Read Lashi XOIN" NGEI" 19 Bible Online

XOIN" NGEI" 19 - Lashi bible

XOIN" NGEI" 19

¹ASEING gi Moshe ri

² Israela shava byu yiri tid wa shid re" «Gyeung" shang: nyid ge'. Ciwim gari: ngoo nanu" ASEING Mangsoo gi gyeung" shang: nyid.

³ Nanu" yugkhang" moo" gi nanu" da" yhed yo' ba" ri phau" myang: nyid ge'. Ngoo amyeing" byid: to" ziyo' dayhang: ti" Dougno: Bidnyid ri cang nyid ge'. Ngoo gi nanu" ASEING Mangsoo nghoid.

⁴ «Ngoo: ri ashe: pyam goo". Soolhoo: ri we' ano' goo". To' yu phara" ri akoid goo". Hau: joem ri ano' goo". Ngoo gi nanu" ASEING Mangsoo nghoid.

⁵«Zoem" khau: xoin" shid re" nanu" gougnyhoug ri said uri ngoo nanu" ri byid: to" da" thung" ri: ri cang yhe: nyid ge'. Houg: lang" hau: xoin" ri ngoo khab yu wa.

⁶Shoo" ri gougnyhoug said da" bidnyid ri anghoid lang" thang: nyid" ri zoo: ca" wa zi nghoid. Soem" nyid" ein: nyid" ri deing da" shoo" joem ri nghe' pyam ca" da:.

⁷Ciwim gari: hau: shoo" gi thung" khyo" ayung" alho' nghoid da:. Hau: ziri dayug yug zo: nghoid rigi hau: xoin" ri ngoo akhab yu wa.

⁸Hau: shoo" ri zo: da" yug hang" nghoid loug we' ngoo ri shugbyid: to" da" ziri aphoug" akhyoid koid da" yooboo yoo" wa zi nghoid wigi nyang: ri nga" byumyu" dayug khyo" myid soin: byid: loo: wa zi anghoid.

⁹ Nanu" shivoo: yoo moo: nanu" shivoo: yham" uri yoo gyoem: mo shivoo: joem ri ayham" yu goo". Deing jo, kho' da" shivoo: joem ri we' adoem yhe: koid: yham" yu goo".

¹⁰Deing jo, kho' da" zabyid shi" joem ri yhe: doem phyo' zheing" wa shid re" anghoid lang" shu: gyo" jo, ziri yhe: doem koid: wa shid re" nanu" da" zabyid khyam: khyoo: adoem tau" yhe: goo". Hau: joem gi sho" jhen: bang: yo' tungbau byumyu" yi shid re" nghoid. Ngoo gi nanu" ASEING Mangsoo nghoid.

¹¹ «Akhoug" goo"- afain" goo"- amhoug goo".

¹² Nanu" dang: azung" wa nghoid rigi nga" myeing moo: dangsoo" akoid too" goo". Hau: zigi nga" myeing ri sho' phu" nhang: nyid da:. Ngoo nanu" ASEING Mangsoo nghoid.

¹³ Dayug yug ri afain" zoo: goo". Anghoid lang" nya: jonu" ri alhoid yu goo". Nang vhoo" kung: lhung: to" yug da" vhoo" kung: phoug" ri azei zeing ci:. Damyen koo: we' azei zeing ci:.

¹⁴ Nu jid yug ri anheing" goo". Myo, jed yug thoem: tho: leung wa khyo" nya: shidkhoin" moo daja: ja: ri atoo" byid: goo". Ngoo ri phau" myang: nyid ge'. Ngoo nanu" ASEING Mangsoo nghoid.

¹⁵ «Tarha" dang: phyed uri deingmain" wigi tarha" khyo" koid ge'. Sho" jhen: da" yug ri we' myonhoo: abyid:- yoo" zoo: bang: ri we' agyug goo".

¹⁶Dayug yug da" khyoo: ri lu amhoug fu". Byu dayug yug gi nya: apyaid shid re" tarha" myid: joeb ca: yu" zi shau" nyid uri re" da" sagse: kham da" dang: gi nyang: ri yo" bo pang" thoug wa nghoid rigi tid thu pyam we'. Ngoo gi ASEING nghoid.

¹⁷ «Hang" ri we' anau ashoo" thougtheung khyoo: akoid goo". Nghoid loug we' hau: yug yoomo nang yooboo ashoid wa shid re" nyang: yo' shai" go" da" khyoo: joem ri nyheing koid pyam wa.

¹⁸ Hang" ri we' latoo: aphug goo". Anghoid lang" nyang: ri angheing" nyid goo". Re" yhoem: kyoo" cang" ri nanya: gung yhang: ti" jheddab nyid we'. Ngoo ASEING nghoid.

¹⁹ «Nga" amyeing" dang: ri tam" gyoo: we'. Adu go" da" gougnyhoug nyang: cang" nyang: ri myoug: akaid nhang: goo". Yoo dakhyang" moo kyeing" myoug: shi" eig ja: ri ashoin" kaid goo". Khyeing: eig ja: wigi coeb to" da" byimi ri avoid goo".

