Read Lashi XOIN" NGEI" 23 Bible Online

XOIN" NGEI" 23 - Lashi bible

XOIN" NGEI" 23

¹ASEING gi Moshe ri

²Israela byumyu" yigi noku wa shid re" zheing: foem da" uri noku thung" pui yo' sen: da" vhoo: mo thung" ri: joem ri byid: too" bye:.

³ Nanu" gi nanu" nya: moo" koid wa shid re" khyug nyid" yo" da:. Nghoid loug we' nyhed nyid" nyid" gi Dougno: Bidnyid- doug no yu da" bidnyid nghoid ein: ziri boin: nyid ge'. Hau: nyid ri moo" age zei: nghoid loug we' noku ku wa shid re" zeing foem: nyid ca" da:. Nanu" khamoo: nyid nyid Dougno: Bidnyid gi ASEING da" bidnyid nghoid.

⁴Vhoo: moo: tid to" da" pui" joem ri ayo, tu' to" uri tid pyoo: byid: ge'.

⁵ ASEING ri phoug" tab ngi: shab byid: khyo" koid da" lhid: kaid pui" ri lhammoo" xang: shi" khyab daxe: myid: nyid" ein: nyid" bidvang zoo" mo koid shid" ge'.

⁶ Daxe: wim: nyid" nyid" rigi doocid akaid da" zooyho' zoo: pui" ri koid shid" wigi nyhed nyid" ju" sho' doocid" kaid lho: koid to" da" zooyho' ce: ja: ri we' nanu" age zoo: wa.

⁷Hau: bidnyid joem mo xang: shi" nyid" ri noku ku wa shid re" zeing: foem: nyid wa zi nghoid wigi nanu" nyid" khang" nyid" zei: da" moo" ri age zei: wa zi nghoid.

⁸Hau: nyhed nyid" moo: nanu" da" zoo: noem xoin" ri ASEING jang" moo shugbyid: ge'. Hau: nyhed nyid" ein: nyid" ri noku ku wa shid re" dalheing: doem zeing: foem: nyid ge'. Nanu" nyid" khang" nyid" zei: da" moo" ri agi zei: wa zi nghoid.

⁹ASEING wigi nanu" ri byid: wa zi nghoid da" Mungdain: khyoo: ju" vang yhe: lho: nanu" shivoo: ri yhoem" yu lang" xang: shi" da" shivoo: deing: ri khainjung pho jang" khyoo: ci: yhi: ge'.

¹¹Nanu" da" xoin" ri lhoem: kham: yu zi shau" wa shid re" nyang: gi hau: ziri gooki lid da" xoin" khyo" ASEING ri shugbyid: wa zi nghoid. Khainjung phoo gi hau: ziri Dougno: Bidnyid da" thang: nyid" ri shugbyid: wa zi nghoid.

¹²Shivoo: xoin" ri nanu" shugbyid: da" bidnyid moo: noo abo da" dazain byeung" yang loo: nu" dadu: ri we' nghe' ngei" xoin" khyo" xoin" ngei" byid: wa zi nghoid.

¹³Nanu" gi houg: yo' dage" zhainloin: xu: yo' lheug to" da" cen moin" dajoid: jain" ri zoo: noem xoin" khyo" shugbyid: wa zi nghoid. He: xoin" da" shoem: gi ASEING ri ngei nhang: wa zi nghoid. Nanu" gi houg yo' dage" zabyid yhid: xoin" eig parheing" ri we' shugbyid: wa zi nghoid ago".

¹⁴He: xoin" joem Mangsoo jang" moo ayhe: bain shugbyid: byid: gi gug seig nghoid nghoid- gug shen" nghoid nghoid zooyho' nghoid nghoid- dajhi' we' azoo: goo". He: thung" tarha" joem gi ju" loo wa da" ayo, dangain" moo: nanu" da" amyed ashen yi dangain" cang yhe: loo" wa da" tarha" nghoid.

