Read Lashi ESAIA 60 Bible Online

ESAIA 60 - Lashi bible

ESAIA 60

¹Yerusalem we" too' we' bidbang yhang: ti" bang we'. ASEING da" phung" yoeb gi re" adang moo bang nyid da:.

²Gootu: byumyu" yigi moug: coid wigi nghoeb to" zi shau" ago". Nghoid loug we' re" adang moo gi ASEING da" bidbang bang loo wa. Nya: shid koin" mo bang zigi nang yo' dage" nghoid wa.

³Byumyu" yigi re" bidbang shoid khyoo: she: yu zi shau" wa. Houglho: khokham yigi re" bidnyid seig da" moug: boo" zoo" khyoo: re" loo goo" wa.

⁴Re" ayam aqei: khyoo: yu" lho: cibue" nyid ziri yu" we'. Re" byumyu" yigi yhoem: khyoo: loo wa shid re" zeing: foem: nyid ago". Re" yuggi zoo: yigi vi: mo ju" loo ri" wa. Re" myiyi: zoo: yigi zooshang: ri yhang: ti" bau: lo zi shau" goo" wa.

⁵Nang gi he: ziri shau" myang lang" gau yi ziyo' byeung" loo wa. Nang gi gau lho: ko' ko' nain" loo wa. Byumyu" yi da" jonu" joem gi re" jhang ci: lo zi shau" goo" wa. Panglai dashoid mo nyangnu" jonu" joem ju" lo boem goo" wa.

⁶Midian yo' Epha mo Gola-ug too: tho' da" phung: moo" zeing ju" lo boem goo" wa. Nyangnu" gi Sheba mo sheing: yo' shoem: nam pyo: xu: voin wigi ju" lo boem wa. Byumyu" yigi ASEING koid bye: da" khyoo: lu dang: gi ri tid loo goo" wa.

⁷Kedara yo' Nebaiod yang joem dangain" gi Xoin" khyo" re" jhang khyoo: ci: re" boem goo" wa. Houg lho: ASEING ri vho: ngei nhang: wa shid re" phoin: dang moo ngei" byid: loo wa. ASEING gi nya: Noku Yhoem: Moo" ri goonham' mo tho' je wigi phung" yoeb bang nhang: loo wa.

⁸Pheing" kyoug" joem yhoem: khyoo: lo" nyid yhang: ti" Hau: gyid sangphoo joem gi jhoemmoug" thei" yhang: ti" cikoid thei" do, lo boem la".

⁹Hau: gyid sangphoo joem gi ve: da" mungdain: mo ASEING byumyu" yiri yhoem: khyoo: shu" lo nyid zi nghoid. Nya: byumyu" yiri byumyu" mungdain: dangain" ngi: shab byid: nhang: da" Israela da" gyeung" shang: da" Mangsoo ASEING myeing ri ngi: shab byid: wa. Nyangnu" gi ngei sheing: yo' dage" thu lo da:.

¹⁰ASEING gi Yerusalem ri tid «Tungbau byu yigi re" vang joem ri doem zhug loo goo" wa. Houg lho: nyangnu" khokham gi nanu" ri dei byid: loo goo" wa. Ngoo nheig yo: wigi nanu" ri ngoo yooboo dam byid: bye:. Nghoid loug we' akhid" ngoo gi nang ri myonhoo: byid: ziyo' nheig khyeug nheig myen: zi ci: shug byid: wa.

¹¹Byumyu" mungdain: joem da" khokham yi Nyangnu" jonu" ri re" jhang yo" voin loo wa shid re" re" khoem" joem ri myen" ri nyid" ri phang too" ca" loo wa.

¹²Nghoid loug we' nang ri adei byid: da" byumyu" yigi Bain sho' phyo' shoin' pyam' zi shau" loo goo" wa.

¹³«Yerusalem nang ri doem zhug wa shid re" Nga" Noku Yhoem: Moo" ri yung" sho' koid wa shid re" Nga" voomoo" ri phung" boo sho' koid wa shid re" Shithang: thi"- junipa: thi"- goin: thi"- Lebanon seig yoo mo ge thang da" seig thi" joem ri tho' lo boem goo" wa.

¹⁴Nanu" ri zeig zoo: boem bang: da" amyed ashen yigi nanu" jhang re" lho: Nyangnu" da" phau" myang: khyoo: ri ci: shug wa shid re" goeb pid loo goo" wa. Goonham' nanu" ri aphoug" akhyoid koid bang: dangain" nanu" khyid: yang: moo noku loo goo" wa. Nyangnu" gi nang ri ‹ASEING da" voomoo"› ‹Israela da" gyeung" shang: Mangso da" voomoo"- Ziun› ga: myheing loo goo" wa.

¹⁵Nang ri she: pyam' too" kho' ziyo' ngheing" da" voomoo" phang: cau" to" kho' ziyo' jham" coug: youg bue" jo, da" voomoo" anghoid loo wa. Ngoo gi nang ri reung: ziyo' yung" sho' koid wa. Apyaid atoo: moo ngei pyo: da" joyoo koid wa.

¹⁶Nya: myhi' wigi nya: zoo: ri coung: ziyo' dayhang: ti" Byumyu" yi yo' khokham yigi nang ri goin coung: loo goo" wa. Ngoo ASEING gi nang ri khyoid yu wigi Israela da" yoem: bo Mangso wigi nang ri lhoid pyoin kaid ziri nang se' loo wa.

¹⁷«Ngoo gi nang ri gyid: mid" gungthid sheing:- Jo, to' yo' seig gungthid ngei yo' gyid: mid"- Lug boem gungthid joto' ri ci: loo byid: wa. Nang vhoeb da" bang: gi nang ri azeig zoo: loo wa. Ngoo gi nyangnu" ri tarha" deungmain" lho: ngei pyo: yug yo ziyo' vhoeb nhang: wa.

¹⁸Pyi: sho: da" thui: joem ri ashoug" gyoo: loo wa zi anghoid. Phyo' shoin' ziri re" mungdain: ri adoem khyoeb mhoin' pyam' loo wa. Ngoo gi nang ri vang yhang: ti" goem loem ziyo' gyi goo byid: wa. Nang ri ngoo khyoid yu bye: yoomo nang ngoo ri coung" nghei loo wa.

¹⁹«Nyid" mo bid we' re" bidbang anghoid loo: wa. Houg lho: myen" mo lhammoo" zho: zi we' re" bidbang anghoid loo: wa. Ngoo ASEING gi apyaid atoo: moo re" bidbang nghoid wa. Nga" phung" yoeb bidbang gi re" adang moo zhoo: byid: nyid wa.

²⁰Re" gyoug ngau da" bidnyid joem gi thang lo" byug wa. Ngoo ASEING gi re" apyaid atoo: bidbang nghoid wigi Bid yo' lhammoo" tho' je myang jo, jo, wa.

²¹Re" byumyu" yigi jo ziri koid loo goo" wa. Houg lho: mungdain: ri apyaid atoo: moo yo" seing: yu boem wa. Dangain" bang: ri nga" gyi: sheung: khyoo: ri ci: shug byid: wa shid re" Ngoo nyangnu" ri sho" too" bye:. Nyangnu" ri phain" too" bye:.

²²Re" nge thang ziyo' nyhoem: thang da" yhoem: ikoin deungkhu: lang" Yoem: bo da" byumyu" yhi' gyi: sheung: loo goo" wa. Ge da" ayo, gi ju" loo lang" Ngoo gi he: ziri myab za: bue" loo nhang: wa. Ngoo gi ASEING nghoid» ga: tid.