Read Lashi XOIN" NGEI" 9 Bible Online

XOIN" NGEI" 9 - Lashi bible

XOIN" NGEI" 9

¹Lo, ki" mainkaid byid: khyoo: oung: myug da" thang: nyid" ri Moshe gi Arun- nya: yuggi zoo: yi yo' Israela vhujhung: yiri khe: yu da:.

²Nyang: gi Arun ri «Ce: noo abo da" nuloo: zoo: dadu: yo' yang loo: zoo: dadu: ri she: yu wigi nuloo: zoo: rigi yooboo khyoid xoin" shid re" yo' yang loo: zoo: rigi myi: nghe' xoin" shid re" hau: joem ri ASEING ri ngei" byid: ge'.

³Hau: thang: Israela byumyu" yiri yooboo khyoid xoin" shid re" ce: noo dam abo da" coidbaid loo: dadu:- nghe' ngei" xoin" shid re" ce: noo dam abo da" dazain byeung" nu: nu" dadu: yo' dazain byeung" yang nu" dadu:-

⁴zoem" khau: xoin" shid re" nuloo: dadu: yo' yang loo: dadu: she: ri" nhang: we'. Nyangnu" gi hau: joem ri xu: yo' lheig to" da" shivoo: xoin" yo' dage" ASEING ri ngei" byid: wa zi nghoid. Akhid" nyid" ASEING gi nyangnu" jhang re" thu shug wa nghoid yoomo he: ziri nyangnu" koid ca" wa zi nghoid» ga: tid.

⁵Nyangnu" gi Moshe amyeing" byid: to" da" ja: khang" moo" ri zoem" shidkhoin" khyoo: ci: re" wigi ASEING ri noku wa shid re" byu phung: dangain" hougmoo: zeing: foem: nyid ago".

⁶Moshe gi «ASEING da" bidbang nanu" ri yo" ci: shug wa shid re" he: gu: dangain" ri nanu" koid nyid ge' ga: nyang: amyeing" byid: too" bye:» ga: tid.

⁷Hau: thang: nyang: gi Arun ri «Re" yooboo yo' byumyu" yi da" yooboo joem ri yu pyam wa shid re" phoin: khyoo: yhe: lho: yooboo khyoid xoin" yo' nghe' ngei" xoin" yhe: ngei" byid: we'. ASEING amyeing" byid: to" ziyo' dayhang: ti" byumyu" yi da" yooboo joem ri yu pyam byid: wa shid re" he: xoin" ri yhe: ngei" byid: we'» ga: tid.

⁸Arun gi phoin: khyoo: yhe: lho: nyang: nya: da" yooboo khyoid xoin" shid re" nghoid da" nuloo: nu" ri said da:.

⁹Nya: yuggi zoo: yigi nya: jang" khyoo: suid" ci: ri" byid: wigi hau: jang" moo nyang: gi nya: lo, nyhoug" ri phoin: jhoin: joem mo zeing vhu" joem moo boid: da:. Deing da" gu: ri phoin: zeing khyid: moo: foid khyo' da:.

¹⁰Hau: thang: nyang: gi ASEING wigi Moshe ri amyeing" byid: to" ziyo' dayhang: ti" xu:- jeingloem:- seing" mo ge thang da" du ri phoin: moo: nghe' ngei" byid: da:.

¹¹Nghoid loug we' nyang: gi shoo" yo' shooyid ri zoem" tunggung shoid moo nghe' pyam.

¹²Nyang: gi nyang: nya: da" nghe' ngei" xoin" shid re" gougnyhoug ri said da:. Nya: yuggi zoo: yigi nya jang" khyoo: suid" ci: lo wigi nyang: gi phoin: myid: shoid goin" khyoo: foid khyo' da:.

¹³Nyangnu" gi nyang: ri gougnyhoug vhuloem yo' gootu: shoo" khyi joem ri byid: wigi nyang: gi hau: joem ri phoin: tho' moo: nghe' ngei" byid: da:.

¹⁴Hau: thang: nyang: gi khoug loem khoug seing" joem yo' khyid: joem ri cid" yung" cid" lho' pyam lho: phoin: dang mo deing da" nghe' ngei" byid: da" xoin" atho' moo: hau: joem ri ke" wigi nghe' ngei" da:.

¹⁵Hau: zi bain thang: ri nyang: gi byumyu" yi da" xoin" ri ngei" byid: da:. Nyang: gi byumyu" yi da" yooboo shid re" ngei" byid: wa da" coidbaid ri she: yu lho: hau: ziri said wigi nya: da" yooboo khyoid xoin" ri ngei" byid: bye: ziyo' dayhang: ti" koid bye:.

¹⁶Nyang: gi nghe' ngei" xoin" shid re" gougnyhoug ri we she: re" lho: thung" ri: yo' dayhang: ti" hau: ziri ngei" byid: bye:.

¹⁷Nyang: gi shivoo: xoin" ri shugbyid: wigi cen: moin" dazhoeb ri zhoeb yu lho: phoin: tho' moo: nghe' ngei" da:. (He: zigi nyid" khang" nyid" nghe' ngei" xoin" moo loung lho: koid zi nghoid).

¹⁸Nyang: gi byumyu" yi shid re" zoem" khau: xoin" khyo" nuloo: yo' yang loo: ri said da:. Nya: yuggi nu" yigi nya: jang" khyoo: suid" ci: re" wigi nyang: gi phoin: da" myid: shoid goin" khyoo: hau: suid" ri foid khyo' da:.

¹⁹Arun gi nuloo: yo' yang loo: da" xu: joem ri

²⁰gougnyhoug tang: da" yang gang tho' moo ke" lho: dangain" ziri phoin: khyoo: vu, yhe: da:. Nyang: gi xu: ri phoin: tho' moo: nghe' ngei" lho:

²¹yanggang shoo" joem yo' lo, yo shoid bungsain: joem ri Moshe amyeing" byid: to" da" ziyo' dayhang: ti" khainjung yi shid re" gooki lid jhungshug khyo" ASEING ri shugbyid: wa zi nghoid.

²²Arun gi xoin" joem dangain" bain ngei" lang" byu phung: yi atho' moo nya: lo, tu: to' to" lho: nya: bang: ri mainkaid byid: da:. Hau: thang: nyang: gi hougmo gyoo" lo" da:.

²³Moshe yo' Arun gi ASEING da" zoem" khyoo: vang loo" bye:. Nya: tang: doem thu re" lho: byu phung: yiri mainkaid byid: da:. Myo, kyoem: loo" sho' bang da" ASEING bidbang gi byumyu" yi dangain" shidkhoin" moo bang thu loo bye:.

²⁴Nyeigdain tung" ASEING gi myi: ri khyo kaid lho: nghe' ngei" da" xoin" yo' phoin: dang mo xu: joem ri nghe" pyam da:. Hau: ziri byumyu" yi shau" myang lang" nyangnu" dangain" gi yoid nyho: wigi nyangnu" myonhoo: joem myidgung khyoo: goeb pid ago".