Read Lashi XOIN" NGEI" 7 Bible Online

XOIN" NGEI" 7 - Lashi bible

XOIN" NGEI" 7

¹Vhoo: moo tid to" da" thung" ri: joem gi yooboo jhen: xab byid: da" xoin" shid re" nghoid wigi hau: joem gi gye" gyeung" shang: zi nghoid.

²He: xoin" shid re" gougnyhoug ri nghe' ngei" wa shid re" gougnyhoug ri said da" joyoo phoin: da" mougzhung: shoid moo said wa zi nghoid wigi hau: suid" ri phoin: da" myid: shoid goin" moo foid khyoo' wa zi nghoid.

³Hau: da" xu: dangain" ziri yu wigi phoin: tho' moo: ngei" byid: wa zi nghoid. Shoomyi: xu:- khoug: loem khoug: seing" joem moo dab da" xu:-

⁴Jeing: loem: yo' hougmoo: dab da" xu: yo' ge thang da" seing" du joem nghoid da:.

⁵Khainjung phoo gi ASEING ri ngei" byid: da" zoo: noem xoin" yhang: ti" xu: dangain" ri phoin: tho' moo: nghe' ngei" byid: wa zi nghoid.

⁶Khainjung yhoem: byu yi mo yuggi hang" we' hau: ziri ge zo: da:. Nghoid loug we' hau: zigi gye" gyeung" shang: yoomo gyeung" shang: joyoo moo zoo: ca" wa zi nghoid.

⁷Yooboo khyoid xoin" yo' doem: xab byid: da" xoin" shid mo thung" ri: daja: za: daca" wa zi nghoid. Shoo" gi xoin" ngei" byid: da" khainjung phoo seing: wa zi nghoid.

⁸Nghe' ngei" byid: wa da" xoin" khyo" ngei" byid: da" gougnyhoug shooyid we' xoin" ngei" byid: da" khainjung phoo shid re" nghoid nyid da:.

⁹Shivoo: xoin" nghoid da" myikhyoem moo: phoid zi we' oug" phain' moo: rhe: zi we' zooyho' bung: oug" mo we' dangain" ri Mangso jhang xoin" ngei" byid: yug khainjung phoo shid mo nghoid.

¹⁰Nghoid loug we' shivoo: xoin" ri xu: yo' lheug zi nghoid nghoid- akyug joem mo nghoid nghoid- ajhoug shi" da" shivoo: dangain" gi Arun kung: mo khainjung dangain" bang: shid re" nghoid wigi nyangnu" ri gamboem dayi" yi" gam byid: wa zi nghoid.

¹¹Vhoo: moo: tid to" da" thung" ri: joem gi ASEING ri ngei" byid: da" zoem" khau: xoin" joem shid re" nghoid.

¹²Byu dayug gi he: xoin" ri Mangsoo ri jeju" boin: xoin" khyo" koid byid: nghoid rigi nyang: gi xoin" ngei" byid: wa gougnyhoug yo' dage" doocid" akaid loo: zhainloin: xu: yo' foid lheug wigi koid to" da" zooyho' thu: anghoid lang" zhainloin: xu: joid to" da" zooyho' poo" anghoid lang" zhainloin: xu: yo' foid lheug wigi koid to" da" zooyho' ri ngei" byid: wa zi nghoid.

¹³Hau: lho: nyang: gi doocid" yo' koid to" da zooyho' ri we' doem ngei" byid: wa zi nghoid.

¹⁴Nyang: gi ASEING ri gooki lid byid: khyo" wigi zooyho' ja: khang" moo" mo daloem: loem: ngei" byid: wa zi nghoid. Hau: zigi gougnyhoug suid" ri yu lho: phoin: yam moo foid khyo' pyam da" khainjung pho shid re" nghoid da:.

¹⁵Gougnyhoug da" shoo" rigi xoin" ngei" da" nyid" ri nyang: zoo: ca" wa zi nghoid. Thang: nab kyoo' ju" sho ci: we' age too" wa.

¹⁶Byu dayug gi thang" cab ri pyeing byid: da" zoem" khau: xoin" anghoid lang" nya: myid vho: lho: byid: da" xoin" ri ngei" byid: nghoid rigi xoin" ngei" nyid" ri bain sho' zoo: wa zi anghoid. Teing to" da" gu: ri thang: nab kyoo' zoo: wa zi nghoid.

¹⁷Soem" nyid" ein: nyid" ju" sho' deung jo, da" shoo" rigi nghe' pyam wa zi nghoid.

¹⁸Soem" nyid" ein: nyid" ri hau: shoo" ri zo: nghoid rigi Mangsoo gi hau: yug da" xoin" ri khab yu wa zi anghoid. Hau: xoin" ri nya: shid re" soin: byid: zi anghoid. Nghoid loug we' hau: ziri ayung" alho' ga: jho: yu wa nghoid wigi hau: shoo" ri zo: da" yugkhang" moo" gi yooboo akyu" ri shau" kham zoo: wa zi nghoid.

