Read Lashi XOIN" NGEI" 21 Bible Online

XOIN" NGEI" 21 - Lashi bible

XOIN" NGEI" 21

¹ASEING gi Moshe ri Arun da" khainjung yiri tid kyoo" wa shid re" amyeing" byid: zigi «Khainjung phoo gi nya: bidnoem seing" cang" shid: uri shid: pui moo: bo loem" khyo" wigi khainjung phoo gi nyang: nya: gung ri thung" khyo" ayung" alho' age koid yu nghoid da:.

²Nghoid loug we' nya: myhi'- nya: phoo- nya: zoo: myiyi:- yuggi- nya: mang: nya: nhung" anghoid lang" nya: yhoem: moo nyid da" ikoin deungkhu: avang shi" da" nhammoo" shid: jang" moo: yhe: bo loem" rigi thung" khyo" ayung" alho' abui" nghoid da:.

⁴Nyang: gi lo, xo' khyo" wigi nyang: yo' bidnoem du mo, shid: jang" moo nyang: nya: gung ri ayung" alho' age bui" nhang: nghoid da:.

⁵ «Khainjung phoo gi kougshu: nyid khyoo: ri ci: shug wa shid re" nya: vhuloem mo xam: joem ri age yed: pyam- nhoid mei: age phyed feing pyam anghoid lang" nya: gung mo shoo" ri age yham" khang" wa.

⁶Nyang: gi gyeung" shang: ca" ziyo' nga" myeing ri we' aphoug" akhyoid age bui" nhang:. Nyang: gi ngoo ri zoo: noem xoin" ngei" byid: wigi gyeung" shang: ca" da:.

⁷Khainjung dayug gi shava myhi bue" yu" bye: su: ri we' zoomyi: gyeing" anghoid lo: su: ri we' yuggi yo' gang: nyid shau" su: ri we' lo, age xo' yu nghoid da:. Nyang: gi gyeung" shang: yug nghoid.

⁸Byumyu" yigi khainjung phoo ri gyeung" shang: yug khyo" myid soin: yu ca" da:. Ciwim gari: nyang: gi ngoo ri zoo: noem xoin" ngei" byid: su: nghoid. Ngoo gi ASEING nghoid. Ngoo gi gyeung" shang: su: nghoid wigi nga" byumyu" yiri we' gyeung" shang: nhang: su: nghoid.

⁹Khainjung phoo da" nya: myiyi: zoo: gi shava myhi' koid nghoid rigi nyang: gi nya: phoo ri sho' phu" nhang: su: nghoid. Nyang: ri myi: wigi nghe' said pyam wa zi nghoid.

¹⁰«Khainjung moo" gi nya: vhuloem moo: mainkaid xu: foid gyoin: zi kham yu bye: ziyo' khainjung byimi void wa shid re" shugbyid: too" bye: zi nghoid yoomo nyang: gi kougshu: ziri ci shug wa khyoo" nya: xam: ri akyo' shang: loo: age too"- nya: byimi ri age lang: ceig wa.

¹¹Nyang: gi ngoo ri shugbyid: too" bye: su: nghoid wigi nga" gyeung" shang: da" Zoem" mo thu lo" lho: nyang: gi nya: phoo nghoid nghoid nya: myhi' nghoid nghoid byu dayug yug shid: jo, da" yhoem: khoug: khyoo: vang yhe: khyo" wigi nyang: nya: gung ri thung" khyo" ayung" alho' bui" nhang: ziyo' nga" gyeung" shang: da" zoem" ri we' aco' ajhoid age koid nghoid da:.

¹³Nyang: gi zoomyi: gyeing" ri lo, xo' yu wa nghoid da:.

¹⁴Cougmoo" ri we' yuggi yo' gang: nyid shau" da" myiyi: ri we' shava myhi' ri we' lo, age xo' yu nghoid da:. Nyang: gi nyang: nya: akung: mo zoomyi: gyeing" ri kyeing" lo, xo' yu wa zi nghoid.

¹⁵Hougsu" anghoid ri gyeung" shang: eung: da" nya: zoo: yigi thung" khyo" ayung" alho' mo, nghoid ri" wa. Ngoo gi ASEING nghoid wigi nyang: ri khainjung moo" khyo" ngoo gootu: khyen: kho' too" bye:» ga: tid.

¹⁶ASEING gi Moshe ri

¹⁷Arun ri tid kyoo" wa shid re" amyeing" byid: zigi «Re" da" amyed ashen yi mo gung du: yoin" bang: hang" nghoid loug we' nga" shid re" zoo: noem xoin" age ngei" byid: wa. He: khyoo: ri ju" loo wa da" ayo, akhyeing: dangain" mo koid ca" da:.

¹⁸Gung shoo" ca" bang: nghoid da" myo, jed- khyid: gyau:- myonhoo: byo, yug- gung shoo" ajoeb yug-

¹⁹khyid: gyau: lo, gyau: yug-

²⁰dang goug" yug- gung leung" yug- myo, noo no yug anghoid lang" manggam dab yug- Unug hang" nghoid loug we' xoin" age ngei" byid: nghoid da:.

²¹Khainjung Arun da" amyed ashen yi gung du: yoin" su: hang" nghoid loug we' Ngoo ri zoo: noem xoin" ayo" byid: wa zi nghoid da:.

²²Houg yhang: te" yug gi ngoo ri ngei" byid: da" gyeung" shang: zoo: noem xoin" yo' gyeung" shang: thang zoo: noem xoin" joem ri ge zo: da:.

²³Nghoid loug we' nyang: gi gung shoo" ca" su: nghoid yoomo gyeung" shang: da" yab khyo' pain' ruang: yo' phoin: khyoo: ayo" tain" yhi: wa zi nghoid. Nyang: gi gyeung" shang: da" jonu" joem ri ayung" alho' ayo" koid wa zi nghoid. Ciwim gari: ngoo gi ASEING nghoid wigi ngoo hau: joem ri gyeung" shang: nhang: too" bye:».

²⁴He: zigi Moshe wigi Arun- Arun da" nya: yuggi zoo: yi yo' Israela byumyu" dangain" ri tid kyoo" byid: bye:.