Read Lashi YEREMIA 12 Bible Online

YEREMIA 12 - Lashi bible

YEREMIA 12

¹ASEING we" nga" moo" zoo" ri nang yo' ngeug go" nghoid ri nang jo da" khyoo: ri yo" tid thu loo wa bye:. Nghoid loug we' ngoo gi nang ri tarha" deingmain" ziyo' sen: wigi dang: myid: myid nau da:. akhyeing" bang: gi ciwim soung nyid ge yab ge boem loug la". Adeingmain" da" byu yi ciwim yoomo oung: doid boem loug la". Nyangnu" gi nang ri khanham we' dang" thui: young" nghoid loug we' nyangnu" nang ri cishu: anhang: nghoid ago".

²Nang gi nyangnu" ri sho" to" wigi nyangnu" agyi: yug cen' re" boem. Nyangnu" yug gyi: re" wigi ashi" zei: da:.

³Nghoid loug we' ASEING we"- nang gi ngoo ri se' da:. Ngoo cikoid ziyo' nang ri ngoo khayhi' jheddab ziri nang se' da:. He: akhyeing" da" byu yiri said pyam wa yang joem ri yhang: ti" she: khyoid thu pyam byid: da:. Nyangnu" said pyam wa ayo, ju" sho' nyangnu" ri zung" nyid byid: la.

⁴Ngoonu" da" mougmyid gi khamyhang ju" sho' kyug hei' jo, wa la". Houg: lho: janggyoin: dangain" mo myo, joem gi khamyhang ju" sho' kyug shid: jo, wa la". ‹Ngoonu" cikoid nyid ziri Mangsoo amyang› ga: tid da:. Ngoonu" byu yi da" akhyeing" moo" yoomo gougnyhoug joem yo' ngho' joem shid: doem: lo" nyid abye:.

⁵ASEING tid zigi «Yeremia we"- nang gi byu yi thang: moo cang khaid ngheing" lo nghoid ri Myang: joem yo' khasu" yo" tang" goo" wa la". Nang gi janggyoin: moo ayo" nyid yab nghoid rigi Yodan gyid lang yam mo siyoo moo khasu" yo" dei nyid wa la".

⁶Nanya: bidnoem yi re" yhoem: byu yi lang" nang ri mhau' ago". Nyangnu" gi nang ri thougtheung gyi koid bang: shoid khyoo: dab ago". Nyangnu" gi dang: myen re" tid nghoid loug nyangnu" ri aloem» ga: tid.

⁷ASEING tid zigi «Ngoo gi Israela ri she: pyam khoo' bye:. Ngoo khyen: yu to" da" byumyu" ngoo ngeug he: pyam bye:. Ngoo jheddab da" byumyu" yiri nyangnu" da" gyivoo yi yoem: so' khoug: khyoo: byid: pyam bye:.

⁸Ngoo khyen: yu to" da" byumyu" gi ngoo mo thougtheung phug lo" abye:. Siyoo mo khangkhyi dadu: yhang: ti" nyangnu" gi ngoo ri myeing ago". Houg: yoomo nyangnu" ri ngoo ngheing"-

⁹Ngoo khyen: yu to" da" byumyu" yigi zoin bung: joem wigi shoid khang" moo" khyo" coem' khaid thei" zi shau" da" ngho' yo' du da:. Hau: zooshug pui" moo bo boo wa shid re" gougnyhoug joem dangain" ri khe: kaid we'.

¹⁰Tungbau mo vhu" she: bang: gi nga" zabyid khyam: ri phyo' shoin' pyam boem. Nyangnu" gi nga" da" shivoo yoo ri nang nhe" pyam ago". Nyangnu" gi yu" yung" tung" da" nga" mougmyid ri dain" pyoid yoo bue" nhang: pyam ago".

¹¹Nyangnu" gi hau: ziri myid cen: doem: koid pyam abye:. Hau: zigi nga" shidkhoin" moo jham" coug: youg jo, jo, da:. Da: mougmyid goin" gi dain" pyoid yoo bue" byug bye:. Houg: lho: hang" we' cishu: anhang: nghoid da:.

¹²Byu joem gi lhoid yu pyam wa shid re" dain" pyoid yoo- boem joem dangain" khyoo: ju" lo" ago". Ngoo gi damougmyid goin" ri phyo' shoin' pyam wa shid re" meing: zain: ziri nhang: kaid byid: bye:. Hang" we' yug yoo tung" ashau" nyid nghoid da:.

¹³Nga" byumyu" yigi sungsoo: ri shoo" nghoid loug we' myo, ri za: shau" yham" yu da:. Nyangnu" moo" joem thei" khang nghoid loug we' hau: shid re" ci: ashau" yu nghoid da:. Ngoo nheig yo: gang mo nyangnu" da" shivoo: joem soem: lo" ago".

¹⁴ASEING tid zigi «Nga" da" byumyu" Israela yiri ngoo byid: to" da" mougmyid ri phyo' shoin' pyam da" Israela da" yhoem: kyoo" cang" mungdain: yiri ngoo tid wa daja: jo,. Ngoo gi hau: akhyeing" da" byumyu" yiri agyi: mo boin" lo" da" seiggam yhang: ti" yu pyam wa. Houg: lho: ngoo gi Yuda ri nyangnu" mo khyoid yu wa.

¹⁵Nghoid loug we' nyangnu" ri ngoo yu pyam thang: ri nyangnu" ri ngoo nheig khyeug yu wa. Ngoo gi byumyu" khang" moo" ri nyangnu" nya: mougmyid khyoo: yo' nyangnu" nya: mungdain: khyoo: shu" loo" wa.

¹⁶Goonham' dalheing: nyangnu" nga" byumyu" ri Bala yu phara" myeing lang: lho: jham' tang: nhang: ziyo' dayhang: ti" nyangnu" gi nyangnu" nheigloem: dangain" yo' Israela byumyu" da" laloem lakhoug: ri khab yu wigi ‹ASEING kangso' dei nyid› ga: jham' tang: boem nghoid ri nyangnu" gi nga" byumyu" yi mo dadu dakhyam" khyo" bo bo wigi nyid gi yab ge loo goo" wa.

¹⁷Nghoid loug we' byu damyu" myu" aphoug" cang nghoid rigi ngoo gi hau: byumyu" ri bain sho' phoin' pyam wigi phyo' shoin' pyam wa. Ngoo ASEING tid too" bye:» ga: tid da:.