri ngoo yo" doem nyeing kaid byid: wa shid re" nheigloem: nyhoem: khyo' wigi myid thid da" byu yi yo' we' dage" nyid da:.

¹⁶Nga" byumyu" yiri ngoo kangso' byid: wigi nyangnu" ri xo' lho: yooboo azhug wa. Apyaid atoo: moo we' nyangnu" ri ngoo anheig yoo: wa.

¹⁷Nyangnu" da" yooboo moo so' kho' gang mo nyangnu" ri ngoo nheig yoo: bye:. Houg: yoomo ngoo nyangnu" ri yooboo dam byid: wigi nyangnu" ri she: pyam' too" bye:. Nghoid loug we' nyangnu" nheigloem: thain: wigi nyangnu" nya: khyoo: khyoo: xo' yhe: lo" ago".

¹⁸«Nyangnu" khasu" koid lo ziri ngoo myang bye:. Nghoid loug we' nyangnu" ri ngoo byang" gi byid: wa. Nyangnu" ri ngoo shu" wigi pang" thoug byid: wa. Koug ngau nyid bang: ri ngoo nheig teing byid: wa.

¹⁹Ngoo gi jang" moo vi: moo nyid bang: dangain" ri ngei pyo: yug yoo: khyoo: byid:. Nga" byu yiri ngoo byang" gi byid: wa.

²⁰Nghoid loug we' akhyeing" da" bang: gi being: mhoid' to' zi khanham we' atheing: lho: mhoid soid yo' gougnyhoug nghi: ye: da" aco' ajhoid ziri myu" ci: yen" wigi nyid" myen" yug yoo khyoo: ajo, da" panglai: yo' du boem.

²¹Yooboo yoo" bang: shid re" goem loem khyoo: ajo,» ga: ASEING tid.