Read Lashi ESAIA 7 Bible Online

ESAIA 7 - Lashi bible

ESAIA 7

¹Uzia da" nya: myid:- Yotham da" yuggi zoo:- khokham Ahaza Yuda mung" ri vhoeb uri meing: byo, thu lo da:. Suri khokham Rezin yo' Pekaha ga: su: Remalia da" nya: zoo:- Israela khokham gi Yerusalem ri meing: zain: da:. Nghoid loug we' hau: ziri ayo" seing: yu pyam nghoid da:.

²Suri gyidab joem Israela mougmyid moo re" ju" nyid boem bye: ga: da" lu dang: Yuda khokham jhang ju" loo" lang" nyang: yo' nya: mung" byu yi dangain" gi seiggam joem ri lid hau' nhoin' nyid yhang: ti" ko' ko' nain' wigi gye" gyoug nyid ago".

³ASEING gi Esaia ri «Re" yuggi zoo: Sheara Yashub ri shu" wigi khokham Ahaza ri yhe: shoug" we'. Nang gi nyang: ri atho' gyid thung" mo gyid she: yu da" gyid khyoo: thang: joyoo- byimi cid" mo, moo" zei: da" khyoogung moo yhe: shoug" goo" wa.

⁴Nyang: ri boin: boin: za: yug yoo tung" nyid wigi agyug wa yo' nheigloem: anhung wa shid re" tid kyoo" we' Khokham Rezin yo' nya: Suri byu yi khokham Peka bang: da" nheig yo: zigi thang" bei" eig khyung" mo neing" thu nyid da" myikhoug" tho' ci: aje gyoug ca".

⁵Suri gi Israela yo' nya: khokham ri goemlu gau" to' da:.

⁶Nyangnu" gi Yuda khyoo: jhen" vang yhe: lho: nyangnu" shoid bo dab loo sho' yhe: kyug nhain' wa soin' to" ago". Hau: thang: Tabela da" yuggi zoo: ri khokham zhungtang moo zhung: nhang: wa soin' to" ago".

⁷Nghoid loug we' he: zi khanham we' abui" wa ein: ngoo ASEING tid.

⁸Ciwim gari Suri gi nya: voomoo" zeing Damasku tho' yoem: aje boo. Damasku gi khokham Rezin tho' yoem: aje boo yoomo nghoid da:. Israela koem' gi byumyu" mungdain: daloem: khyo" nyid deing jo, wa bang: gi khyug xe: wim: zain: gyoo: moo gyoeb, mhoin' pyam' zi shoug" wa.

⁹Israela gi nya: voomoo" zeing Samari tho' yoem: je aboo nghoid da:. Samari gi khokham Peka tho' yoem: je abo nghoid da:. Nanu" loem khau: myid azeing: shang" boem nghoid rigi nanu we' zeing: shang" byid: zi ashoug" goo" wa» ga: tid.

¹⁰ASEING gi Ahaza ri gootu: mungdang: foin: kaid zigi

¹¹«Nang ri avoid daja: ci: shug byid: wa shid re" re" ASEING Mangsoo ri mho' we'. Hau: zigi no, da" moovo moug: mo anghoid lang" myhang: da" mougkhung: mo ge nghoid da» ga: zi nghoid.

¹²Ahaza gi «Ngoo gi avoid ri amho' wa. Ngoo gi ASEING ri ajham" yu" wa» ga: phoug tid da:.

¹³Esaia gi akhid" David da" amyed ashen yi we"- tam" gyoo: we'. Nanu" gi byumyu" yiri nheigloem: asheing: wa zi cishu: anhang: wigi Mangsoo ri we' nheigloem: asheing: wa ein: go" rhe".

¹⁴Houg: lang" gi bye:. ASEING gi nyang: nyang: avoid daja: ngoonu" ri byid: loo wa. Hau: zigi gung lid: da" zoomyi: dayug gi yuggi zoo: dayug khu: loo wa. Nya: myeing gi Emanuela ga: myheing loo wa.

¹⁵Nyang: gi nyang: nyang: se' myid phyed da" ayo, ju" lang" byu yigi nunoug" shug- byoo yhid: ri zo: nyid loo goo" wa.

¹⁶Hau: ayo, aju" shi" rilang" gi nanu" ri kyug nhain' nyid boem da" hau: khokham eig yug da" mungdain: gi jham" coug: youg bue" byug wa.

¹⁷ASEING gi Yuda mung" mo Israela mung" ri kho' yu da" bidnyid moo bue" yu" da" yau: khi" tho je: xo: da" yau: khi" bidnyid yiri nang yo' re" byumyu" yi re" khokham yhoemkhung: goin" adang moo bue" loo goo" wa. Nyang: gi Asuri khokham ri khe: yu wa.

¹⁸Hau: ayo, ju" loo lang" ASEING gi Egutu byu yiri ve: thang da" Nila gyid lang gyid ko' joem mo yangkhung" joem yo' dayhang: ti" ju" ri" goo" wa ziyo' Asuri byu yi we' nyangnu" mung" mo byoo: joem yo' dayhang: ti" ju" ri" wa shid re" lo, moo" moid kaid da:.

¹⁹Nyangnu" gi akhyi" akhyoid da" lang: khoug: joem moo yo' lug pyo' joem moo jo, da" lug ug joem moo re" foem: jo, wigi nyangnu" gi zu: kyen: pung khang" moo" yo' mhain" yoo khang" moo" moo re" byeung" jo, goo" wa.

²⁰«Hau: ayo, ju" loo lang" ASEING gi Asuri khosen nghoid da" Uphrad lang thu: dab mo vhuloem ko' yug ri vhoo" kung: lhung: yu wigi nyang: gi re" nhoid mei: joem re" vhuloem mo xam: joem re" gung mo shoo" moug" joem ri yug pyam byid: wa zi nghoid.

²¹Hau: ayo, ju" loo lang" yoo thung" koid zoo: yug dayug gi nujung bam: dadu: yo' coidbaid eig du: za: yo" zoem: too" nghoid loug-

²²Hau: joem mo nyang: ca" gu: dangain" yo" yu sho' noug" myoo: sho' thu byid: wa. Nghoid bye:- mungdain: moo kangso' dei nyid deing mo, dajhi' za: nghoid wigi nunoug" yo' byoo: yhid: shoug" shug goo" wa.

²³«Hau: ayo, ju" loo lang" zabyid nei dakhyeing" yug da" zabyid khyam: dakhyam: ri ngei dakhyeing" byid: da" zabyid khyam: gi joem gi zu: gam yo' zu: kyen: pung joem yug se: nghoeb jo, wa.

²⁴Byu yigi hau joyoo khyoo: lid: joem yo' myoo: joem ri ci: wigi shoo" yhe: khaid goo" wa. Nghoid bye:- mungdain goin" gi zu: gam yo' zu: kyen: pung joem byeung" jo, goo" wa.

²⁵Gug shi" mei: shi" lhung sho" da" bouggung joem dangain" gi houg khyoo: hang" ayo" yhi: loo: sho' zu: kyen: joem xo: sho' yug nhe' pyam wa. Hau: joyoo gi nu: yo' yang joem mhain" lham" zo: da" joyoo bue" byug wa» ga: tid da:.