Read Lashi ESAIA 66 Bible Online

ESAIA 66 - Lashi bible

ESAIA 66

¹ASEING tid zigi «Mougkhung: gi nga" zhungtang- myid jang gi nga" khyid: ki" tang nghoid da:. Houg ri ce: ja: yhoem: nang ngoo ri yo" koid byid: wa lha". Ngoo nyid wa nga" shid re" khate" joyoo nghoid lha".

²Moug: gyab goin" ziri ngoo nyang: phain" so: to" zi nghoid. Nheigloem: nyhoem: khyo' mo, yo' nung myid yoo" bang:- ngoo ri gyoug phoug" bang:- nga" da" tid dang: gyoo: bang: ri ngoo vho: ngei da:.

³«Byu yi nyangnu" vho: ngei khyo" koid ago". Nyangnu" gi xoin" khyo" nu: loo: said loug we' xangsu: byu ri xoin" khyo" ngei" byid: loug we' nyangnu" yang nu" ri xoin" ngei" byid: loug we' Lakhuid" leung zeung: jab ceing ngei" byid: nghoid loug we' nyangnu" shivoo: xoin" anghoid lang" vu, suid" ngei" byid: loug we' nyangnu" shoem: nam pyo: ja: nghe' ngei" byid: nghoid loug we' yu phara" soolhoo: ri akyu" mho' loug we' dangain" gi nyangnu" shid re" dayhang: ti" `za: nghoid da:. Nyangnu" aco' ajhoid moo" khyo" no' jang" moo pyo: khyoo: ri sho: ago".

⁴Hougsu" yoomo ngoo gi nyangnu" adang moo nyangnu" gyoug da" ja: kyi" khyeug yau: khi" ziri bui" nhang: wa. Ciwim gari ngoo khe: uri hang" are" byid:. Nga" dang: ri hang" atam" gyoo: byid: yoomo nghoid da:. Nyangnu" gi ngoo ri tid dang: agyoo: byid: wa yo' akhyeing" zi koid wa khyen: yu ago"» ga: tid da:.

⁵Nyang: ri gyoug phoug" zi yo' tid dang: tam" gyo: da" bang: nanu" we"- ASEING tid ziri tam" gyoo: we'. «Nanu" ngoo ri jhug zug yoomo nanu" da" byu dayham" gi nanu" ri ngheing" wigi nanu" yo' ci: we' asen: da" khyo" koid loo goo" wa. Nyangnu" gi nanu" ri juang" wigi ‹Nanu" gau yi ziri ngoonu" shau" myang sho' ASEING gi nya: yoem: so' gyi: sheung: ziri ci: shug byid: wigi nanu" ri khyoid yu baja"› ga: tid ago". Nghoid loug we' nyangnu" nyang: ngi: yoem" ago".

⁶Tam" gyoo: ge'. voomoo" mo thui: zeing- Noku Yhoem: Moo" mo thui: gi ASEING nya: gyivoo ri yooboo dam byid: nyid da" thui: nghoid da: o".

⁷«Nga" gyeung" shang: da" voomoo" gi khanham we' zoo: akhu: yu" da" myiyi: dayug nyeigdain tung" za: zoo: khu: loo ziyo' du da:.

⁸Houg: yhang: ti" ziri hang" khanham myang yu"- gyo: yu" bye: go" rhe". Byu damyu" gi danyid" moo kyeing" khu: lo boem lha". Byu akhu: loo shiri Ziun gi kyi" khyeug yau: khi" zi myang" sho' akham zoo: ca" wa.

⁹Nga" byu yiri zoo: khu: wa azhang yo' nyangnu" ri akhu: loo nhang: sho' da" azhang khyoo: ju" sho' ngoo bui" nhang: loo wa ein: ajhoo: goo"» ga: ASEING tid too" bye:.

¹⁰He: voomoo" ri jheddab bang: nanu" we" Yerusalem yo' dage" ngei pyoo: ge'. Nya: shid re" gau ge'. Nya: shid re" koug ngau nyid bang: nanu" we" akhid" nyang: yo' dage" ngei bu: ge'.

¹¹Zooshang: gi nya: myhi' yanggang moo ngei bu: ziyo' dayhang: ti" nanu" gi nya: jonu" moo ngei bu: nyid loo goo" wa.

¹²ASEING tid zigi «Nang ri jonu" yoo" zoo: yoo" shug khyoo: myoo" sho' byid: wa. Byumyu" yi da" jonu" gi khanham we' ayau kain" lo" byug da" gyid gyung: yhang: ti" re" jang" moo yau vang nhang: wa. Nang gi nya: myhi' lo, moo vu, ci: lho: jheddab myid yo' khoem ci: wigi noug" jhug byid: da" zooshang: yo' du loo wa.

