Read Lashi ESAIA 61 Bible Online

ESAIA 61 - Lashi bible

ESAIA 61

¹Gyi: sheung: thang ASEING gi nya: Venyi: ngoo ri pyeing byid: bye:. Nyang: gi myung: shoo" bang: ri lu dang: gi voin yhi: byid: wa. Nheigloem: gyau: bang: ri byang" gi byid: wa Myheig she: loo" shau" bang: ri loid byoin byid: da" khyoo: tid fu" wa yo' Thung: loung" jo, bang: ri lhoid pyoin' byid: wa shid re" Ngoo ri khyen: yu wigi nhang: kaid bye:.

²ASEING wigi nya: byumyu" yiri khyoid yu lho: Nyangnu" gyivoo yiri oung: pyam' wa Ayo, ju" bye: khyoo: ri Tid fu" wa shid re" nyang: ngoo ri nhang: kaid bye:. Nyang: gi koug ngau nyid da" bang: dangain" ri nheig teing byid: wa shid re" ngoo ri nhang: kaid bye:.

³Ziun moo nheig koug nyid bang: ri koug ngau wa gungthid gau yi ngei pyo: zi byid: wa. Myid apyoo: wa gungthid coung" nghei jikhoin" khoin" nhang: wa shid re" ngoo ri nhang: kaid. Nyangnu" gi ASEING wigi nyang: nyang: sho" to" da" seiggam joem yo' du loo wa. Nyangnu" dangain" gi jo ziri koid loo goo" wa. Houglho: Mangsoo gi nyang: koid lo da" lo, moo" yoomo coung" nghei byid: zi shau" lo goo" wa.

⁴Nyangnu" gi myang" sho' byo, yoin" jo, da" voomoo" joem ri doem zhug loo goo" wa.

⁵Nga" byumyu" yi we"- tungbau byumyu" yigi nanu" ri dei byid: loo goo" wa. Nyangnu" gi nanu" da" yang yo' coidbaid kyung joem ri yu" coung: lho: Nanu" khyam: yoo moo khyam: koid ziyo' nanu" zabyid khyam: joem ri yu" coung: byid: loo wa.

⁶Houglho: nanu" gi ASEING da" khainjung yi khyo" we' Ngoonu" Mangso da" dei zoo: yi khyo" we' myeing fu" loo goo" wa. Nanu" gi byumyu" yi da" jonu" joem ri yo" yhung: zo: wigi Hau: ziri nanu" zi khyo" langi: koid loo goo" wa.

⁷Nanu" da" sho' ziyo' ngi: yoem" zigi thang byug da:. Nanu" nya: mungdain: moo nanu" yo" nyid wa. Houglho: nanu" da" jonu" gi eig zhang nghoid loo wa. Nanu" da" gau yi ngei pyo: zigi apyaid atoo: moo jo, jo, wa.

⁸ASEING tid zigi «Tarha" deungmain" ziri ngoo jheddab wigi doin: zeig zo: ziyo' yooboo youg: moo" ri ngoo ngheing" da:. Nga" byu yi ngoo jhug zug za: aphoug" jhungshug byid: wigi Apyaid atoo: dang: theing nyangnu" yo' koid too" bye:.

⁹Nyangnu" gi byumyu" yi phung: gung moo myeing gyi: loo goo" wa. Nyangnu" ri myang da" yugkhang" moo" gi Nyangnu" ri ngo wigi mainkaid byid: to" da" byu yi nghoid boem khyoo: ri nyangnu" se' loo wa» ga: tid da:.

¹⁰ASEING koid bye: da" lo, moo" yoomo Yerusalem ngei pyo: da:. Nyang: gi nya: lo, xo' pui" shid re" soin' shoung: void ci: da" myhi' seig yo' du loo wa. Mangsoo gi nyang: ri khyoid yu ziyo' oung: doid zi wigi foid too" abye:.

¹¹Myoug: shi" joem anyug toid lo wigi yug lo zi nghoid zigi gyeing" nghoid ziyo' dayhang: ti" Myhang: thang ASEING gi nya: byumyu" yiri khyoid yu wa. Houglho: byumyu" yi dangain" gi nyang: ri coung" nghei byid: loo goo" wa.