Read Lashi ESAIA 6 Bible Online

ESAIA 6 - Lashi bible

ESAIA 6

¹Khokham Uzia shid: da" zain ri ngoo gi ASEING ri shau" myang. Nyang: gi nyang: wigi ngi: shab to" da" nya: zhungtang moo zhung: jo, da:. Nya: byisheing: gi Noku Yhoem: Moo" goin" moo byeung" jo, da:.

²Nyang: ri du: khang" moo" dung khyug loem: loem: dab lho myi: dab da" gougnyhoug joem wigi lheing khoem yab jo, da:. Gougnyhoug du: khang" moo" gi nya: myonhoo: moo dung eig loem: wigi nghoeb ci: lho: eig dung gi gung moo nghoeb ci: da:. Dang: wa shid re" gi gootu: dung eig loem: ri ci: da:.

³Nyangnu" nyang: cang" «Gyeung" shang:- gyeung" shang:- gyeung" shang:- myhang: thang ASEING gi gyeung" shang: nya: phung" yoeb gi mougmyid tho' moo byeung" jo,» ga: tid nyid boem ago".

⁴Nyangnu" thui: gi Noku Yhoem: Moo" da" apoem: ayang: ri loeb loeb lei" nhang: da:. Houg: lho Noku Yhoem: Moo" gi myikhoug" yo' byeung" jo, da:.

⁵Ngoo gi «Nga" shid re" myid byu khyoo: ajo, ngoo gi joem bye:. Ciwim gari nga" nhoid mo thu da" dang: khoin" khang" moo" gi yooboo byeung" jo, da:. Houg: lho: ngoo gi yooboo dang: kyeing" tid da" byu phung: khoug: moo nyid nyid. Nghoid loug we' ngoonya: myojid" wigi nyang: myhang: thang ASEING khokham ri shau" myang bye:» ein: tid bye:.

⁶Hau: thang: gougnyhoug joem mo dadu: gi phoin: dang mo nyab ze" wigi nyham" yu da" myi: dab da" myi: gyu: dakhi' ri ci: wigi nga" jhang dang: gyo" re" da:.

⁷Nyang: gi myi: dab da" myigyu: wigi nga" nhoid yid moo tain" lho: «He: zi re" nhoid yid moo tain" bye: yoomo akhid" re" yooboo joem adab loo:- re" yooboo joem ri khyoid pyam byid: bye:» ga: tid.

⁸Hau: thang: «Hang" ri ngoo nhang: kaid wa la". Ngoonu" da" lagyoo: hang" nghoid wa la"» ga: ASEING tid ziri ngoo shau" gyo:. Ngoo gi «Ngoo yhi: wa ngoo ri nhang: kaid la» ein: phoug tid bye:.

⁹Houg: yoomo nyang: gi ngoo ri yhi: nhang: wigi mung" byu yiri he: mungdang: byid: kaid da:. Hau zigi «Nanu" khayhi' tam" gyoo: nghoid loug ase' gyoo: goo" wa. Nanu" khayhi' yu" nghoid loug cibue" nyid ziri nanu" amyang goo" wa» ga: zi nghoid.

¹⁰Hau: thang: nyang: gi ngoo ri «Nyangnu" ayo" myang- ashau" gyoo:- ase' gyoo: goo" wa shid re" he: byumyu" yi myid ri coid nhang:- nyangnu" nukhyab ri jed, nhang: lho: myo, ri jed, nhang: we'. Nyangnu" shau" gyo: shau" myang lho: se' gyo: nghoid rigi nyangnu" nga" jhang phug lo lho: byang" byid: zi shoug" wa zi nghoid.

¹¹Ngoo gi «ASEING we"- he: zigi kha myhang myang" wa la"» ein: myid: bye:. Nyang: gi «Voomoo" joem byo, lo" lho: akoem: bue" da" ayo, ju" sho' yhoem: joem moo: byu anyid da" ayo, ju" sho' mungdain: nyang: we' jham" coug: youg bui" yo, ju" sho' myang" wa.

¹²Ngoo gi byumyu" yiri vi: khyoo: nhang: pyam lho: mungdain: goin' ri jham" coug: youg bue" nhang: wa.

¹³Mungdain: moo byu daxi: yug mo dayug za: dadeing rilang" nyang: ri said pyam zi shoug" wa. Nyang: gi thug lheing: pyam bye: da" shookhi" gam angoid yo' du wa» ga: tid. (Seig ngoid gi Mangso da" byumyu" yi shid re" aseig doem thoid shid" re" ziri gungthid tid to" zi nghoid da:.)