¹⁹Shoo" gi thung" khyo" ayung" alho' da" daja: ja: yo' zang" tain" nghoid rigi hau: ziri age zoo. Nghe' pyam ca" wa zi nghoid. Thung" khyo" younglho' da" yug hang" nghoid loug we' hau: shoo" ri ge zo: da:.

²⁰Nghoid loug we' ayung" alho' yug zo: nghoid rigi nyang: gi Mangsoo byu dayug khyo" myid byid: loo: wa zi anghoid.

²¹Byu dayug gi byu nghoid nghoid- gougnyhoug mo nghoid nghoid- thung" khyo" ayung" alho' da" daja: ja: ri zang" tain" thang: ri hau: xoin" ngei" da" shoo" ri zo: da" hang" ri nghoid nghoid- nyang: ri Mangso byu dayug khyo" myid soin: byid: loo: wa zi anghoid.

²²ASEING gi Moshe ri vhoo: moo: tid to" da" thung" ri: joem ri

²³Israela byumyu" yi shid re" byid: bye:. Nu xu:- yang xu:- coidbaid xu: joem ri age zoo: wa zi nghoid.

²⁴Nyang: nyang: shid: da" gougnyhoug anghoid lang" siyoo gougnyhoug wigi ngaid said da" gougnyhoug mo xu: ri age zoo. Nghoid loug we' hau: xu: ri gootu: khyoo: moo: ge ci: da:.

²⁵ASEING ri zoo: noem xoin" khyo" ngei" byid: da" gougnyhoug xu: ri zoo: su: hang" nghoid loug we' Mangso da" byu ein: soin: yu wa zi anghoid.

²⁶Khamoo: nyid da" Israela byu yi nghoid loug we' ngho' suid" anghoid lang" gougnyhoug suid" ri khanham we' zoo: shug khyo" age ci: wa.

²⁷He: tarha" ri acang su: hang" nghoid loug we' Mangso byu dayug khyo" soin: yu wa zi anghoid.

²⁸ASEING gi Moshe ri vhoo: moo: tid to" da" thung" ri: joem ri

²⁹Israela byumyu" yi shid re" byid: bye:. Zoem" khau: xoin" ri ngei" byid: da" byu hang" nghoid loug we' daboem ri gooki lid jhungshug khyo" ASEING ri byid: wa zi nghoid.

³⁰Hau: ziri nya: lo, wigi nyang: zoo: noem xoin" khyo" ci: ri" wa zi nghoid. Nyang: gi gougnyhoug xu: yo' yang gang shoo" ci: re" lho: gooki lid da" jhungshug wigi ASEING ri byid: wa zi nghoid.

³¹Khainjung phoo gi xu: ri phoin: tho' moo nghe' ngei" wa nghoid loug we' yanggang shoo" gi khainjung yi shid re" nghoid da:.

³²Gougnyhoug da" lo, yo shoid boung sain: rigi gooki lid jhungshug khyo"

³³zoem" khoug xoin" ein: da" suid" yo' xu: ri ngei" byid: da" khainjung ri byid: wa zi nghoid.

³⁴ASEING gi gougnyhoug da" yanggang shoo" yo' lo, yo shoid boung sain: rigi gooki lid jhungshug khyo" Israela byumyu" yi jang" mo yu wigi khainjung yiri byid: to" da:. He: zigi ju" loo wa da" ayo, dangain" goin" moo: Israela byumyu" yi khainjung yiri byid: ca" da gu: nghoid da:.

³⁵He: zigi Arun yo' nya: yuggi zoo: yi khainjung yi bui" wa shid re" nyangnu" ri lo, ki" byid: da" aya: kham: bidnyid" mo nyangnu" ri byid: to" da" ASEING ri ngei" byid: jang" mo gamboem nghoid da:.

³⁶Hau: bidnyid moo: ASEING gi xoin" mo he: aboem ri khainjung yiri byid: wa shid re" Israela byumyu" yiri amyeing" byid: too" bye:. He: thung" ri: gi ju" loo wa da" ayo, dangain" jang" moo Israela byumyu" yi cang ca" wa zi nghoid.

³⁷Hougsu" wigi he: thung" ri: joem gi nghe' ngei" xoin" joem shivoo: xoin" joem yooboo khyoid xoin" joem yooboo jhen: xab byid: da" xoin" joem lo, ki" xoin" joem zoem" khau: xoin" joem shid mo thung" ri: joem nghoid.

³⁸ASEING gi hau: amyeing" dang: joem ri dain" pyoid yoo mo Sina boem tho' moo Israela byumyu" yiri xoin" koid wa shid re" tid to" da" bidnyid moo Moshe ri byid: too" bye:.