Read Lashi XOIN" NGEI" 8 Bible Online

XOIN" NGEI" 8 - Lashi bible

XOIN" NGEI" 8

¹ASEING gi Moshe ri

²«Khainjung byimi joem mainkaid xu:- yooboo khyoid xoin" shid re" nuloo: bam: dadu:- yang loo: eig du: doocid" abo da" zooyho' dagyoin ci: wigi Arun yo' nya: yuggi zoo: yiri nga" zoem" khoem" duang: khyoo: shu" ri" wa zi nghoid.

³Hau: thang: byu phung: moo" goin" ri hougmoo: khe: foem: too" we'» ga: tid.

⁴Moshe ASEING amyeing" byid: bye: ziyo' dayhang: ti" koid bye: wigi byu phung: moo" goin" re" zeing: foem: to" uri

⁵Nyang: gi « Akhid" ngoo koid wa da" moo" gi ASEING nyang: byid: to" da" moo" nghoid da» ga: nyangnu" ri tid.

⁶Moshe gi Arun yo' nya: yuggi zoo: yiri shid khyoo: shu" yu wigi thung" khyo" nyangnu" ri gung cid" nhang: bye:.

⁷Nyang: gi Arun ri byi: yo' byisheing: ri foid wigi nya: phyid" doem: moo: phyid" cu" cu" byid: bye:. Moshe gi nyang: ri xoin" ngei" byizuang foid wigi hau: ziri gye" young" sho' yo, to" da" phyid" cu" wigi nya: phyid" doem: moo teing sho' tei" too" bye:.

⁸Moshe gi nyang: ri yanggang nghoeb ri foid wigi Urim yo' Thumin [1] ri hougmoo: tab too" byid: bye:.

⁹Moshe gi Arun ri vhu" thoeb thoeb byid: wigi hau: shidkhoin" moo ASEING nyang: amyeing" byid: to" ziyo' dayhang: ti" shugbyid: da" younglho' asoo" khyo" sheing: yo' koid to" da" sheing: zi ri tab byid: da:.

¹⁰Hau: thang: Moshe gi mainkaid xu: ri yu lho: ASEING da" zoem" yo' hougmoo: jo, da" ja: khang" moo" ri joid bye: da:. Nyang: gi hougsu" koid lho: ASEING ri dangain" shugbyid: nyid da:.

¹¹Nyang: gi xu: dayham" ri yu lho: hau: joem ri ASEING ri shugbyid: wa khyoo" phoin: tho' moo we' hau: jonu" joem tho' moo we' jarung: tho' moo we' hau: da" akhyid: moo we' nyhed lheing: peig zhain' gyoin: da:.

¹²Nyang: gi Arun da" vhuloem moo: mainkaid xu: dayham" ri foid gyoin: byid: lho: lo, ke" wigi aya: byid: khyoo: ri koid byid: bye:.

¹³Hau: thang: Moshe gi Arun da" nya: yuggi zoo: yi shid khyoo: shu" yu lho: ASEING wigi amyeing" byid: to" ziyo' dayhang: ti" nyangnu" ri byi: foid- nyangnu" da" phyid" doem: moo phyid" cu" cu" byid: ziyo' nyangnu" vhuloem moo: mug joem zhung" byid: bye:.

¹⁴Hau: thang: Moshe gi yooboo khyoid xoin" shid re" nuloo: bam: ri she: re" wigi hau: nu: vhuloem moo: Arun yo' nya: yuggi zoo: yiri lo, ki" nhang: bye:.

¹⁵Moshe gi hau: ziri said wigi suid" dayham" ri yu lho: hau: ziri shugbyid: wa shid re" nya: lo, nyhoug" yo' phoin: jhoin: zeing thang: joem moo joid byid: bye:. Hau: thang: nyang: gi deing da" suid" ri phoin: khyid: moo: foid khyo da:. Hau: khyoo: khyo" wigi nyang: hau: ziri shugbyid: ziyo' hau: ziri kyeing sain' pyam da:.

¹⁶Moshe gi khoug loem khoug seing" joem mo xu: dangain"- seing" mo je ge thang du yo' jeingloem: we' houg moo dab da" xu: joem ri yu wigi hau: joem dangain" ri phoin: tho' moo: nghe' ngei" byid: bye:.

¹⁷Nyang: gi shooyid- shoo" yo' vhu: we' wigi deing da" nu: shoo" dangain" ri yu lho: ASEING amyeing" dang: yo' dakhyo" dab tunggung shoid moo yhe: nghe' pyam wa zi nghoid.

¹⁸Hau: thang: Moshe gi nghe' ngei" xoin" shid re" yang loo: ri she: re" wigi Arun yo' nya: yuggi zoo: yigi yang vhuloem moo nyangnu" lo, joem ri ki" byid: bye:.

¹⁹Moshe gi hau: ziri said wigi suid" ri phoin: da" myid: shoid goin" moo foid khyoo' wa zi nghoid.

