Read Lashi XOIN" NGEI" 26 Bible Online

XOIN" NGEI" 26 - Lashi bible

XOIN" NGEI" 26

¹ASEING gi «No' wa shid re" soolhoo: joem yu phara" alhoo:- lug zeingboung: azhug goo"- lugzeing akyung" goo". Ngoo gi nanu" ASEING Mangsoo nghoid.

²Noku thung" pui" joem ri koid nyid wigi ngoo ri noku da" joyoo joem ri phau" myang: nyid ge'. Ngoo gi ASEING nghoid.

³Nanu" nga" tarha" joem yo' dakhyo" nyid lho: nga" amyeing" dang: ri cang nghoid rigi

⁴Ngoo gi jo eung: da" ayo, ri moug: voo nhang: wa. Houg: lang" mougmyid gi shivoo: shiloem yug re" lho: agam joem moo: ashi" zei: wa zi nghoid.

⁵Nanu" da" gugzoo meiloem joem gi gye" gi yoomo zabyid shi" phyo' yu wa ayo, ju" rilang" nanu" gi gugzoo meiloem joem ri yham" yu nyid shi" wa. Houg: lho: nanu" gi gugzoo meiloem joem doem shoo" wa ayo, ju" rilang" zabyid shi" daphyo' yu nyid shigoo" wa. Nanu" zoo nau zi dangain" yo" yu wigi nanu da" mungdain: moo goug: nyu: tung" yo" nyid wa zi nghoid.

⁶Ngoo gi nanu" mungdain: ri ngei pyoo: yug yoo nhang: wigi nanu" gi hang" ri we' agyug ca" loo: yo" yhoeb wa zi nghoid. Ngoo gi nanu" mungdain: khoug: mo gyoug ca" gougnyhoug joem ri yu pyam byid: wa wigi houg moo meing: byo, zi ajo, loo: wa.

⁷Nanu" gi nanu" da" gyivoo joem ri oung: pyam boem wa zi nghoid.

⁸Nanu" wim: yug gi dashoo: yug ri yo" oung: pyam wa. Dashoo: yug gi damoin yug ri yo" khaid oung: pyam wa.

⁹Ngoo nanu" ri mainkaid byid: wigi nanu" ri zooshang: myoo: sho' byid: wa. Ngoo nanu" yo' koid to" da" dang: theing ri nga" shoid mo ziri ngoo cang nyid wa.

¹⁰Nanu" da" shivoo: shiloem yham" yu zigi sung myo: yoomo hau: joem gi dazain goin" deing jo, wa zi nghoid. Houg: lang" nanu" gi shivoo: shiloem aseig kaid wa joyoo ajo, yoomo deing jo, da" shivoo: shiloem xoug" joem ri thoid pyam ca" ri" goo" wa.

¹¹Ngoo gi nga" da" younglho' zoem" jo, da" nanu" akhoug: moo: nyid wa. Ngoo gi nanu" jang" mo khanham we' aphug lo" byug wa.

¹²Ngoo gi nanu" yo' dage" nghoid nyid wa. Ngoo gi nanu" da" Mangsoo nghoid wa. Houg: lho: nanu" gi nga" byumyu" yi bui" loo: goo" wa.

¹³Ngoo gi nanu" ri join khanham we' abui" loo: wa shid re" Egutu mo nanu" ri shu" thu lo da" nanu" ASEING Mangsoo nghoid. Ngoo gi nanu" ri doin: zeug to" da" yoem: so' ri khyau" pyam wigi nanu" vhuloem ri nghang ci: lho: ngoo nanu" ri khyoo: soo" nhang: bye:» ga: tid.

¹⁴ASEING gi «Nanu" nga" amyeing" dang: ri atam" gyoo: nghoid rigi nanu" gi yooboo dam byid: zi shau" goo" wa.

¹⁵Nanu" gi nga" tarha" yo' amyeing" dang: ri tam" gyoo: wa shid re" ngeug pyam wigi ngoo nanu" yo' koid to" da" dang: theing ri phyo' pyam nghoid rigi

¹⁶ngoo nanu" ri yooboo dam byid: wa. Ngoo gi nanu" adang moo: kyi" khyeug khyoo:- ayo" byang" da" noo phyoo"- nanu ri myo, jid nhang: da" noobau: phyoobau: bue" wigi nanu" da" kangso' joem: loo" wa da" khyoo: ri bui" nhang: wa. Nanu" gi nanu" da" shivoo: shiloem ri sho" nghoid loug we' hau: joem ri agi nhang: wa. Ciwim gari: nanu" gyivoo yigi nanu" ri oung: pyam wigi nanu" sho" to" da" shivoo: shiloem joem ri zo: pyam boem wa.

