Read Lashi YEREMIA 1 Bible Online

YEREMIA 1 - Lashi bible

YEREMIA 1

¹He: mougsoug" pug gi Benyamin byumyu" yi da" mougmyid mo Anathod voomoo" moo nyid da" Khainjung yi mo dayug nghoid da" Hilkia da" yuggi zoo: Yeremia nhoid khyo" wigi tid to" da" akhyoo" joem nghoid da:.

²Amon da" yuggi zoo: Yoshia gi Yuda khokham bue" zi daxe: soem" zain ein: zain moo Yeremia ri Aseing: dang: ji da:.

³Houg: lho: nyang: gi Yoshia da" yuggi zoo: Yehoiakim khokham bue" da" uri Yeremia ri dang: dalheing: doem ji da:. Hau: thang: ASEING gi Yoshia da" yuggi zoo: Zedekia vhoeb zi 11 zain ein: zain ju" sho' nyang: ri myoo" sho' lheing: dang: doem ji da:. Hau: zain lhammoo" wim: khyab khyab moo Yerusalem voobyu yiri pyoung" shu" lo" byug ago".

⁴ASEING gi ngoo ri -

⁵«Nang ri ngoo kangso' akaid byid: shi" ri nang ri ngoo khyen: bye:. Houg: lho: nang akhu: shi" ri nang ri byumyu" yi jhang Lapi: koid wa shid re" ngoo khyen: soin' too" bye:.

⁶Ngoo gi «Myhang: thang ASEING we"- ngoo dang: ase' tid. Ngoo ngi shi"» ein: tu" bye:.

⁷Nghoid loug we' ASEING ngoo ri «Nang ngi shi" ein: atid. Nang ri ngoo yhe: shu" nhang: da" byu yi jhang yhi: we' houg: lho: nang ri ngoo tid wa amyeing" byid: to" zi ja: khang" moo" nyangnu" ri yhe: tid kyoo" we'.

⁸Nyangnu" ri agyug- ciwim gari ngoo gi nang ri goem loem byid: wa shid re" nang yo' dage" nyid wa. Ngoo ASEING tid too" bye:.

⁹Houg: lang" ASEING gi lo, yhoin" kaid lho: nga" nhoid yid ri tain" byid: da:. Houg: lho: nyang: gi ngoo ri «Tam" gyoo: we' ngoo gi nang tid ca" da" dang: khoin" joem ri byid: wa» ga: tid da:.

¹⁰Akhid" nyid" ngoo gi nang ri byumyu" yi yo" khokham mungdain: joem ri phoin' pyam wa yo' phyo' khyo' pyam wa shid re" phyo' shoin' pyam wa yo' tu: khyo' pyam wa shid re" tu: zhug wa yo' sho" too" wa shid re" amyeing" akhang" byid: bye:.

¹¹ASEING gi ngoo ri «Yeremia we"- nang ciri: shau" myang la"» ga: myid: da:. Ngoo gi «Lashab kung: dakung: ri myang» ein: tu" bye:.

¹²ASEING gi «Nang tid zi jo da:. Houg: lho: nga" dang: khoin" joem jo loo wa ziri ngoo zoung" yu" nyid» ga: tid.

¹³Hau: thang: ASEING gi ngoo ri dang: doem myid: da:. Nyang: gi «Nang ci myang shi" la"» ga: myid:. Ngoo gi «Moug zhung: shoid moo zhu: nyid da" oug" daloem: ri myang. Hau: zigi kam" jo, da:» ein: tu" bye:.

¹⁴Nyang: ngoo ri «He: mougmyid moo nyid bang: dangain" adang moo byo, yoin" zigi mougzhung: shoid khyo" zhu: thu ri" wa.

¹⁵Ciwim gari ngoo gi mougzhung: shoid mo byumyu" dangain" ri ri" wa shid re" khe: nyid bye:. Nyangnu" da" khokham yigi Yerusalem khoem" moo" joem moo yo' hau: da" vang khyam: joem lheing khoem moo we' Yuda mung" mo voomoo" gootu: gu: loem: lheing khab moo we' nyangnu" da" zhungtang joem zhug to" loo goo" wa.

¹⁶Ngoo gi nga" byumyu" yiri yooboo dam byid: wa. Ciwim gari nyangnu" yooboo shoid abye: go". Nyangnu" gi ngoo ri too" kho' abye:. Phara" gootu: ri xoin" ngei" byid: wigi soolhoo: joem koid lho: hau: joem ri no' ago".

¹⁷Yeremia we"- ri ri soin' we' nang ri ngoo tid wa shid re" amyeing" byid: to" zi ja: khang" moo" nyangnu" ri yhe: tid kyoo" we'. Akhid" nyangnu" ri agyug- anghoid lang" ngoo gi nang ri nyangnu" yo' dage" nghoid uri je gyoug nhang: wa.

¹⁸Yeremia we"- tam" gyoo: we' he: mougmyid dang moo nyid da" yugkhang" moo"- Yuda khokham yi zoug: yi khainjung yi yo' mung" byu yigi nang ri gyi koid thougtheung loo goo" wa. Nghoid loug we' akhid" nyid" ngoo nang ri nang wigi nyangnu" ri yo" toem' pyam wa shid re" yoem: byid: nyid. Nang gi vang ri teing teing yam jhid to" da" voomoo" yo' dayhang: ti"- joto' zeing bung: yhang: ti"- gyid: mid" vang khyam: yhang: ti" nghoid loo wa. Nyangnu" gi nang ri yo" oung: pyam wa anghoid. Ciwim gari ngoo gi nang ri goem loem byid: wa shid re" nang yo' dage" nyid wa. Ngoo ASEING tid too" bye:.