²⁰«Join myhi' dayug gi yuggi phoo dayug da" dangcang: myhi' khyo" tu' to" wigi nyang: ri aphoug" byid: lho: anhang: kaid shi" uri nyang: yo' gootu: yuggi phoo dayug gung shoo" zoem" khau: nghoid rigi nya: tang: ri dam byid: wa zi nghoid. Nghoid loug we' nyang: gi join myhi' nghoid shi" yoomo said pyam shau" wa zi anghoid.

²¹Hau: yuggi gi nya: youg: khyoug" da" xoin" khyo" yang loo: dadu: ri Nga" shidkhoin" zoem" khoug: khyoo: she: ri" wa zi nghoid.

²²Houg: lang" khainjung phoo" gi nya: da" yooboo ri yu pyam byid: wa shid re" hau: yang ri ci: wigi thung" khyo" kyeing sain pyam da" khyoo: ri koid wa zi nghoid. Houg: lang" Mangsoo gi nyang: ri yooboo khyoid byid: wa zi nghoid.

²³«Nanu" Khanan mung" khyoo: vang lo" wigi shigam aja: ja: ri lo" sho" uri xang: shi" soem" zain moo zei: da" shi" gi thung" khyo" ayung" alho' ein: myid soin: yu wa zi nghoid. Hau: ayo, gyoo: moo: hau: shi" ri nanu" age zoo: wa zi nghoid.

²⁴Myid: zain ein: zain rigi Ngoo ASEING ri nanu" jeju" so" da" khyoo: ci: shug da" xoin" khyo" shi" dangain" ri shugbyid: wa zi nghoid.

²⁵Nghoid loug we' wim: zain ein: zain rigi hau: shi" ri nanu" yo" zoo: wa zi nghoid. Nanu" hougsu" koid nghoid rigi nanu" shigam gi je" zei: wa zi nghoid. Ngoo gi nanu" ASEING Mangsoo nghoid.

²⁶ «Suid" boo: shi" da" shoo" kha: ziri we' azoo: goo". Fa" khyoo: kha: ja: ri we' akoid goo".

²⁷ Nanu" vhuloem ayam mo xam: joem ri we' aphyed feing pyam goo"- anghoid lang" nanu" nhoid mei: ri we' anyham" feing goo".

²⁸Shid: bye: su: shid re" kougshu: wigi nyang: nya: gung ri ayham" goo". Anghoid lang" nanu" gung moo mhug athau" goo". Ngoo gi ASEING nghoid.

²⁹ «Nyangnu" ri noku yhoem: mo shava myhi koid nhang: khyo" wigi nanu" da" nya: myiyi: zoo: yiri sho' aphu" nhang: goo". Nanu" hougsu" koid nghoid rigi nanu" gi gootu: yu phara" yi jang" khyoo: lheing: phug loo" khari" wa zi yo' mungdain: gi akyang byo, yoin zi byeung" jo, boem goo" wa.

³⁰ Dougno: Bidnyid ri cang pyeing nyid ge'. Ngoo ri noku da" joyoo ri phau" myang: byid: ge'. Ngoo gi ASEING nghoid.

³¹ «Shid: bye: bang: da" soobyoo joem yo' dang: doem go" da" bang: jang" moo phajhi" ayhe: mho' goo". Nanu" hougsu" koid nghoid rigi nanu" gi thung" khyo" ayung" alho' wa nghoid. Ngoo gi nanu" ASEING Mangsoo nghoid.

³²«Mang: zoo: yiri phau" myang: byid: ge'. Nyangnu" ri ngi: shab byid: ge'. Phoug" myang: ziyo' nga" dang: ri tam" gyoo: ge'. Ngoo gi ASEING nghoid.

³³ «Nanu" mung" moo nyid da" tungbau byumyu" yiri aphoug" akhyoid akoid goo".

³⁴Nyangnu" ri nanu" gi Israela byu dayug yhang: ti" nyang: zoem" nyid ge'. Nyangnu" ri nanu" gung nanu" nyang: jheddab yhang: ti" jhed nyid ge'. Egutu mung" moo nanu" tungbau dalheing: bue" yu" bye: ziri myid boin: ge'. Ngoo gi nanu" ASEING Mangsoo nghoid.

³⁵ «Amain" da" laki- jangleig joem ri ci: wigi nanu" hang" ri we' amhoug zoo: goo"-

³⁶Main" da" jang- main" da" laleug- main" da" laki ci: ge'. Ngoo gi nanu" ASEING Mangsoo nghoid wigi ngoo nanu" ri Egutu mo shu" thu loo bye: zi nghoid.

³⁷Nga" tarha" yo' amyeing" dang: dangain" ziri tam" gyo: cang yhe: nyid ge'. Ngoo gi ASEING nghoid.