¹⁷Ngoo nanu" ri thougtheung wa houg: lang" nanu" soem" goo" wa wigi nanu" ri ngheing" mo, wigi nanu" ri vhoebkhang" loo goo" wa. Nanu" ri hang" we' akhaid loug we' nanu" gi gye" dain ziyo' tang" phang: yen" goo" wa.

¹⁸Hid su" bue" thang: rilang" nanu" nga" dang: ri atam" gyo: nghoid rigi ngoo gi nanu" da" yooboo dam ri nyhed zhang lung: loo nhang: wa.

¹⁹Ngoo gi nanu" da" nheigloem: thain:- nghoid boin: da" ziri khyau" pyam wa. Moug: avoo wigi nanu" mougmyid gi kyug lo" wigi joto' yhang: ti" thain: loo" nhang: wa.

²⁰Nanu" yoem: kaid lho: koid to" da" moo" gi nanu" shid re" akyu" abyid: wa. Ciwim gari: nanu" mougmyid gi shivoo: shiloem athu ziyo' seiggam joem gi ashi" azei: wa.

²¹Nanu" gi ngoo ri ngeug pyam wigi ngoo ri phau" myang: tam" gyoo: wa ziri ngeug pyam shi" nghoid rigi Ngoo gi nanu" yooboo dam ri nyhed zhang doem lung: byid: wa.

²²Ngoo gi nanu" phung: khyoo: gyoug pho" da" gougnyhoug joem ri nhang: kaid byid: wigi hau: joem gi nanu" da" zooshang: yiri ngaid said pyam- nanu" da" gougnyhoug ri ngaid said pyam lho: nanu" khyoomoo" joem jham" coug: youg bue" wa shid re" nanu" ri dajhi kyeing" dateing too" loo: wa.

²³He: yooboo dam dangain" thang: ri nanu" ngoo ri atam" gyoo: lho: xo' wigi ngoo ri aphoug" akhyoid koid nyid shi" nghoid rigi

²⁴Ngoo gi nanu" ri gyi koid lho: xang: shi" tho' je lid: da" yooboo dam ri nanu" atho' moo: nyhed zhang doem lung: byid: wa.

²⁵Nga" da" dang: theing ri phyo' pyam nyid yoomo ngoo nanu" ri meing byo, nhang: wigi yooboo dam byid: wa. Houg: lho: nanu" gi goem loem wa shid re" nanu" voomoo" khoug: moo zeing: foem: nyid nghoid rigi ngoo gi nanu" akhoug: khyoo: ayo" byang" ge da" noobau: phyoobau: nhang: kaid byid: wa. Houg: lho: nanu" ri nanu" da" gyivoo shidkhoin" moo soem" loo" nhang: wa.

²⁶Ngoo gi nanu" ri pang" thoug da" zoo: noem ri phyed pyam byid: wa. Houg: lang" myiyi: daxi yug gi nyangnu" ca" da" zooyho' dangain" ri koid wa shid re" zooyho' bung: myikhyoem daloem: za: daca" goo" wa. Nyangnu" zoo: noem ri kho' gam byid: ca" goo" wa. Hau: gu: dangain" ri nanu" bain zo: pyam thang: ri nanu" zoo dayoid nyid shi" goo" wa.

²⁷He: gu: dangain" bain thang: ri nanu" ngoo ri aphoug akhyoid lho: nga" dang: ri tam" gyoo: wa ngeug pyam shigo" nghoid rigi

²⁸Ngoo nheigloem: yoin ziyo' nanu" jang" khyoo: phug lo lho: xang: shi" tho' je xo: da" yooboo dam ri nyhed zhang doem xo' byid: wa zi nghoid.

²⁹Nanu" zooyoid zigi gye" dam xo: wigi nanu" nya: zoo: yiri nanu" zoo: goo" wa zi nghoid.

³⁰Bau gung joem tho' moo jo, da" nanu" da" noku joyoo ri phyo' pyam byid: wa. Nanu" da" shoem: nam pyo: ja: shugbyid: da" phoin: joem ri we' phyo' khyo' pyam byid: wigi nanu" da" shid: mang joem ri byo, gyo" jo, da" nanu" yu phara" soolhoo: joem moo du" zei pyam wa. Ngoo gi nanu" ri dam xoo: sho' yu" co' yu" ngheing" pyam wa.

³¹Ngoo gi nanu" da" voomoo" joem ri phyo' shoin wa. Nanu" da" noku joyoo ri phyo' pyam wigi nanu" da" ngei" xoin" ri we' ngeug pyam byid: wa.

