Read Lashi XOIN" NGEI" 27 Bible Online

XOIN" NGEI" 27 - Lashi bible

XOIN" NGEI" 27

¹ASEING gi Moshe ri

²Israela byumyu" yi shid re" vhoo moo: tid to" da" thung" tarha" joem ri byid: da:. Byu dayug yug ri ASEING jhang shugbyid: wa ein: gooki lid da" thang" cab to" to" nghoid ri hau: yug gi tarha" vang da" azhang ri ci: wigi vhoo: moo: tid to" da" aphoug" ngei ri byid: lho: yo" loid byoin da:.

³Soem" xi: zain mo khyug xi: zain agyoo: mo -Yuggi yigi ngei 50 pyi" -Myiyi: myhi' yigi ngei 30 pyi" -Wim: zain mo eig xi zain agyoo: mo yuggi yigi ngei 20 pyi" -Zoomyi: yigi ngei 10 pyi" -Wim: zain vhoo: mo yuggi nu" yigi ngei 5 pyi" -Myiyi nu" yigi ngei 3 pyi" -Khyug xi: zain dang mo yuggi yigi ngei 15 pyi" -Khyug xi: zain dang mo myiyi: yigi ngei 10 pyi" byid: ca" da:.

⁸Thang" cab to" da" byu dayug gi ke' to" da" aphau" ri byid: wa shid re" gye" sho" jhen: nghoid rigi nyang: gi byu hau: yug ri khainjung pho jang" shu" yhe: wigi khainjung phoo gi byu hau: yug yo" byid: wa nhoo' ri cang wigi nyhoem: da" phoug" ri ki' byid: wa zi nghoid.

⁹ASEING ri shugbyid: wa da" xoin" khyo" lhoem: yu moin: da" gougnyhoug yo' sen: wigi thang" cab to" da" zi nghoid rigi ASEING ri byid: da" jhungshug ja: khang" moo" gi younglho' nyid da:.

¹⁰Thang" cab to" da" yug gi hau: shid re" gougnyhoug gootu: ri age thid byid: nghoid da:. Nyang: hougsu" koid nghoid rigi gougnyhoug eig du: goin" ASEING re" nghoid da:.

¹¹Nghoid loug we' thung" khyo" ayung" alho' da" gougnyhoug yo' sen: da" thang" cab nghoid rigi hau: zigi ASEING ri shugbyid: da" xoin" khyo" age lhoem: yu nghoid da:. Hau: gougnyhoug ri khainjung pho jang khyoo: she: yhi: wa zi nghoid.

¹²Khainjung phoo gi hau: ziri ge zi age zi moo cang wigi gu ki' byid: wa zi nghoid. Houg: lho: hau: gu gi lo" thang mo gu nghoid wa.

¹³Byu hau: yug gi hau: gougnyhoug ri doem tau" qei nau nghoid rigi nyang: gi hau: gu tho' shoo: boem 20 doem pug lung: byid: wigi qei ca" da:.

¹⁴Byu dayug yug nya: yhoem: ri ASEING ri shugbyid: lang" Khainjung phoo gi hau: yhoem: ge zi age ziri cang lho: gu ki byid: wa zi nghoid. Houg: lho: hau: gu gi lo" thang da" gu nghoid wa.

¹⁵Hau: yhoem: ri shugbyid: da" yug gi hau: ziri doem tau" qei nau nghoid rigi nyang: gi hau: gu tho' shoo: boem 20 doem pug lung: byid: wigi qei ca" da:.

¹⁶Byu dayug yug gi nya: mougmyid dadu ri ASEING ri shugbyid: nghoid rigi hau: mougmyid gu ri amyau: khanhoo vang ziri cang wigi yoono, datang ri ngei daxi khyo" gu ki byid: wa zi nghoid.

¹⁷Nyang: gi mougmyid ri yooboo jhen: xab byid: da" zain nyid bain yo' dage" shugbyid: nghoid rigi gu byeung" sho' nghoid ca" da:.

¹⁸Nyang: gi doem tau" byid: da" zain kha yo, ri nghoid nghoid shugbyid: nghoid rigi doem tau" byid: da" zain void khamyhang deing shi" ziri soin: yu" wigi khainjung phoo gi gu ri myid: tu' lho: ki byid: ca" da:. Houg: lho: hau: gu ri khyoo ca" da:.

