Read Lashi ESAIA 8 Bible Online

ESAIA 8 - Lashi bible

ESAIA 8

¹ASEING gi ngoo ri «Moug soug" khyab gyi: ziri yu lho: hau: adang moo lhid" cab gyi: gyi: wigi nyeigdain tung" khaid zain:- myab myab yhe: lhoid yu ge' ein: lhid" we'.

²Sagse: koid wa loem ge" da" byu eig yug nghoid da" khainjung Uria yo' Yeberekhia da" yuggi zoo: Zekharia eig yug ri shu" yu ge'» ga: tid da:.

³Hau: thang: amyang" ri nga" yhoem: seing: myhi' gi gung lid: re" da:. Nga" eig tang: yuggi zoo: khu: ri" lang" ASEING gi «nyang: ri ‹Nyeigdain tung" khaid zain:- myab myab yhe: lhoid yu khyoo: ein: myeing myheung.

⁴Hau: yuggi nu" ‹Nga" yhed› ‹Nga" ba"› ga: ase' tid shi" ri Damasku mo jonu" dangain" yo' Samari mo jonu" dangain" gi Asuri khokham wigi de" phang: lo" zi shoug" goo" wa ga: ngoo ri tid da:.

⁵ASEING gi ngoo ri dang: doem tid da:.

⁶Nyang: gi «Ciwim gari he: byu yigi Shilo gyid zoo: gyung: mo myenjham" da" gyid ri ngeug pyam lho: khokham Rezin yo' khokham Peka tang: shidkhoin" moo: nang nhe" pyam abye: go".

⁷Ngoo Aseing gi Asuri khosen yo' nya: gyidab joem dangain" ri Yuda mung" ri khaid zain: wa shid re" shu" loo wa. Nyangnu" gi hau: gyid yam dangain" ri yau nhe' pyam da" Uphrad gyid khyoid lang yhang: ti" ju" loo goo" wa.

⁸Nyangnu" gi gyid khyoid yhang: ti" Yuda mung" khyoo: khyoid lid lo wigi kootho' ju" sho' no, wigi ja: khang" moo" ri nhe' pyam goo" wa» ga: tid. Mangsoo gi ngoonu" yo' dage" nyid. Pyo: ci: da" nya: dung joem gi mungdain: ri goem loem byid: loo wa.

⁹Byumyu" yi nanu" we"- gyoug ziyo' zeing: foem: nyid ge'. Mougmyid dang ve: da" joyoo moo nyid da" nanu" we"- tam" gyo: nyid ge'. Gyi khaid wa jen" jen" koid too" ge'. Nghoid loug we' gyoug koem' gyoug we'. Nghoid bye:- jen" jen" koid ge'. Nghoid loug we gyoug koem' gyoug we'.

¹⁰Nanu" soin' nyheing too" ge'. Nghoid loug we' hau joem gi oung: doid wa zi anghoid. Nanu" nau tid yhi' tid ge'. Nghoid loug we' dangain" zigi aji amyed za: danghoid. Ciwim gari Mangsoo gi ngoonu" yo' dage" nyid.

¹¹ASEING gi nyang: gyi: sheung: da" yoem: so' wigi byumyu" yi cang boem da" khyoo: ri abo cang yhi: wa shid re" ngoo ri tid poin" byid: da:. Nyang: gi

¹²«Byumyu" yi soin to" jang" moo abo boo houg: lho: nyangnu" gyoug da" ja: ri we' agyug

¹³Myhang: thang ASEING ngoo gi gyeung" shang: yug nghoid ziri myid boin: we'. Nang gyoug ca" yug gi ngoo nghoid.

¹⁴Nga" gyoug pho" gyeung" shang: zi yoomo byumyu" yi khyid: vhu" thung" leung boem da" lug boem yo' dayhang: ti" ngoo bue" nyid da:. Ngoo gi Yuda mung" byu yi Israela mung" byu yi yo' Yerusalem byu yi dangain" mo, myi" boem wa zi nghoid da" lhid' yo' dayhang: ti" bue" nyid da:.

¹⁵Myoo: sho' mo, khyid: vhu" thung" leung: boem goo" wa. Nyangnu" leung lo" wigi baid coid yu boem goo" wa. Nyangnu" lhid moo myi" boem goo" wa» ga: tid.

¹⁶Nga" cang: zoo: yi nanu" gi Mangsoo wigi ngoo ri byid: to" da" mungdang: ri goem loem byid: wigi zei: zhoeb ci: wa zi nghoid ago".

¹⁷ASEING gi nya: byumyu" yi mo phang: gou" byug bye:. Nghoid loug we' ngoo gi nyang: ri loem jeing" khau: nghe: wigi nga" myid byu khyoo: nyang: moo kaid to" da:.

¹⁸Ngoo gi ASEING wigi byid: to" da" zooshang: yi' yo' dage" nghoid. Ziun boem mo zhungtang moo zhung: da" myhang: thang ASEING gi Israela byu yi shid re" dei nyid da" mungdang: khyo" ngoonu" ri nhang: to" abye:.

¹⁹Nghoid loug we' byumyu" yigi mungdang: joem ri lo, kyo' yu" bang:- dang: so' so'- nyhung: nyhung: ga: tid da" join: zei: bang: jhang yhe: myid: yu goo" wa shid re" nanu" ri tid loo goo" wa. Nyangnu" tid zigi «Gyeing" ga: rigi byu gi dei nyid bang: da" gungthid soobyoo joem yo' shid: bye: bang: ri dang: myid: wigi mungdang: joem ri yo" myid: yu da» ga: boem go" wa.

²⁰Nanu" gi nyangnu" ri «ASEING wigi nanu" ri jhau" shid nyid ziri tam" gyoo: ge'. Join: zei: bang: dang: ri atam" gyoo: goo". Nyangnu" wigi nanu" ri nanu" shid re" ce: akyu" aboo nghoid da ein: phoug tid goo" wa nghoid ago"» ga: tid da:.

²¹Meing: byu yigi yoem: shoin: ziyo' zooyoid lho: mungdain: jang: sho' khyoo: so" lam" yen" ago". Nyangnu" da" zooyoid ziyo' nheig yo: zigi nyangnu" da" khokham yiri we' nyangnu" da" Mangsoo ri we' nheing" loo goo" wa. Nyangnu" mougkhung: khyoo: nghang yu"

²²anghoid lang" myidgung khyoo: zhug yu" loo goo" wa. Nghoid loug we' nyangnu" gi yau: khi"- moug: coid yo' nyangnu" ri khaid thu pyam da" gyoug pho" moug: coid mo lid gootu: ci: ri we' ashau" myang goo" wa.