Read Lashi XOIN" NGEI" 4 Bible Online

XOIN" NGEI" 4 - Lashi bible

XOIN" NGEI" 4

¹ASEING gi Moshe ri amyeing" byid: zigi

²Byu dayug yug pa: yhi: koid zi anghoid loo: za: ASEING da" amyeing" dang: ri koid shoid yooboo yo" nghoid rigi vhoo: moo: tid to" da" tarha" joem ri cang ca" wa khyoo: ri Israela byumyu" yiri tid kyoo" wa zi nghoid.

³Khainjung moo" gi yooboo shoid yoomo byu yi atho' moo yau: bui" nhang: nghoid rigi nyang: gi dam ci: abo da" nuloo: bam: ri jhungshug khyo" re" byid: lho: nya: yooboo shid re" ASEING ri ngei" byid: wa zi nghoid.

⁴Nyang: gi hau: nuloo: bam: ri zoem" khoem" duang: khyoo: she: re" wigi nu: vhuloem moo nya: lo, ke" lho: hau: joyoo ASEING shidkhoin" moo said wa zi nghoid.

⁵Hau: thang: khainjung moo" gi hau: nulo: suid" dayham" yu wigi zoem" khoug: khyoo: ci: vang yhi: wa zi nghoid.

⁶Nyang: gi hau: suid" moo nya: lo, nyhoug" thau" joem lho: gyeung" shang: da" yabkyo' pain" ruang: shidkhoin" moo nyhed lheing: peig sain" wa zi nghoid.

⁷Hau: thang: nyang: gi suid" dayham" ri zoem" khoug: mo nam pyo: ja: ngei" byid: da" phoin: jhoin: joem mo zeing vhu" joem moo gyoid: pyam wa zi nghoid. Nyang: gi deing da" suid" ri zoem" khoem" duang: moo jo, da" xoin" ngei" byid: jang" moo ci: da" phoin: zeing khyid: moo: foid khyo pyam wa zi nghoid.

⁸Nyang: gi he: nuloo: mo xu: dangain"-khoug: loem khoug: seing" mo xu:-

⁹Jeingloem: yo' hau: atho' mo xu: yo' seing" mo ge thang da" du ri yu wa zi nghoid.

¹⁰Khainjung phoo gi zoem" khau: xoin" shid re" gougnyhoug ri said lho: xu: ri yu wigi koid yhang: ti" he: xu: ri yu lho: nghe' ngei" da" xoin" shid re" phoin: tho' moo: nghe' ngei" byid: wa zi nghoid.

¹¹Nghoid loug we' nyang: gi hau: da" shooyid- shoo" dangain"- vhuloem- khyid: joem vhu: joem yo' dage" khoug: loem khoug: seing" joem ri yu wigi

¹²thung" khyo" kyeing sain' pyam wa shid re" dab tunggung shoid mo myiyab foid khyo' nyid joyoo khyoo: yu yhe: lho: thang" nghe' to" da" myikhyoem moo: nghe' pyam wa zi nghoid.

¹³Israela byu phung: goin" pa: yhi: akoid lho: za: ASEING da" amyeing" dang: daja: ja: ri shoid lo" wigi yooboo yo" nghoid rigi

¹⁴Hau: yooboo ri boin: yo' dage" byu phung: yigi yooboo ngei" xoin" khyo" nuloo: nu" dadu: she: ri" ca" zi nghoid. Nyangnu" gi hau: ziri ASEING da" zoem" khyoo: she: ri" wa zi nghoid.

¹⁵Byumyu" phung: mo vhujhung: yigi nyangnu" lo, ri hau: nu: da" vhuloem moo: ke" wigi hau: joyoo moo: said wa zi nghoid.

¹⁶Khainjung moo" gi nuloo: da" suid" dayham" ri zoem" khoug: khyoo: ci vang lo" wigi

¹⁷Hau: suid" moo nya: lo, nyhoug" thau" joem lho: yabkyo' pain" ruang: shidkhoin" moo nyhed lheing: peig sain" wa zi nghoid.

¹⁸Nyang: gi suid" dayham" ri zoem" khoug: mo nam pyo: ja: ngei" byid: da" phoin: jhoin: joem mo zeing vhu" joem moo gyoid pyam wa zi nghoid wigi deing da" suid" ri zoem" khoem" duang: moo jo, da" xoin" ngei" byid: jang" moo ci: da" phoin: zeing khyid: moo: foid khyo pyam wa zi nghoid.

¹⁹Hau: thang: nyang: gi xu: dangain" ri yu lho: phoin: tho' moo: nghe' pyam wa zi nghoid.

²⁰Nyang: gi yooboo ngei" xoin" shid re" nuloo: ri yhung: yhang: ti" he: nuloo: ri we' yhung: wa zi nghoid. He: khyoo: khyo" byumyu" yi da" yooboo shid re" xoin" ngei" byid: wigi nyangnu" gi yooboo khyoid pyam byid: zi shau" wa zi nghoid.

