Read Lashi XOIN" NGEI" 3 Bible Online

XOIN" NGEI" 3 - Lashi bible

XOIN" NGEI" 3

¹Byu dayug yug gi nya: nu: dadu: ri zoem" khau: da" xoin" khyo" ngei" byid: wa nghoid uri hau: zigi ce: dam abo da" nuloo: anghoid lang" numoo" nghoid ca" da:.

²Hau: yug gi nya: lo, ri gougnyhoug da" vhuloem moo: ke" to" wigi ASEING shidkhoin" zoem" khoem" duang: moo said wa zi nghoid. Arun kung: mo khainjung yigi suid" ri phoin: myid: shoid goin" khyoo: foid sain" goo" wa zi nghoid.

³Houg: lho: vhoo: moo: tid to" da" gougnyhoug gung adu athang: joem rigi xoin" khyo" wigi ASEING ri ngei" byid: wa zi nghoid. Hau: joem gi khoug: loem khoug: seing" mo xu: dangain"-

⁴Jeingloem: yo' hau: jang" mo xu:- seing" mo ge thang da" du joem nghoid da:.

⁵Khainjung yigi he: gu: dangain" ziri myi: nghe' xoin" yo' dage" phoin: tho' moo: nghe' ngei" byid: wa zi nghoid. Hau: xoin" da" shoem: gi ASEING ri ngei bu: nhang: wa zi nghoid.

⁶Yang anghoid lang" coidbaid ri zoem" khau: xoin" khyo" ci: nghoid rigi ce: dam abo da" aloo: anghoid lang" amyhi' nghoid ca" da:.

⁷Yang dadu: ri ngei" byid: nghoid rigi

⁸Nyang: gi nya: lo, ri hau: vhuloem tho' moo ke" wigi zoem" shidkhoin" moo: said wa zi nghoid- khainjung yigi suid" ri phoin: myid: shoid goin" khyoo: foid sain" kaid wa zi nghoid.

⁹Houg: lho: vhoo: moo: tid to" da" gougnyhoug gung adu athang: joem rigi xoin" khyo" wigi ASEING ri ngei" byid: wa zi nghoid. Hau: joem gi xu:- jeingthung" nam mo phyid yu da" shoomyi: xu:- khoug: loem khoug: seing" ri thoeb to" da" xu: dangain"-

¹⁰jeingloem: yo' hougmoo: dab da" xu: yo' seing" mo ge thang da" du joem nghoid da:.

¹¹Moo" eung: da" khainjung phoo gi ASEING shid re" zoo: shug xoin" phoin: tho' moo: hau: ziri nghe' ngei" wa zi nghoid.

¹²Byu dayug coidbaid ri ngei" byid: nghoid rigi

¹³Nyang: gi nya: lo, ri coidbaid vhuloem atho' moo: ke" to" wigi zoem" shidkhoin" moo hau: ziri said wa zi nghoid. Khainjung yigi suid" ri phoin: myid: shoid goin" khyoo: foid sain" kaid wa zi nghoid.

¹⁴Houg: lho: vhoo: moo: tid to" da" gung adu athang: joem rigi xoin" khyo" wigi ASEING ri ngei" byid: wa zi nghoid. Hau: joem gi khoug: loem khoug: seing" moo dab jo' da" xu: dangain"-

¹⁵Jeingloem: yo' hougmoo: dab da" xu: yo' seing" mo ge thang da" du joem nghoid da:.

¹⁶Khainjung phoo gi he: gu: dangain ri ASEING ri ngei nhang: da" zoo: shug xoin" khyo" phoin: tho' moo nghe' ngei" wa zi nghoid- xu: dangain" gi ASEING re" nghoid da:.

¹⁷Israela byu hang" we' xu: anghoid lang" suid" ri yo" zoo: wa zi anghoid. He: zigi joyoo khang" moo" moo nyid da" Israela byumyu" yi cang ca" da" tarha" nghoid da:.