¹⁹Mougmyid ri shugbyid: to" da" yug gi: hau: ziri doem tau" qei yu nau nghoid rigi nyang: gi hau: gu tho' shoo: boem 20 doem pug lung: byid: wigi qei yu ca" da:.

²⁰Byu dayug gi ASEING mo xang: shi" atau" qei yu lho: gootu: dayug yug ri hau: mougmyid oung" nghoid rigi nyang: gi doem tau" qei yu wa da" akhang" ayoo" loo wa.

²¹Thang: lheing: doem tau" byid: da" zain nyid moo hau: mougmyid gi ASEING da" apyaid ato: jonu" gyeing" nyang: bue" ri" wa. Hau: zigi khainjung yi shid re" nghoid wa.

²²Byu dayug gi nyang: qei yu da" yoo mougmyid ri ASEING ri shugbyid: nghoid rigi

²³khainjung phoo gi thang: lheing: doem tau" byid: da" zain nyid ju" sho' gyoo: mo zain void joem ri soin: yu" wigi hau: aphoug" gu ri myid tu lho: ki byid: wa zi nghoid. Houg: lho: byu hau: yug gi hau: gu ri hau: nyid" nyang: byid: ca" da:. Hau: ngei gi ASEING seing: da" ngei nghoid da:.

²⁴Hau: khyam: yoo mougmyid ri doem tau" byid: da" zain void moo xang: shi" seing: da" yhoem: seing anghoid lang" nya: amyed ashen yiri doem tau" byid: wa zi nghoid.

²⁵Aphoug" gu dangain" ri tarha" vang da" azhang ri ci: wigi ki wa zi nghoid.

²⁶Xang: shi" xang" da" gougnyhoug gi ASEING da" zi nghoid yoomo hang" we' nyang: nya: myid vho: xoin" khyo" ASEING ri age shugbyid: nghoid da:. Nu nu"- yang nu"- coidbaid nu" gi ASEING seing: zi nghoid da:.

²⁷Nghoid loug we' xang shi" xang" da" ayung" alho' gougnyhoug rigi tarha" vang gu da" shoo: boem 20 doem pug lung: byid: wigi doem tau" qei yu ca" da:. Hau: ziri adoem tau" qei yu nghoid rigi gootu: dayug ri tarha" vang da" aphoug: gu yo' yo" oung" pyam wa zi nghoid.

²⁸ASEING ri bain bain shugbyid: to" da" xangsu: byu- gougnyhoug- mougmyid ci: nghoid nghoid- hang" we' hau: ziri age oung" age qei yu wa zi nghoid. Hau: zigi ASEING seing: da" zi nghoid da:.

²⁹Xangsu: byu rilang" shugbyid: too" bye: yug ri age doem tau" qei yu nghoid da:. Nyang: gi said pyam zi shau" ca" da:.

³⁰Shivoo: nghoid ri nghoid shi" nghoid ri nghoid mougmyid mo thu da" gu dangain" daxi boem mo daboem gi ASEING shid re" nghoid.

³¹Byu dayug yug gi houg mo doem tau" qei yu nau nghoid rigi nyang: gi tarha" vang da" aphoug" gu moo shoo: boem 20 ri doem pug lung: wigi byid: ca" da:.

³²Yhoem: gougnyhoug daxi: du: mo dadu: khang" moo" gi ASEING shid re" nghoid da:. Gougnyhoug joem ri nghab uri daxi du: mo dadu: gi ASEING shid re" nghoid da:.

³³Ayung" da" gougnyhoug joem ri khyen: wa khyo" yhoem: seing: gi gougnyhoug joem ri age jung nghoid da:. Nyang: gi ciri: we' gootu: age thid nghoid da:. Nyang: gi dadu: shid re" gootu: dadu: ri thid kaid nghoid rigi hau: gougnyhoug eig du: goin" gi ASEING zi bue" ri" wa. Hau: joem ri age tau" qei yu nghoid da:.

³⁴He: joem gi Israela byumyu" yi shid re" Sina boem dang moo: Moshe ri ASEING wigi byid: da" amyeing" dang: joem nghoid da:.