Read Lashi XOIN" NGEI" 25 Bible Online

XOIN" NGEI" 25 - Lashi bible

XOIN" NGEI" 25

¹ASEING gi Sina boem moo: Moshe ri dang: ji wigi

²Vhoo: moo: tid to" da" thung" ri: joem ri Israela byumyu" yiri byid: wa shid re" amyeing" byid: bye:. ASEING wigi nanu" ri byid: wa da" mungdain: khyoo: nanu" ju" vang yhi: lang" nyhed zain ein: zain khang" moo" mougmyid moo: shivoo: ashoo" loo: koid khyo" wigi nanu" gi ASEING ri phoug" tab ngi: shab byid: wa zi nghoid.

³Nanu" gi khyug zain akhoug: moo: nanu" yoo moo shivoo: sho"- zabyid khyam: ri cu: shang: byid:- shivoo: shiloem ri zheing" yu goo" wa zi nghoid.

⁴Nghoid loug we' nyhed zain ein: zain gi mougmyid shid re" dazain goin" noo: wa da" zain nyid ASEING ri shugbyid: to" da" zain nyid nghoid da:. Nanu" yoo cang shivoo: ashoo" goo"- nanu" zabyid khyam: cang acu: shang: byid: goo".

⁵Byu wigi ashoo" lho: nyang: nyang: kyeing" za: yug da" gug rilang" ayham" yu goo". Acu: shang: to" da" nanu" zabyid khyam: joem mo zabyid shi" joem ri we' aphyo' zheing" yu goo". Hau: zigi mougmyid shid re" dazain goin" noo: wa da" zain nyid nghoid da:.

⁶Hau: zain ri mougmyid moo shivoo: shiloem ashoo" sho' nghoid loug- hau: zigi nanu" shid re" we' nanu" join yi shid re" we' nanu" da" vhoo" kung: yi shid re" we' nanu" yo' dage" nyid nyid da" tungbau byu yi shid re" we'

⁷Nanu" da" yhoem: gougnyhoug joem shid re" we' siyoo gougnyhoug lam" joem shid re" we' zoo: noem bue" loo wa. Houg moo: bui" thu re" da" ja: khang" moo" ri zoo: wa zi nghoid.

⁸Nyhed zain nyhed lheing: nghab ri dangain" gi myid: xe: goug: zain nghoid da:.

⁹Hau: thang: lhammoo" nyhed khyab- daxi nyid" ein: nyid" gi yooboo khyoid byid: da" bidnyid nghoid wigi mungdain: goin" moo: ju" sho' laboo" moid wa shid re" byu nhang: kaid ge'.

¹⁰Hid khyo" wigi nanu" gi wim: xi: zain ein: zain ri gootu: to" to" lho: mungdain: moo nyid da" mo, dangain" shid re" loid byoin wa khyoo: tid pyo: fu" kaid wa zi nghoid ago". He: zain gyoo: moo: oung" pyam bye: da" ziyoo dangain" ri xang shi" seing: da" yug anghoid lang" nya: amyed ashen yiri doem tau" byid: wa zi nghoid ago". Houg: lho: join khyo" oung" pyam shau" da" yug hang" ri nghoid loug- nya: yhoem: khyoo: doem tau" byid: ca" da:.

¹¹Nanu" gi nanu" da" yoo joem moo: shivoo: age shoo" anghoid lang" nyang: nyang: za: yug re" da" shivoo: shiloem joem ri age yham" yu. Acu: shang: to" da" nanu" zabyid khyam: mo zabyid shi" joem ri age phyo' zheing" yu goo" wa zi nghoid.

¹²Nanu" shid re" hau: dazain goin" zi younglho' nyid wa zi nghoid. Nanu" gi yoo joem mo nyang: nyang: za: thu lo da" gu: ri za: zoo: wa zi nghoid ago".

¹³He: zain khoug: moo: oung" pyam bye: da" ziyoo dangain" ri xang: shi" seing: da" yug ri doem tau" byid: wa zi nghoid.