¹³Nya: myhi' gi nya: zoo: ri nheig teing byid: ziyo' dayhang: ti" ngoo gi nang ri Yerusalem ri nheig teing byid: wa.

¹⁴Hid su" bue" ziri nang myang lang" nang ngei bu loo wa. Hau: zigi nang ri yoem: boo nhang: wigi yang" zain: nhang: wa. Houg: lang" ngoo ASEING gi nga" tid dang: gyoo: byid: bang: ri pang" thoug byid: yug nghoid wigi nga" gyivoo yiri nga" nheig yo: thougtheung zi ci: shug byid: su: nghoid ziri nanu" se' loo goo" wa» ga: tid.

¹⁵ASEING gi myi: yo' dage" ju" ri" wa. Nyang: wigi nheig yoo: bang: da" adang moo yooboo dam byid: wa shid re" nyang: gi uglid dung tho' moo zhung: wigi ju" ri" wa.

¹⁶Nyang: wigi yooboo yo" sho: myang da" myid jang byu xangsu: dangain" ri myiyham: wigi nyang: yooboo dam byid: ri" wa. Myoo" sho' bang: gi said pyam' shau" boem goo" wa.

¹⁷ASEING tid zigi «Nyang: nya: gung ri tungbau yu phara" ri no' wa shid re" kyeing sain' pyam' bang:- gyeung" shang: khyam: khyoo: yhe: lo" jang" moo bo yhi: bang:-vu, shoo"- gyu, shoo" yo' gootu: aco' ajhoid bue" da" zoo: noem zoo: bang: shid re" thang loo" wa ayo, jhang abye:.

¹⁸Ngoo gi nyangnu" da" myid soin' khyoo: yo' lo, moo" joem ri si' byid: da:. Byumyu" dangain" ri zheing" yu wa shid re" ngoo re" lo nyid bye:. Nyangnu" zeing: ri" lang" nga" yoem: so' ci: yo" koid ziri se' loo goo" wa.

¹⁹Houglho: nyangnu" ri yooboo dam byid: su: gi ngoo nghoid ziri se' loo goo” wa. «Nghoid loug we' ngoo gi dayham" ri teing to" wigi nga" myeing gyi: khyoo: ri agyo: yu"- nga" yoem: so' gyi: sheung: khyoo: yo' yoem: so' ri amyang yu" boem da" Spain- Libya- Ludia yo' hougmo lid: dain" moo kung bang:- Tubad yo' Greek bang: nghoid da" moug: vi: mung" yo' byumyu" yi jhang khyoo: nyangnu" ri nhang: kaid wa. He: byumyu" yi phung: khau: moo nyangnu" gi nga" yoem: so' gyi: sheung: da" khyoo: ri tid fu" loo goo" wa.

²⁰Nyangnu" gi nanu" da" mang: nhung" dangain" ri nga" shid re" jhungshug khyo" byumyu" yi jang" mo shu" tau" lo boem wa. Israela byumyu" yi Noku Yhoem: Moo" khyoo: thung" khyoo" younglho' da" bain moo shivoo: xoin" joem ri tho' re" boem zi yo' dakhyoo" ti" nyangnu" ri myang: joem loo kung" joem gola-ug joem myang: rheing" joem yo' zi tho' rheing" joem dang moo tho wigi Yerusalem mo nga" gyeung" shang: bouggung khyoo: nyangnu" shu" lo boem goo" wa.

²¹Ngoo gi nyangnu" mo dayham" ri khainjung yo' Levi byu yi koid nhang: wa.

²²«Myid gung seig yo' mougkhung: seig gi nga" yoem: so' khyo" jo, jo, loo wa. Houg: yoomo re" amyed ashen yi yo' re" myeing gi jo, jo, loo wa.

²³Lhammoo" xain" pui" nyid" khang" nyid" yo' Dougno: Bidnyid nyid" khang" nyid" byumyu" ja: khang" moo" da" mung" byu yigi he:Yerusalem moo ngoo ri re" noku loo goo" wa» ga: ASEING tid.

²⁴«Nyangnu" thu lo boem uri ngoo ri gyi koid thougtheung mo, da" manggung joem ri nyangnu" myang boem wa. Houg: bang: ri zo: da" lugdung: gi khanham we' shid: wa zi anghoid. Houg: bang: ri nge" nyid da" myi: gi khanham we' joem: loo" wa zi anghoid. Houg: bang: da" bue" nyid khyoo: gi xangsu: byu dangain" shid re" aco' ajhoid nghoid loo wa» ga: ASEING tid.