Read Lashi XOIN" NGEI" 12 Bible Online

XOIN" NGEI" 12 - Lashi bible

XOIN" NGEI" 12

¹ASEING gi Moshe ri vhoo: moo: tid to" da" thung" joem ri

²Israela byumyu" yi shid re" byid: bye:. Myiyi: gi lhammoo" khyab, khang" moo" bue" da" mi ci: ayo, yhang: ti" yuggi zoo: khu: thang: nyhed nyid" ju" sho' nyang: gi thung" khyo" ayung" alho' nghoid da:.

³Shed nyid" nyid" moo zooshang: ri shooyid thang: yham" byid: wa nghoid.

⁴Hau: thang: nyang: suid" shoin: jang" mo thung" khyo" younglho' da" ayo, ju" sho' soem" xe: soem" nyid" nyid wa nghoid. Nyang: gi younglho' pyam da" ayo, abyeung" byeung" gi gyeung" shang: da" ja: ciri: we' age tain" anghoid lang" gyeung" shang: da zoem" khoug: khyoo: age vang yhi: wa.

⁵Myiyi: gi lhammoo" khyab, khang" moo" bue" da" mi ci: ayo, yhang: ti" myiyi zoo: ri khu: thang: daxe: myid: nyid" ju" sho' thung" khyo" ayung" alho' nghoid da:. Hau: thang: nyang: suid" shoin: jang" mo thung" khyo" younglho' da" ayo, ju" sho' khyug xe: khyug nyid" nyid nyid wa nghoid.

⁶Yuggi zoo: khu: wigi nghoid ri nghoid myiyi: zoo: khu wigi nghoid ri nghoid nya: da" younglho' pyam da" ayo, byeung" lang" nghe' ngei" wa shid re" dazain byeung" da" yang nu" dadu: yo' yooboo khyoid xoin" shid re" jid: u: dadu: anghoid lang" pheing" kyoug" dadu: ri ASEING shidkhoin" zoem" khoem" duang:- khainjung jang" khyoo: ci: yhi: wa nghoid.

⁷Khainjung phoo gi myiyi: myhi' da" xoin" ri ASEING ri shugbyid: wa nghoid lho: nya: ayung" alho' da" ziri thung" khyo" yu pyam byid: da" akhyoo" ri koid wigi nyang: gi thung" khyo" younglho' byug wa nghoid. He: zigi myiyi: dayug zoo: bain khu: thang: ri koid ca" da" akhyoo" joem nghoid da:.

⁸Myiyi myhi' gi yang nu" age bui" nghoid rigi nyang: gi pheing" kyoug" eig du: anghoid lang" jid: u: eig du: ri dadu: gi nghe' ngei" xoin" shid re" ci: yhe: lho: gootu: dadu: gi yooboo khyoid xoin" shid re" ci: yhi: wa zi nghoid. Houg: lho: khainjung phoo: gi hau: myiyi myhi' da" ayung" alho' da" ziri thung" khyo" yu pyam byid: da" akhyoo" ri koid wigi nyang: gi thung" khyo" younglho' byug wa nghoid.