Read Lashi YEREMIA 11 Bible Online

YEREMIA 11 - Lashi bible

YEREMIA 11

¹ASEING gi ngoo ri

²«Dang: theing mo dang: khoin" joem ri tam" gyoo: we'. Yuda byumyu" yi yo' Yerusalem voobyu yiri

³He: dang: theing mo dang: khoin" joem ri acang da" yugkhang" moo" ri Israela da" ASEING Mangsoo ngoo nheing" khoin" kaid bye: khyoo: ri tid kyoo" we'.

⁴Hau: zigi nyangnu" da" phoug" phyid" yiri nyangnu" shid re" khyoem' moo" myi: yo' du da" Egutu mo ngoo shoug" thu lo da" uri nyangnu" yo' to" da" dang: theing nghoid. Ngoo gi ngoo ri tam" gyo: cang lo wigi ngoo amyeing" byid: to" da" ja: khang" moo" ri cang wa shid re" nyangnu" ri tid too" bye:. Nyangnu" ngoo ri tam" gyo: cang lo boem nghoid rigi nyangnu" gi nga" da" byumyu" yi bue" wigi ngoo gi nyangnu" da" Mangsoo bue" loo wa ein: nyangnu" ri ngoo tid bye:.

⁵Houg: lang" ngoo gi akhid" nyangnu" nyid da" myidxu: ge wigi yoo" zoo: yoo" shug da" mougmyid ri nyangnu" da" phoug" phyid" yiri byid: wa ein: da" dangsoo" ri ngoo zoem: ci: wa nghoid» ga: tid da:. Ngoo gi «Nghoid bye: ASEING we"» ein: tid bye:.

⁶Hau: thang: ASEING tid zigi «Yuda voomoo" joem khyoo: yo' Yerusalem fu" moo" khyoo: joem khyoo: yhi: we'. Hau: joyoo moo nga" da" mungdang: ri tid fu" kyoo" we' houg: lho: dang: theing mo dang: khoin" joem ri tam" gyo: wigi phau" myang: cang yhe: boem wa shid re" hau: voobyu yiri tid kyoo" we'.

⁷Ngoo gi nyangnu" da" phoug" phyid" yiri Egutu mo shu" thu lo uri ngoo ri phau" cang goo" wa shid re" nyangnu" ri zug zug tid poin" bye:. Houg: lho: ngoo gi hau: byu yiri akhid" nyid" ju" sho' xo' tid poin" loo bye:.

⁸Nghoid loug we' nyangnu" gi atam" gyoo:- aphoug" cang nghoid ago". Hau: gungthid yugkhang" moo" gi khanham we' nheigloem: thain: wigi akhyeing" moo" xo' koid ago". Ngoo gi nyangnu" ri Dang: theing ri cang wa shid re" amyeing" byid: too" bye:. Nghoid loug we' nyangnu" ngeug he: pyam ago". Houg: yoomo ngoo gi houg: moo lhid" to" da" yooboo dam dangain" ri nyangnu" jang" khyoo: ci: yhi: byid: bye:» ga: tid bye:.

⁹Hau: thang: ASEING ngoo ri tid zigi «Yuda byumyu" yi yo' Yerusalem voobyu yigi ngoo ri goemlu khau" to' ago".

¹⁰Nyangnu" gi ngoo tid khyo" akoid da" nyangnu" phoug" phyid" yi da" yooboo khyoo: doem tau" lo" ago". Nyangnu" gi yu phara" gootu: ri no' abye: go". Yuda yo' Israela gi nyangnu" phoug" phyid" yi yo' ngoo koid to" da" Dang: theing ri phyo' pyam ago".

¹¹Houg: yoomo akhid" ngoo ASEING gi nyangnu" adang moo byo, yoin" zi ci: loo byid: wa ein: tid poin" nyid bye:. Houg: lho: nyangnu" gi loid byoin goo" wa anghoid. Hau: thang: nyangnu" pang" yu wa shid re" ngoo ri mho' uri nyangnu" ri ngoo atam" gyoo: byid: wa.

¹²Houg: lang" Yuda byumyu" yi yo' Yerusalem voobyu yigi nyangnu" xoin" ngei" byid: da" yu phara" joem jhang yhe: lho: pang" yu wa shid re" mho' loo goo" wa. Nghoid loug we' he: byo, yoin" khyoo: ju" loo lang" yu phara" joem gi nyangnu" ri ayo" pang" yu goo' wa.

