Read Lashi XOIN" NGEI" 6 Bible Online

XOIN" NGEI" 6 - Lashi bible

XOIN" NGEI" 6

¹ASEING gi vhoo: moo: tid to" da" thung" ri: joem ri Moshe ri byid: bye:.

²Dayug yug gi Israela byu bidnoem phoo wigi ab byid: to" da" jonu" ri doem tau" byid: wa shid re" he: pyam khyo" anghoid lang" nyang: jang" mo daja: ja: khau" yu khyo" anghoid lang" nyang: ri mhau' khyo" anghoid lang" jonu" daja: ja: byug jo, ga: mhau' ziyo' nyang: amyang ga: jham tang: khyo" ASEING ri yooboo shoid nghoid rigi xoin" dalheing: to' ca" wa zi nghoid.

⁴Byu dayug gi he: khyoo: daja: ja: moo yooboo shoid rigi nyang: gi adeingmain" khyo" yu to" da" ciri: nghoid nghoid doem byid: ca" wa zi nghoid. Nya: da" yooboo dam ri sho: myang da" bidnyid moo nyang: gi yhoem: seing: ri jonu" dangain yo' shoo: boem eig xi: boem pug byid: ca" wa zi nghoid.

⁶Nyang: gi nya: youg: khyoug" da" xoin" khyo" wigi ce: dam abo da" yang loo: anghoid lang" coidbaid loo: dadu: ri ASEING ri xoin" ngei" byid: wa khyo" khainjung phoo jhang khyoo: ci: ri" ca" wa zi nghoid. Hau: da" aphoug" rigi tarha" vang da" laki yo' dakhyo" soin: phyed wa zi nghoid.

⁷Khainjung phoo gi hau: yug da" yooboo shid re" xoin" ngei" byid: wa zi nghoid wigi nyang: gi yooboo khyoid pyam shoug" wa zi nghoid.

⁸ASEING Moshe ri amyeing" byid: zigi

⁹Nghe' ngei" wa shid re" vhoo: moo: tid to" da" thung" ri: joem ri Arun yo' nya: yuggi zoo: yiri tid kyoo" we' ga: zi nghoid. Nghe' ngei" da" xoin" gi phoin: tho' moo: damyen goin" ke" to" wigi myi: atheing: lhoo: dab nyid ca" da:.

¹⁰Hau: thang: khainjung phoo gi nya: zin: yung" pain" byisheing: yo' zin: yung" pain" lhoo" dung: ri void ci: lho: phoin: tho' mo xu: yo' alhu: alheig jo, da myiyab joem ri ye: pyam wigi phoin: yam moo: too" wa zi nghoid.

¹¹Hau: thang: nyang: gi byimi ri thid pyam wigi myiyab ri dab tunggung shoid mo thung" khyo" younglho' joyoo moo yhe: she: pyam wa zi nghoid.

¹²Phoin: tho' mo myi: gi dab nyid nhang: wigi age shid: nhang: wa. Khainjung phoo gi nab soin: khang" moo" hougmoo: thang" kaid wigi hougmoo: nghe' ngei" xoin" moo: nyheing byid: lho: zoem" khau: xoin" xu: ri nghe' ngei" wa zi nghoid.

¹³Phoin: tho' mo myi: gi khanham we' dab nyid nhang: wigi khanham we' age shid: nhang: wa.

¹⁴Vhoo: moo tid to" da" thung" ri: joem gi shivoo: xoin" shid re" nghoid. Arun akung: mo khainjung phoo gi ASEING ri ngei" byid: da shivoo: xoin" ri phoin: tho' moo to" too" wa zi nghoid.

¹⁵Hau: thang: nyang: gi cen: moin" phei" dazhoeb yo' xu: ri yu wigi hau: atho' moo: nam pyo: ja: ke" lho: hau: ziri ASEING ri dangain" ngei" byid: bye: da" asoo" khyo" phoin: tho' moo nghe' ngei" wa zi nghoid. Hau: xoin" da" shoem: gi ASEING ri ngei bu: nhang: wa zi nghoid.