¹⁴Houg: yoomo nanu" gi mougmyid ri nanu" da" Israela mang: nhung" phoo ri oung" byid: ri anghoid lang" nyangnu" mo mougmyid ri qei yu da" uri adeing amain" khyo" akoid goo".

¹⁵Mougmyid aphoug" ri loid byoin nhang: da" zain void aju" shi" da" zain nyid gyoo: moo: hau: mougmyid mo thu da" shivoo: shiloem joem ri cang lho: aphoug" gu ri phyed wa zi nghoid.

¹⁶Zain nyid myo: nghoid rigi aphoug" je myoo: wa nghoid loug we' zain nyid nheing: nghoid rigi aphoug" nheing: wa zi nghoid. Ciwim gari: oung" zigi hau: yoo mo thu da" shivoo: shiloem ri cang zi nghoid da:.

¹⁷Israela mang: nhung" yiri amhoug zoo: goo"- nanu" ASEING Mangsoo ri tam" gyoo: nyid ge'.

¹⁸ASEING da" tarha" joem yo' amyeing" dang: dangain" ri cang ge'. Houg: lang" nanu" gi hau: mungdain: moo goug: nyu: tung" yo" nyid wa zi nghoid.

¹⁹Mougmyid gi gugzoo meiloem: ri zei: byid: wigi nanu" dangain" gi nanu" vho: zi shau" zoo: wa zi nghoid lho: goug: nyu: tung" shau" nyid" goo" wa nghoid.

²⁰Nghoid loug we' byu dayug gi hau: nyhed zain ein: zain gyoo: moo: yoo joem mo gug zoo meiloem: ashoo"- hau: joem ri ayham" zheing" yu ri cizoo: wa lug ga: lhung myid goo" wa.

²¹ASEING gi khyug zain zain moo mougmyid ri mainkaid byid: wigi hau: mougmyid gi eig zain shid re" zoo: noem gi" sho' zei: byid: nhang: wa zi nghoid.

²²Nanu" gi shed zain ein: zain moo nanu" khyam: yoo joem moo shivoo: shiloem: kaid uri khyug zain gyoo: moo yham" yu to" da" gug zoo meiloem: ri nanu" hau: zain moo sho" da" shivoo: shiloem: doem yham" yu da" ayo, ju" sho' dazo: nyid shigoo" wa nghoid.

²³Nanu" da" mougmyid ri apyaid atoo: byid: pyam khyo" age oung" zoo: wa. Ciwim gari hau: ziri nanu" seing: nyid zi anghoid. Hau: ziri Mangsoo daseing:- nanu" gi hau: ziri seing: ci: wa da" akhang" yo" da" tungbau byu yi yhang: ti" danghoid.

²⁴Mougmyid ri oung" uri xang: shi" da" mougmyid seing: nyang: doem yo" qei da" akhang" jo, ein: ziri si ca".

²⁵Israela byu dayug yug sho" jhen: wigi nya: mougmyid oung" wa nghoid rigi hau: ziri nyang: yo' jhang thang da" bidnoem dayug doem qei yu ca" wa zi nghoid.

²⁶Hau: ziri qei wa da" bidnoem ayoo" yug gi thang: ri nyang: nyid gi yab ge lo wigi nyang: hau: ziri doem qei yu wa ngei tham: sho' yoo" bye: ein: shang.

²⁷He: moo" moo: nyang: gi he: ziri qei su: ri thang: lheing: da" doem tau" byid: da" zain void gyoo: mo deing shi" da" zain nyid shid re" doem xo' lung: byid: ca" wa nghoid. Hau: uri nyang: gi nya: mougmyid ri khasu" nghoid loug we' doem yo" yu da:.

²⁸Nghoid loug we' nyang: gi hau: mougmyid ri doem qei yu wa shid re" ngei atham: nghoid rigi hau: ziri qei yu too" su: da" lo, khoug: moo: thang: zain doem tau" byid: da" zain void ju" sho' to" too" shi" wa nghoid. Hau: zain moo hau: ziri xang: shi" seing: su: ri doem tau" byid: ca" da:.

