Read Lashi ESAIA 58 Bible Online

ESAIA 58 - Lashi bible

ESAIA 58

¹ASEING tid zigi «Nang yo" nyho: yhi' thui: zeing yo' nyhoo: we'. Nga" byumyu" Israela ri nyangnu" yooboo khyoo: ri tid kyoo" we'.

²Nyangnu" gi ngoo ri nyid" khang" moo" noku wigi nyangnu" nga" khyoo: ri si' nau ziyo' nga" tarha" joem ri cang nyid ga: tid nyid boem. Nyangnu" gi nyangnu" ri deungmain" tarha" joem ri za: ngoo ri byid: nhang: nau wigi nyangnu" ngoo ri noku jang" moo pyo: khyoo: sho: zi nghoid» ga: tid nyid ago".

³Byumyu" yigi «ASEING ngoonu" ri khanham we' asoin: byid: zi ngoonu" ciwim yoomo zooshug jang" wa la". Nyang: ngoonu" ri nyeing" ayu" nyid ri ngoonu" ciwim zooshug azoo: loo nyid wa la"» ga: myid: ago". ASEING gi nyangnu" ri «Deungmain" da" khyoo: gi nanu" zoo: shug jang" uri nyang:- nanu" nyang: myid vho: khyoo: ri cang koid ago". Nanu" da" moo" zei: vhoo" kung: yiri zeig zo: boem da:.

⁴Nanu" da" zoo: shug jang" zigi nanu" ri lu: fu: nhang: da:. Nanu" myeing" myo: wigi byo, go" zi nghoid da:. Hid: yhang: te" da" zo: shug jang" zigi nanu" akyu" mho' dang: joem ri ngoo ri tam" gyoo: nhang: loo wa ein: nanu" jhoo: go" rhe".

⁵Nanu" zoo: shug jang" uri nanu" nya: gung ri kyi" khyeug byid: ago". Nanu" gi myo, gam yhang: ti" nanu" vhuloem ri goeb gyo" ago". Jid: moo" byimi pei: myhu" to" lho: myiyab boem moo leung jo, boem. Zooshug jang" ga: nanu" myheing zi houg: nghoid bye: la". Hau: ziri ngoo vho: ngei wa ein: nanu" jho: boem rhe".

⁶«Ngoo vho: da" zoo: shug jang" khyoo: gi hid: su" nghoid. Doin: zeig too" shau" bang: da" jangcoo" joem ri yo' tarha" adeingmain" da" kyoug: ri khyoid pyam' byid: wigi doin: zeig too" shau" bang: ri pyoin' kaid khyoo:.

⁷Zoo yoid bang: yo' nanu" da" zoo: noem gam zo:- yhoem: ayoo" myung shoo" bang: ri nanu" yhoem: khoem" phang byid:- byimi ci: avoid bang: ri byimi gam byid:- nanu" nya: bidnoem seing" cang" yiri pang" thoug byid: da" khyoo: ri ahe: pyam' zi nghoid da:.

⁸«Houg: lang" ngoo myonhoo: byid: zigi nab soin: bid ti" nanu" adang moo bang loo wa. Houg: lho: nanu" da" dam khoo: joem gi myab za: ge loo" wa. Nanu" ri khyoid yu wa ngoo khanham we' nanu" yo' dage" nyid wa. Ngoo nyid nyid zigi nanu" ri ja: khang" moo" goem loem byid: loo wa.

⁹Nanu" akyu" mho' uri ngoo tam" gyoo: byid: wa. Nanu" ngoo ri yoid uri ngoo tu" byid: wa. «Zeig zo: khyoo:- aphoug" akhyoid da" avoid ja: khang" moo" yo' akhyeing" da" dang: khoin" khang" moo" ri nanu" thang loo" nhang: boem nghoid rigi

¹⁰Zoo yoid bang: ri nanu" zoo: noem byid:- ca" nyid bang: ri nanu" nheugshid: nhang: boem nghoid rigi nanu" ri lheing khoem to" da" moug: coid gi bid gung tu: yo, moo zho: da" bid yhang: ti" bue" loo wa.

¹¹Ngoo gi nanu" ri khanham we' khyoo: shid byid: wigi ge da" ja: yo' nanu" ri nheugdeug nhang: wa. Ngoo gi nanu" ri yoem: boo nhang: lho: yang" zain: nhang: wa. Nanu" gi gyid khanham we' ayau thang lo" da" gyid bug yhang: ti"- gyid agoin agoo" yo" da" khyam: yhang: ti" du wa.

¹²Nanu" da" byumyu" yigi myang" sho' byo, yoin" jo, ziri doem zhug to" lho: apoem: ayang: xoug" moo doem zhug to" loo goo" wa. Nanu" gi vang joem ri zhug mo, gi byo, jo, da" yhoem: joem ri doem nyheing koid mo, khyo" myeing yo" loo goo" wa» ga: tid.

¹³ASEING tid zigi «Nanu" gi Dougno: Bidnyid ri gyeung" shang: da" bidnyid khyo" cang pyeing lho: hau: bidnyid ri nanu" nyang: myid vho: khyo" acang koid. Nanu" gi nga" gyeung" shang: da" bidnyid ri phau" tab wigi hau: bidnyid moo gyung: asoo"- moo" azei:- akyu" abo dang: atid lhoo: koid da" khyo" wigi hau: bidnyid ri ngi: shab byid: nghoid rigi

¹⁴Ngoo ri dei byid: da" khyo" wigi ju" re" da" ngei pyo: ziri nanu" shau" yu loo goo" wa. Ngoo gi damougmyid goin" mo bang: wigi nanu" ri ngi: shab byid: nhang: wa. Houg: lho: nanu" phoug" phyid" ri ngo wigi byid: to" da" mungdain: moo nanu" ri ngei pyoo: nhang: wa. Ngoo ASEING da" nhoid mo nyang: tid too" bye:» ga: tid.