¹⁶Hougmo deing gu: ri khainjung yi zoo: wa zi nghoid. Hau: ziri doocid" akaid loo: za: zooyho' koid wigi ASEING shidkhoin" zoem" da" vang khoug: mo gyeung" shang: joyoo moo zoo: wa zi nghoid. ASEING gi hau: ziri khainjung yi shid re" zoo: noem xoin" gamboem khyo" byid: to" da:. Hau: zigi yooboo da" xoin" yo' yooboo shid re" doem xab byid: da" xoin" yo' du lho: gye" gyeung" shang: da:.

¹⁸Ciwim gari: ju" loo wa da" ayo, dangain" jang" moo Arun da" akung: ako' mo yuggi yigi ASEING ri ngei" byid: da" zoo: noem mo khanham we' nya: bang: gamboem khyo" zoo wa zi nghoid. Zoo: noem xoin" ri zang" tain" da" gootu: hang" nghoid loug we' hau: gyeung" shang: da" yoem: so' yoomo dam dab zi shau" wa nghoid.

¹⁹ASEING gi Moshe ri

²⁰Arun kung: mo khainjung phoo dayug ri lo, ke" aya: byid: wa shid re" vhoo: mo thung" ri: joem ri byid: to" da:. Nyang: gi lo, ki" aya: kham: yu wa da" bidnyid moo nyang: gi ASEING ri ngei" byid: da" xoin" khyo" cen: moin" 22 rung (hau: zigi nyid" khang" nyid" ngei" byid: nyid da" shivoo: xoin" yo' dakhyoo" ti" nghoid da) ri nab soin: daceing myen" thang: daceing ngei" byid: wa zi nghoid.

²¹Hau: ziri xu: yo' lheig wigi zooyho' bung: oug" moo jhau' lho: myheig khyoeb wigi shivoo: xoin" khyo" shoem: gi ASEING ri ngei bu: nhang: wa shid re" ngei" byid: wa zi nghoid.

²²Ju" loo wa da" ayo, dangain" moo khainjung moo" khyo" dei byid: da" Arun akung: ako' yugkhang" moo" gi he: xoin" ri koid ca" da:. Hau: ziri ASEING ri ngei" byid: da" xoin" khyo" bain sho' nghe' ngei" byid: wa zi nghoid.

²³Khainjung phoo koid da" shivoo: xoin" dajhi' ri we' yo" zoo: wa zi anghoid. Hau: zi dangain" nghe' ngei" ca" wa zi nghoid.

²⁴ASEING gi Moshe ri amyeing" byid: zigi

²⁵Arun yo' nya: yuggi zoo: yiri yooboo khyoid xoin" joem yo' sen: lho: vhoo: moo tid to" da" thung" ri: joem ri tid kyoo" byid: we' ga: zi nghoid. Nghe' ngei" wa shid re" gougnyhoug joem ri said da" joyoo phoin: da" mougzhung: shoid moo: yooboo khyoid xoin" shid re" ci: da" gougnyhoug ri said wa zi nghoid. He: zigi gye" gyeung" shang: da" xoin" nghoid.

²⁶Hau: gougnyhoug xoin" ri ngei" byid: da" khainjung phoo gi hau: ziri ASEING da" shidkhoin" zoem" jo, vang khoug: mo gyeung" shang: joyoo moo zoo: wa zi nghoid.

²⁷Hau: gougnyhoug shoo" ri zang" tain" da" dayug yug anghoid lang" daja: ja: gi hau: gyeung" shang: da" yoem so' yoomo dam dab zi shau" wa nghoid. Byimi dakhyab khyab moo hau: gougnyhoug suid" zain gyoin: nghoid rigi hau: ziri gyeung" shang: joyoo moo cid ca" wa zi nghoid.

²⁸Hau: shoo" ri myid oug" daja: ja: moo: jhau' to" nghoid rigi baid kho' pyam ca" zi nghoid. Sham: oug" ri ci: wa nghoid rigi hau: ziri mhoin" pyam wigi gyid yo' cid" yung" cid" lho' pyam ca" zi nghoid.

²⁹Khainjung yhoem: byu yi mo yuggi yigi hau: xoin" ri zoo: wa zi nghoid. Hau: zigi gye" gyeung" shang: zi nghoid.

³⁰Nghoid loug we' yooboo khyoid xoin" mo suid" ri zoem" khoug: khyoo: ci: vang yhe: lho: yooboo ri yu pyam byid: wa shid re" thung" khyo" ci: nghoid rigi hau: gougnyhoug shoo" ri age zoo: wa nghoid. Hau: ziri nghe' pyam ca" da:.