²⁹Byu dayug gi vang khyam: koid to" voomoo" khoug: mo yhoem: ri oung" nghoid rigi nyang: gi hau: ziri oung" da" ayo, mo dazain byeung" da" ayo, agyoo: moo hau: ziri qei yu wa shid re" akhang" yo" da:.

³⁰Nghoid loug we' nyang: gi hau: zain khoug: moo ayo" doem qei yu nghoid rigi doem qei wa da" akhang" soem" wa zi nghoid. Houg: lho: hau: yhoem: gi qei yu su: yo' nya: amyed ashen yi da" apyaid atoo: seing: da" jonu" bue" loo" wa zi nghoid. Hau: ziri doem tau" byid: da" zain void ri we' ayo" tau" yu loo: wa.

³¹Nghoid loug we' vang khyam: abo da" voogung joem mo yhoem: joem rigi yoo joem yhang: ti" yo" soin: yu wa. Xang: shi" da" yhoem: seing gi hau: joem ri doem qei yu wa da" akhang" yo" wigi nyangnu" gi doem tau" byid: da" zain void moo: doem tau" byid: wa zi nghoid.

³²Nghoid loug we' Levi byu yigi voomoo" khoug: mo nyangnu" da" ziyoo joem ri kha" ayo, ri nghoid loug we' qei yu wa da" akhang" bo da:.

³³Voomoo" daloem: mo yhoem: daloem ri Levi byu yi oung" zo: wigi doem aqei yu nghoid rigi hau: zigi doem tau" byid: da" zain void ri doem tau" byid: ca" wa zi nghoid. Ciwim gari: nyangnu" voomoo" khoug: mo Levi yi seing: da" yhoem: joem gi Israela byumyu" yi akhoug: moo: nyangnu" seing: da" ziyoo nghoid da:.

³⁴Nghoid loug we' Levi byu yi da" voomoo" joem ri lheing khoem to" da" coung" mhain" yoo rigi khanham we age oung" wa. Hau: zigi nyangnu" da" apyaid atoo: mo ziyoo nghoid.

³⁵Re" nam moo nyid da" Israela mang: nhung" dayug gi sho" jhen: lo wigi nyang: nya: voem: dau ayo" khu: loo: nghoid rigi re" nam moo nyang: xo' lho: yo" nyid wa shid re" vhoo" kung: dayug khyo" nyang: ri lhung: yu wigi nyang: ri pang" thoug byid: ca" da:.

³⁶Nyang: ri atu" amyaid asang:. Mangsoo ri phau" myang: tam" gyo: wigi re" da" Israela mang: nhung" phoo ri anam moo: nyid nhang: ca" wa zi nghoid.

³⁷Nyang: ri jhid" byid: da" ngei ri atu" amyaid asang:. Houg: lho: nang nyang: ri oung" byid: da" zoo: noem dang moo: atu" amyaid ayu goo".

³⁸He: zigi nanu" ri Khanan mung" byid: wa shid re" yo' nyang: gi nanu" da" Mangsoo bui" nyid wa shid re" Egutu mung" mo nanu" ri shu" thu lo da" nanu" ASEING Mangso da" amyeing" dang: nghoid da:.

³⁹Re" nam moo nyid da" Israela mang: nhung" dayug gi gye" sho" jhen: wigi nyang: nya: gung ri join khyo" nang ri re" oung" byid: nghoid rigi nang gi nyang: ri join moo" age zei: nhang: wa zi nghoid.

⁴⁰Nyang: gi vhoo" kung: dayug khyo" nang yo' dage" nyid wigi doem nhang: kaid da" zain nyid ju" sho' nang ri dei byid: wa zi nghoid.

