Read Lashi XOIN" NGEI" 2 Bible Online

XOIN" NGEI" 2 - Lashi bible

XOIN" NGEI" 2

¹Byu dayug yug gi ASEING ri shivoo: xoin" alu: ngei" byid: wa nghoid rigi cen: moin" gyeig yu ca" da:. Nyang: gi hougmoo: zhainloin: xu: yo' nam pyo: ja: kaid ca" da:.

²Houg: lho: hau: ziri Arun kung mo khainjung yi jhang khyoo: ci: yhe: ca". Xoin" ngei" da" khainjung phoo gi cen: moin" dazhoeb yo' xu: we' nam pyo: ja: dangain ri we' yu wigi ASEING ri ngei" byid: da" asoo" khyo" phoin: tho' moo: hau: ziri nghe' ngei" wa zi nghoid. He: xoin" da" shoem: gi ASEING ri ngei bu: nhang: wa zi nghoid.

³Deing da" shivoo: xoin" gi khainjung yi shid re" nghoid nyid da:. ASEING da" zoo: shug xoin" mo yu too" yoomo hau: zigi gye" gyeung" shang: nyid da:.

⁴Myikhyoem' moo kang: da" zoo: yho' xoin" ngei" wa nghoid rigi hau: ziri doocid" akaid loo: za: koid ca" wa. Hau: zigi cen: moin" yo' zhainloin: xu: lheig lho: thu: sho' koid to" da" zooyho' anghoid lang" zhainloin: xu: joid to" da zooyho' poo" nghoid ca" wa.

⁵Zooyho' bung: oug" moo bung: da" zooyho' ri xoin" ngei" wa nghoid rigi hau: ziri cen: moin" yo' zhainloin: xu lheig ca" wa nghoid loug we' doo cid" abo zi nghoid ca" da:.

⁶Xoin" khyo" hau: ziri ngei" byid: lang" hau: zooyho' ri khyu' mhoin' wigi xu: foid gyoin: wa zi nghoid.

⁷Oug" phain' mo rhe: to" da" zooyho' ri xoin" ngei" wa nghoid rigi cen: moin" yo' zhainloin: xu: wigi koid to" zi nghoid ca" wa.

⁸Hau: ziri ASEING jhang xoin" khyo" ci: re" wigi phoin: khyoo: ci: yhe: wa su: nghoid da" khainjung phoo ri yhe: byid: wa zi nghoid.

⁹Khainjung phoo gi hau: zi dangain" ASEING ri ngei" byid: bye: da" asoo" khyo" houg mo dayham" ri yu wigi nyang: gi hau: ziri phoin: tho' moo: nghe' ngei" wa zi nghoid. Hau: xoin" da" shoem: gi ASEING ri ngei bu: nhang: wa zi nghoid.

¹⁰Deing da" xoin" gi khainjung yi shid re" nghoid nyid da:. ASEING da" zoo: shug xoin" mo yu too" yoomo hau: zigi gye" gyeung" shang: nyid da:.

¹¹Nang ASEING ri ngei" byid: da" shivoo: xoin" ce: daja: ri we' doocid" yo' age: kaid wa. Nang gi ASEING ri ngei" byid: da" zoo: shug moo: doocid" anghoid lang" byoo: yhid: age ci: nghoid da:.

¹²Zain khang" moo" moo nang shau" yham" yu da" shivoo: shiloem xang: shi" myheing ziri ASEING jhang ci: re" byid: wa zi nghoid. Nghoid loug we' hau: phoin: moo: age nghe' ngei" wa

¹³Shivoo xoin" dangain jang" moo: xoo" kaid we' ciwim gari xoo" gi nang yo' Mangso agyoo: moo dang: theing ri gungthid koid byid: zi nghoid. (Nanu" gi nanu" da" xoin" dangain" jang" moo xoo" kaid ca" da:.)

¹⁴Nang gi xang: shi" myheing da" shivoo: shiloem ASEING jhang ngei" byid: wa shid re" ci: ri" lang" lug lheing: moo gyeig zi anghoid lang" thung" phei" lho: ngei" byid: wa zi nghoid.

¹⁵Houg moo zhainloin: xu: yo' nam pyo: ja: bo kaid lung: wa zi nghoid.

¹⁶Khainjung phoo gi cen: moin" dayham" yo' xu: ri yu wigi khab yu bye: da" alhoo: khyo" nghe' ngei" byid: wa zi nghoid. ASEING ri ngei" byid: da" zoo: shug xoin" khyo" nam pyo: ja: dangain" ri we' ngei" byid: wa zi nghoid.