²⁰Nyang: gi yang loo: shoo" ri jab khyi- khoug loem khoug seing" joem yo' khyid: joem ri cid" yung" cid" lho' lho: ASEING amyeing" byid: to" ziyo' dayhang: ti" vhuloem- xu: yo' yang loo: mo deing da" gu: dangain" ri phoin: tho' moo: nghe' ngei" da:. He: nghe' ngei" xoin" gi zoo: noem xoin" nghoid wigi he: xoin" shoem: gi ASEING ri ngei bu: nhang: da:.

²²Hau: thang: Moshe gi khainjung yiri lo, ki" mainkaid byid: wa shid re" nghoid da" eig du: ein: da" yang loo: ri she: re" lho: Arun yo' nya: yuggi zoo: yigi hau: yang lo: da" vhuloem moo nya: bang: da" lo, ki" byid: boem ago".

²³Moshe gi hau: ziri said wigi suid" dayham" ri yu lho: Arun da" lo, yo shoid nukhyab thang: nya: da" lo, yo shoid lo, moo" cam" yo' nya: da" lo, yo shoid khyid: moo" cam" cang joid byid: da:.

²⁴Hau: thang: nyang: gi Arun da" nya: yuggi zoo: yiri shid khyoo: shu" yu wigi nya: bang: da" lo, yo shoid nukhyab thang: joem nya: bang: da" lo, yo shoid lo, moo" cam" joem yo' nya: bang: da" lo, yo shoid khyid: moo" cam" joem cang joid byid: da:. Hau: thang: Moshe gi deing da" suid" ri phoin: da" myid: shoid goin" khyoo: tu: foid da:.

²⁵Nyang: gi xu:- shoomyi: xu:- khoug loem khoug seing" joem moo dab da" xu:- ge thang da" seing" du- jeingloem: yo' houg moo dab da" xu:- lo, yo shoid bungsain: joem ri yu bye: da:.

²⁶Hau: thang: nyang: gi ASEING ri shugbyid: to" da" doocid" akaid loo: koid to" da" zooyho' gyoin mo zooyho' daloem:- xu: yo' lheig lho: koid to" da" zooyho' daloem:- zooyho' poo" dakhyab ri yu lho: nyang: gi hau: joem ri xu: yo' lo, yo shoid bungsain: dang moo: ke" to" da:.

²⁷Nyang: he: zoo: noem dangain" ri Arun yo' nya: yuggi zoo: yi lo, moo: kaid byid: lho: nyangnu" gi gooki lid jhungshug khyo" ASEING ri shugbyid: ago".

²⁸Hau: thang: Moshe gi hau: zoo: noem ri nyangnu" lo, mo yu wigi lo, ki" mainkaid byid: da" xoin khyo" phoin: dang moo: ngei" byid: da" xoin" atho' moo: ke' lho: nghe' ngei" da:. He: zigi zoo: noem xoin" nghoid wigi he: xoin" shoem: gi ASEING ri ngei bu: nhang: da:.

²⁹Hau: thang: Moshe gi yanggang shoo" ri yu lho: gooki lid jhungshug khyo" ASEING ri shugbyid: da:. He yanggang shoo" gi lo, ki" mainkaid jang" moo ci: da" yang loo: mo Moshe da" gamboem nghoid da:. Moshe gi ASEING da" amyeing" dang: yo' dayhang: ti" ja: khang" mo" ri koid bye:.

³⁰Moshe gi mainkaid xu: dayham" yo' phoin: dang mo suid" dayham" ri yu wigi Arun yo' nya: yuggi zoo: yi yo' nyangnu" da" byimi joem tho' moo: peig zhain gyoin: da:. Hidsu" koid wigi nyang: gi nyangnu" yo' nyangnu" da" byimi joem ri ASEING jhang shugbyid: da:.

³¹Moshe gi Arun yo' nya: yuggi zoo: yiri «Hau: shoo" ri ASEING shidkhoin" mo zoem" khoem" duang: khyoo: yu lo" wigi jhoug ge'. Houg: lho: ASEING amyeing" byid: to" ziyo' dayhang: ti" gyoin khoug: moo bo da" lo, ki" mainkaid xoin"- zooyho' yo' dage" houg moo zoo: ge'.

³²Deing da" shoo" anghoid lang" zooyho' ri nghe' pyam ge'.

³³Nanu" da" lo, ki" mainkaid byid: khyoo: oung: myug sho' nanu" gi zoem" khoem" duang: khyoo: nyhed nyid" ju" sho' thu ri" wa zi anghoid.

³⁴Nanu" yooboo ri yu pyam byid: wa shid re" akhid" nyid" ngoonu" koid da" moo" gi ngoonu" koid wa shid re" ASEING nyang: ngoonu" ri amyeing" byid: to" zi nghoid.

³⁵Nanu" gi zoem" khoem" duang: moo: nyhed nyid" nyang: myen" myen" nyid" nyid" nyid nyid wigi ASEING amyeing byid: to" gu: ri koid wa zi nghoid. Nanu" akoid nghoid rigi shid: wa zi nghoid. He zigi ASEING nyang: ngoo ri amyeing" byid: to" zi nghoid» ga: tid.

³⁶Houg: yoomo Arun yo' nya: yuggi zoo: yigi Moshe khyo" ASEING wigi amyeing" byid: to" da" ja: khang" moo" ri koid bye:.