¹³Yuda mung" byu yigi nyangnu" yo" da" voomoo" joem myhoo' yu phara" joem yo" ago". Houg: lho: Yerusalem moo nyid bang: gi hau: voomoo" moo jo, da" fu" moo" khyoo: joem myhoo' nyang: hau: aco' ajhoid da" Bala yu phara" ri xoin" ngei" byid: wa phoin: joem zhug to" ago".

¹⁴Yeremia we"- he: byumyu" yi shid re" gungthid koid lho: ngoo ri akyu" amho'- yoid we' yoid. Nyangnu" yau: khi" shau" wigi pang" thoug yu wa ngoo ri mho' yoid ri nyangnu" ri ngoo atam" gyoo: byid: wa» ga: tid.

¹⁵ASEING tid zigi «Ngoo jheddab da" byumyu" yigi akhyeing" da" moo" joem ri koid ago". Nyangnu" gi nga" Noku Yhoem: Moo" moo nyid wa ce: akhang" yo" la". Nyangnu" gi dang: so" joem byid: wigi gougnyhoug joem xoin" ngei" byid: lho: byo, yoin" khyoo: ri yo" toem' pyam wa ein: myid jho: boem la". Houg: lang" nyangnu" yo" ngei pyoo: wa la".

¹⁶Shid phyang" dalheing: ngoo gi nyangnu" ri afu' mung" lho: ashi" byeung" sho' zei: da" zhainloin: gam ein: lhung myheing loo bye:. Nghoid loug we' akhid" koem' gi ngoo gi mouggoem: goem: thui: myeing wigi nya: da" seig fu' joem ri myi: nge" pyam lho: hau: da" seig kung: joem ri khyau" pyam byid: wa.

¹⁷«Ngoo myhang: thang ASEING gi Israela yo' Yuda ri sho" too" bye:. Nghoid loug we' akhid" ngoo gi hau: bang: ri byo, yoin" khyoo: yo' kyug tain' nyid bye:. Nyangnu" gi shoid zi koid yoomo he: ziri nyangnu" ri gyo" zang" abye:. Nyangnu" gi Bala yu phara" ri xoin" ngei" byid: yoomo ngoo ri nheig yoo: nhang: bye:» ga: tid.

¹⁸ASEING gi nga" gyivoo yi wigi ngoo ri kuang nyid da" khyoo: dangain" ngoo ri tid shid da:.

¹⁹Ngoo gi said pyam wa shid re" shu" thu yhe: zi shau" da" nu" nham' yang nu" dadu: yo' du da:. Houg: lho: nyangnu" akhyeing" da" byen phyoo" sham: nyid boem zigi nga" shid re" nghoid nhung: ziri ngoo asi'. Nyangnu" gi «Seiggam joem mung" nyid shi" uri thug lheing: pyam boem shang. Nyang: ri hang" amyid boin: sho' nyang: ri said pyam boem shang» ga: tid ago".

²⁰Hau: thang: ngoo gi «Myhang: thang ASEING we"- nang gi deingmain" da" tarha" agyi nghoid da:. Nang gi byu yi da" myid soin: khyoo: yo' nheigloem: moo kham zo: da" khyoo: ri jham" ca: yu" da:. Ngoo gi nga" moo" zoo" ri re" lo, khoug: moo kaid too" bye:. Houg: lho: he: byumyu" yiri nang latoo: phug zi ngoo ri myang nhang: la» ein: akyu" mho' bye:.

²¹Anathod mo byu yigi ngoo said pyam shoug" wa ziri vho: da:. Houg: lho: nyangnu" gi ASEING Mungdang: ri ngoo xo' tid fu" lang" said pyam wa ga: ngoo ri tid kyo" da:.

²²Houg: yoomo myhang: thang ASEING tid zigi «Ngoo nyangnu" ri yooboo dam byid: wa. Nyangnu" da" zoolu: yigi gyi khaid jang: moo said pyam zi shoug" goo" wa. Nyangnu" da" zooshang: yigi zooyoid wigi shid: loo" goo" wa.

²³Ngoo gi Anathod voobyu yi dang moo byo, yoin" zi ci: loo byid: wa bidnyid so" too" bye:. Houg: lho: hau: ayo, ju" loo lang" nyangnu" mo dayug we' anyid deing loo goo" wa.