⁴¹Hau: ayo, ri nyang: yo' nya: zoo: yi re" jang" mo thu lo" lho: nya: da" yhoem: byu yi jang" khyoo: yo' nya: phoug" phyid" yi da" mougmyid khyoo: doem tau" loo" wa zi nghoid.

⁴²Israela byumyu" yigi ASEING da" join nghoid boem ziyo' nyang: gi nyangnu" ri Egutu mung" mo shu" thu lo da:. Nyangnu" gi join koid wa khyo" age oung" wa.

⁴³Nyangnu" ri thain: thain: azoem" khau: goo"- nanu" ASEING ri phau" myang: tam" gyo: nyid ge'.

⁴⁴Nang join vho: nghoid rigi nanu" da" lheing khoem moo: nyid da" byumyu" yi jang" mo nyangnu" ri yo" qei yu wa zi nghoid.

⁴⁵Nang gi nanu" akhoug: moo: nyid boem da" tungbau byu yi da" zooshang: yiri we' yo" qei yu da:. Houg yhang: te" nanu" mung" moo khu: da" zooshang: yigi nanu" re" yo" ge bui" wigi

⁴⁶nang gi nyangnu" ri re" yuggi zoo: yi shid re" mid khyo" ge too" kho' da:. Nyangnu" gi houg bang: ri nyangnu" kangso' dei nyid da" ayo, byeung" sho' dei byid: nyid wa zi nghoid. Nghoid loug we' nang gi re" Israela mang: nhung" phoo ri thain: thain: ce: ja: moo: we' anhang: zoo: goo".

⁴⁷Nang yo' dage" nyid da" tungbau byu dayug gi yoo" zoo: yoo" shug lo lho: Israela mang: nhung" phoo dayug sho" jhen: lo" wigi nya: gung nyang: join dayug khyo" hau: tungbau phoo anghoid lang" hau: yug da" yhoem: byu dayug ri oung" byid: ein: shang.

⁴⁸Nyang: oung" zo: thang: ri nyang: gi doem tau" qei yu wa da" akhang" yo" jo, ashi". Nya: mang: nhung" yi dayug yug anghoid lang"

⁴⁹Nya: laid anghoid lang" nya: yhoem: vhoo: yhoem: tho' mang: nhung" anghoid lang" gootu: nyang: yo' jhang da" bidnoem seing" cang" dayug yug gi nyang: ri doem yo" tau" qei yu da:. Anghoid lang" nyang: nyang: ngei tham: sho' yo" kung: nghoid rigi nyang: gi nyang: nya: da" loid byoin khyoo: ri yo" qei yu da:.

⁵⁰Nyang: gi nyang: ri qei yu da" yug yo' sham: goo" ca" wigi nyang: nya: gung ri oung" pyam da" ayo, mo zi loid byoin nhang: da" zain void ju" sho' da" zain nyid joem ri nghab wigi vhoo" kung lang: jhang phoug" ri ayang: koid lho: nya: da" gu ri byid: pyam ca" da:.

⁵¹Nyang: gi zain nyid ri ayang: koid lho: vhoo" kung: khyo" ngho" zi shau" nghoid rigi zain nyid khanhoo' deing shi" ein: ziri cang wigi phoug" soin: lho: qei da" aphoug" ngei ri doem khyau" byid: ca" da:. Nya: yhoem: seing gi nyang: ri thain: thain: age nhang: zoo: nghoid da:.

⁵²

⁵³

⁵⁴Nyang: gi hau: khyoo: joem mo dakhyoo: khyo" we' aloid byoin nghoid rigi nyang: yo' nya: zoo: yiri doem ju" loo wa da" theing: yu zain ri loid byoin nhang: kaid ca" da:.

⁵⁵Israela byu dayug gi apyaid atoo: join age bui" wa. Ciwim gari: Israela byumyu" yigi ASEING da" join yi nghoid ago". Nyang: gi nyangnu" ri Egutu mo shu" thu lo da:. Nyang: gi nyangnu" da" ASEING Mangsoo nghoid da:.