³²Ngoo gi nanu" mougmyid ri gye" xo: da" khyo" bain sho' phyo' pyam wa wigi hau: ziri seing: yu go" da" gyizoo: yigi hau: phyo' sain" pyam ziri yu" dain goo" wa zi nghoid.

³³Ngoo gi nanu" adang moo: meing: byo, nhang: wa wigi nanu" ri tungbau meing: khyo: byo: sain" loo" nhang: wa. Nanu" mougmyid gi jham" coug: youg bui" byug wa. Nanu" da" voomoo" joem gi byo, yoin" jo, boem goo" wa nghoid.

³⁴Houg: lang" nanu" wigi atheing: nhang: da" mougmyid gi bain sho' theing: nyid da" zain nyid joem moo: ngei pyo: lo wa. Hau: mougmyid gi agoin agoo" yo" jo, lho: nanu" gi gyivoo yi moug: khyoo: pyoung" she: loo" shau" da" ayo, ri hau: mougmyid gi dougno: zi shau" wa.

³⁵

³⁶Pyoung" she: loo" shau" bang: nanu" ri ngoo wigi gyoug nhang: wa lho: lid wigi seig yoo moid nhoin' thui: gi nanu" ri tang" phang: yen" nhang: wa. Meing: zain: jang: moo nanu" ri hang" wigi we' akaid nghoid loug we' nanu" tang" phang: yen" goo" wa. Nanu" nam moo gyivoo anyid nghoid loug we' nanu" leung lo" boem goo" wa.

³⁷Nanu" ri hang" akaid nghoid loug we' nanu" dayug dang mo dayug zang" thung" leung boem goo" wa. Nanu" gi cite" gyi ri we' ayo" zain: boem goo" wa.

³⁸Nanu" gi pyoung" she: loo" shau" da mougmyid moo: shid: boem goo" wa. Nanu" da" gyivoo yi mougmyid wigi myhau: pyam zi shau" goo" wa.

³⁹Nanu" da" gyivoo mungdain: moo deing nyid shi" bang: nanu" dajhi kyeing" mo zi nanu" nya: da" yooboo yo' nanu" da" phoug" phyid" yi da" yooboo yoomo amyed afoo" joem: byug boem wa.

⁴⁰Nghoid loug we' nanu" da" amyed ashen yigi nyangnu" da" yooboo ri we' ngoo ri ngeug pyam thougtheung gyi koid lo da" nyangnu" phoug" phyid" yi da" yooboo joem ri yhen: yu wigi

⁴¹Ngoo ri nyangnu" jhang gyi phug koid nhang: lho: nyangnu" da" gyivo mungdain: khyoo: pyoung" she: loo" shau" nhang: wa. Lo" thang ri nanu" amyed ashen yigi nheigloem: nyhoem khyo' wigi nyangnu" gyi koid ziyo' yooboo shid re" dam ri bain kham: pyam lang"

⁴²ngoo gi Yaku- Isag- Abraham bang: yo' koid to" da" nga" dang: theing ri myid boin: wa. Hau: mungdain: ri nga" byu yiri byid: wa shid re" nga" dang: theing aseig ri doem koid wa.

⁴³Nghoid loug we' xang: shi" moo hau: mungdain: mo byu yiri yu pyam ca" da:. Houg: lang" hau: mungdain: gi bain sho' no: nyid zi shau" wa. Houg: lho: nyangnu" gi nga" tarha" joem ri yo' nga" amyeing" dang: joem ri ngeug pyam bye: da" shid re" yooboo dam ri byeung" sho' kham: yu ca" goo" wa.

⁴⁴Nghoid loug we' nyangnu" gi nyangnu" da" gyivoo yi da" mungdain: moo: nyid nyid shi" nghoid loug we' ngoo gi nyangnu" ri bain sho' ashe: pyam- aphyo' shoin pyam wa. Hougsu" koid ri nyangnu" yo' ngoo koid to" da" dang: theing gi thang lo" byug wa. Ngoo gi nyangnu" da" ASEING Mangsoo nghoid.

⁴⁵Ngoo ASEING gi nyangnu" Mangsoo bui" nyid wa shid re" nga" byu yiri Egutu mung" mo shu" thu lo da" khyo" wigi byumyu" dangain" ri nga" yoem: so' ci: shug da" uri nyangnu" phoug" phyid" yi yo' ngoo koid to" da" dang: theing ri aseig doem koid wa» ga: tid.

⁴⁶Hau: gu: dangain" gi Israela byumyu" yi shid re" Sina boem dang moo ASEING wigi Moshe ri byid: da" tarha" joem yo' amyeing" dang: joem nghoid wa.