¹⁵ Nanu" da" shivoo: deing: ri ASEING jhang nanu" shugbyid: da" Dougno: Bidnyid da" thang: nyid" mo zi nyhed lheing: ein: lheing: da" Dougno: Bidnyid byeung" sho' nghab ge'.

¹⁶Nyhed lheing: ein: lheing: da" Dougno: Bidnyid da" thang: nyid" nghoid da" wim: xi: nyid" ein: nyid" ri shivoo: seig gootu: ASEING ri shugbyid: wa zi nghoid.

¹⁷Deungkhu: khang" moo" gooki lid jhungshug khyo" zooyho' eig loem: ri yu lo wigi ASEING ri shug byid: wa zi nghoid. Zooyho' khang" moo" ri cen: moin" dajoid: jain" ri doocid" yo' zooyho' koid wigi xang: shi" yhoem" yu da" shivoo: shiloem xoin" khyo" ASEING ri shugbyid: wa zi nghoid.

¹⁸Houg: lho: shava byu yigi zooyho' yo' dage" noo abo da" dazain byeung" yang nu" nyhed du:- nuloo: dadu:- yang loo: eig du: ri shugbyid: wa zi nghoid. Nyangnu" gi nghe ngei" xoin" khyo" shivoo: shiloem xoin" yo' zabyid yhid: xoin" ri dage" ASEING ri ngei" byid: wa zi nghoid. He: xoin" da: shoem: gi ASEING ri ngei nhang: wa zi nghoid.

¹⁹Yooboo khyoid xoin" khyo" coidbaid loo: dadu: yo' zoem" khau: xoin" khyo" dazain byeung" da" yang loo: eig du: ri we' ngei" byid: wa zi nghoid.

²⁰Khainjung phoo gi khainjung yi shid re" gooki lid jhungshug khyo" zooyho' yo' hau: yang nu" eig du: ASEING ri ngei" byid: wa zi nghoid. He: ngei" byid: xoin" joem gi gyeung" shang: da:.

²¹Hau: nyid" ri nanu" da" moo" ciri: we' azei: goo". Nghoid loug we' noku coung" nghei wa shid re" dage" zeing: foem: nyid ge'. Ju" loo wa da" ayo, dangain" nanu" da" amyed ashen yigi nyangnu" khamoo: nyid nyid he: thung" tarha" ri cang ca" ago".

²² Nanu" yoo moo: shivoo: shiloem yham" yu uri yoo gyoem: mo shivoo: shiloem ri ayham" yu goo". Yhoem" khyo' to" da" shivoo: ri we' adoem yhe: koid: goo". Hau: joem ri sho" jhen: bang: yo' tungbau byu yi shid re" teing too" byid: kho' ge'. ASEING gi nanu" da" Mangsoo nghoid da:.

²³Lhammoo" nyhed khyab ein: khyab xang: shi" nyid" ri gooki lid no: nyid da" bidnyid khyo" cang nyid wigi laboo" moid thui: myeing lang" noku wa shid re" dage" re" zeing: foem: nyid ge'.

²⁵ASEING ri zoo: noem xoin" ngei" byid: wigi nanu" da" moo" ciri: we' azei: goo".

²⁶ Lhammoo" nyhed khyab ein: khyab daxi nyid" ein: nyid" gi shava byu yi da" yooboo ri khyoid pyam byid: wa shid re" thung" ri cang wigi dazain dalheing: koid da" bidnyid nghoid. Hau: bidnyid ri ci: we' azoo: goo". Noku wa shid re" dage" zeing: foem: nyid ge'. Houg: lho: ASEING ri zoo: noem xoin" ri shugbyid: nyid ge'.

²⁸Hau: nyid" ri ce: moo" azei: goo"- ciwim gari: hau: bidnyid gi yooboo joem ri yu pyam byid: wa shid re" thung" ri cang wigi koid da" bidnyid nghoid da:.

²⁹Hau: bidnyid moo: daja: ja: ri zo: da" yug hang" ri nghoid loug we' nyang: ri Mangso da" byu dayug khyo" myid soin: yu loo: wa zi anghoid.

³⁰Hau: nyid" ri dayug yug moo" zei: nghoid rigi nyang: ri ASEING wigi said pyam wa zi nghoid.