²¹Hau: thang: nyang: gi nuloo: ri dab tunggung khyoo: she: yhe: wigi nya: yooboo shid re" nghe' ngei" da" nuloo: ri yhang: ti" nghe' ngei" wa zi nghoid. He: xoin" alu: gi shava byu phung: yi yooboo ri khyoid byid: da" xoin" nghoid.

²²Zoug: dayug gi pa: yhi: anghoid loo: za: yooboo shoid lho: ASEING da" amyeing" dang: daja: ja: ri koid shoid nghoid rigi

²³yooboo ri boin: yo' dage" nyang: gi xoin" khyo" dam abo da" coidbaid loo: dadu: ri she: ri" wa zi nghoid.

²⁴Nyang: gi hau: coidbaid vhuloem moo lo, ke" wigi nghe' ngei" wa gougnyhoug ri said da" joyoo nghoid da" phoin: mougzhung: shoid moo coidbaid ri said wa zi nghoid. He: zigi yooboo ri yu pyam byid: da" xoin" nghoid.

²⁵Khainjung phoo gi nya: lo, nyhoug" ri gougnyhoug suid" mo thau" joem lho: phoin: jhoin: joem mo zeing vhu" joem moo gyoid pyam wigi deing shi" da" gu: ri phoin: zeing khyid: moo: foid khyo' pyam wa zi nghoid.

²⁶Hau: thang: nyang: gi zoem" khau: xoin" shid re" gougnyhoug ri said lho: xu: ri nghe' yhang: ti" hau: da" xu: dangain" ri we' phoin: tho' moo nghe' ngei" byid: wa zi nghoid. Hid khyo" wigi khainjung phoo gi zoug: da" yooboo shid re" xoin" ngei" byid: lho: nyang: gi yooboo khyoid pyam byid: zi shau" wa zi nghoid.

²⁷Yu" yu" byu dayug gi pa: yhi: anghoid loo: za: yooboo shoid lho: ASEING da" amyeing" dang: daja: ja: koid shoid nghoid rigi

²⁸Yooboo ri boin: yo' dage" nyang: gi dam abo da" coidbaid amyhi' dadu: ri xoin" khyo" wigi she: ri" wa zi nghoid.

²⁹Nyang: gi coidbaid vhuloem moo lo, ke" wigi nghe' ngei" wa xoin" shid re" gougnyhoug ri said da" joyoo phoin: da" mougzhung: shoid moo said wa zi nghoid.

³⁰Khainjung phoo gi nya: lo, nyhoug" ri gougnyhoug suid" moo thau" joem lho: phoin: jhoin: joem mo zeing vhu" joem moo gyoid pyam wigi deing da" gu: ri phoin: zeing khyid: moo foid khyo' pyam wa zi nghoid.

³¹Hau: thang: nyang: gi zoem" khau: xoin" shid re" said da" gougnyhoug joem mo xu: ri yu yhang ti" hau: da" xu: dangain" ri we' yu pyam wa zi nghoid wigi xoin" shoem: ASEING ri ngei bu: nhang: wa shid re" hau: ziri phoin: tho' moo nghe' ngei" wa zi nghoid. Hau: akhyoo" khyo" wigi khainjung phoo gi byu dayug da" yooboo shid re" xoin" ngei" byid: wigi nyang: gi yooboo khyoid pyam shau" wa zi nghoid.

³²Byu dayug gi yooboo khyoid xoin" khyo" yang ri she: re" nghoid rigi hau: zigi ce: dam abo da" amyhi' nghoid ca" wa zi nghoid.

³³Nyang: gi nya: lo, ri hau: vhuloem moo ke" wigi myi: nghe' xoin" shid re" gougnyhoug ri said da" joyoo nghoid da" phoin: mougzhung: shoid moo: said wa zi nghoid.

³⁴Khainjung phoo gi nya: lo, nyhoug" ri gougnyhoug suid" mo thau" joem lho: phoin: jhoin: joem mo zeing vhu" joem moo gyoid pyam wigi deing shi" da" gu: ri phoin: zeing khyid: moo: foid khyo' pyam wa zi nghoid.

³⁵Hau: thang: nyang: gi zoem" khau: xoin" shid re" said da" yang mo xu: ri yu yhang ti" hau: da" xu: dangain" ri we' yu pyam wa zi nghoid wigi nyang: gi hau: ziri ASEING shid re" byid: da" zoo: noem xoin" yo' dage" phoin: tho' moo: nghe' ngei" wa zi nghoid. Hau: akhyoo" khyo" wigi khainjung phoo gi byu dayug da" yooboo shid re" xoin" ngei" byid: wigi nyang: gi yooboo khyoid pyam shau" wa zi nghoid.