³¹Nyangnu" amyed ashen yi dangain" gi nyangnu" khamoo: nyid nyid he: thung" tarha" joem ri ci: wa zi nghoid.

³²Hau: lhammoo" khyab goug nyid" nyid" bidvang yo, mo daxi: nyid" nyid" bidvang yo, ju" sho' he: nyid" ri gooki lid Dougno: Bidnyid khyo" cang nyid wigi hau: ayo, gyoo: moo: ci: we' age zoo: nghoid da:.

³³ Zoem" pui" ri lhammoo" nyhed khyab ein: khyab daxe: wim: nyid" mo shid" wigi xo' lho: nyhed nyid" ju" sho' koid wa zi nghoid.

³⁵Hau: bidnyid mo xang: shi" nyid" ein: nyid" mo noku wa shid re" dage" zeing: foem: nyid wigi nanu" da" moo" ciri: we' azei: goo".

³⁶Hau: nyhed nyid" moo nanu" gi nyid" khang" nyid" zoo: noem xoin" ri shugbyid: wa zi nghoid. Shed nyid" ein: nyid" ri noku wa shid re" dalheing: doem zeing: foem: wigi zoo: noem xoin" ri shugbyid: wa zi nghoid. Hau: bidnyid gi noku wa shid re" nghoid wigi nanu" gi moo" age zei: wa zi nghoid.

³⁷(Hau: joem gi noku wa shid re" dage" zeing: foem: re" wigi ASEING ri nanu" ngi: to' ziyo' nyid" khang" nyid" ca" da" zoo: noem xoin"- nghe' ngei" xoin"- shivoo: shiloem xoin"- xoin" du: ngei" xoin" yo' zabyid yhid: xoin" joem ri shugbyid: da" laloem lakhoug: pui" joem nghoid da:.

³⁸Main: main: koid da" he: pui" joem gi Dougno: Bidnyid moo loung: lho: koid da" pui" joem nghoid. Hau: xoin" joem gi nanu" da" main: main: byid: da" jhungshug joem thang" cab ri pyeing byid: da" nanu" xoin" joem yo' nanu" ASEING ri byid: da" nanu" myid bo xoin" joem moo: loung: wigi shugbyid: da" xoin" joem nghoid da:.)

³⁹Nanu" yoo moo: bain yhoem" yu lang" lhammoo" nyhed khyab ein: khyab daxe: wim: nyid" ein: nyid" mo shid" lho: he: pui" ri nyhed nyid" byeung" sho' koid ge'. Xang: shi" nyid" gi gooki lid da" dougno: yu da" bidnyid nghoid.

⁴⁰Hau: bidnyid ri nanu" da" shigam joem mo ge thang da" shi" dayham" ri yo' thab gam mo akung: joem afu mung" da" seiggam joem mo akung: joem ri cu: yu wigi nanu" ASEING Mangsoo ri phau" myang: ngi: shab byid: wa shid re" noku thung" pui" ri koid shid" ge'.

⁴¹Hau: pui" ri nyhed nyid" byeung" sho' koid ge'. He: thung" tarha" gi ju" loo wa da" ayo, dangain" moo nanu" da" amyed ashen yi cang yhi: wa da" thung" tarha" nghoid.

⁴²Israela byumyu" dangain" bang: gi zoem" khoug: moo nyhed nyid" byeung" sho' nyid nyid wa zi nghoid.

⁴³Houg: lang" ASEING gi nanu" ri Egutu mung" mo shu" thu lo da" uri Israela byumyu" yiri bid shoem zoem" khoug: moo: nyid nhang: lo da" khyoo: ri nanu" amyed ashen yi si' wa zi nghoid. Nyang: gi nanu" ASEING Mangsoo nghoid.

⁴⁴Hid su" khyo" wigi Moshe gi Israela byumyu" yiri ASEING ri phau" myang: ngi: shab byid: wa da" noku thung" pui" joem ri koid lho: cang nyid wa da" thung" tarha" joem ri byid: da:.