Read Lashi YEREMIA 15 Bible Online

YEREMIA 15 - Lashi bible

YEREMIA 15

¹Hau: thang: ASEING gi ngoo ri «Moshe yo' Samuela eig tang: nyang: he: joyoo moo: yab jo, wigi ngoo ri mho' nyid boem nghoid loug we'. Ngoo gi he: byumyu" ri nheig khyeug myid aci: shug byid: wa. Nyangnu" ri phang: loo" nhang: ge'. Nyangnu" ri nga" shidkhoin" mo khaid pyam we'.

²Nyangnu" wigi nang ri nyangnu: khakhyoo: yhi: ca" zi myid boem uri ngoo hid su" ein: tid ein: nyangnu" ri tid kyoo" we' Dayham" gi noo phyoo" shau" wigi shid: loo" goo" wa- hau: zigi nyangnu" yhe: loo" wa khyoo: nghoid. Gootu: dayham" gi meing: zain: jang: moo: shid: lo" boem wa- hau: zigi nyangnu" yhe: loo" wa khyoo: nghoid. Dayham" gi zooyoid wigi shid: lo" boem goo" wa- hau: zigi nyangnu" yhe: loo" wa khyoo: nghoid. Gootu: dayham" gi thung: byu khyo" shu" lo" zi: shau" wigi joem: lo" boem goo" wa. Hau: zigi nyangnu" yhe: loo" wa khyoo: nghoid.

³Nyangnu" moo: gyugdain pho" zi 4 ja: bui" loo wa ein: ngoo ASEING myid phyed too" bye:. Nyangnu" gi meing: zain: pa: moo: said pyam zi shau" loo goo" wa. Nyangnu" da" manggung joem gi lakhuid" joem wigi she: khyoid lo" zi shau" wa. Hau joem ri ngho' joem wigi zo: pyam byid: wa. Zo: teing to" gu: ri gougnyhoug lam" joem wigi coem' lhoid zo: pyam loo goo" wa.

⁴Hezekia da" yuggi: zoo: Manashe wigi nyang: Yuda khokham bue" nyid uri Yerusalem ri koid lid: lo da" moo" zoo" gang mo damungdain: goin" mo byumyu" yi wigi nyangnu" ri yu" gyoug yu" dain goo" wa khyo" ngoo koid kaid wa»

⁵ASEING tid zigi «Yerusalem voobyu yi nanu" ri hang" nheig khyeug wigi Nanu" shid re" hang" koug ngoug wa la". Nanu" ri u" wa shid re". Hang" se' theing: nyid goo" wa la"

⁶Byumyu" yi nanu" gi ngoo ri ngeug he: pyam ago". Nanu" gi ngoo ri nungthang phug khare" boem abye: go". Houg: yoomo ngoo gi nanu" jhang jhen" re" wigi nanu" ri khyoeb pyam bye:. Ciwim gari: ngoo gi nga" da" nheig yo: ziri zeing: ngheing" bye:.

⁷Hau: mougmyid mo voogung khang" moo" moo: Ngoo gi nanu" ri khoofoo: yhang: ti" lid khoug: khyoo: she: pyam sain" kaid bye:. Ngoo gi nga" da" byumyu" yi nanu" ri phyo' shoin' pyam bye:. Ngoo gi nanu" da" zooshang: yiri said pyam byid: bye:. Ciwim gari: nanu" gi nanu" da" akhyeing" da" khyoo: ri ato" pyam yoomo nghoid.

⁸Panglai: mo midcoo: tho' nanu" da" mougmyid mo cougmoo" yi je myo: nyid boem wa. Ngoo gi nanu" da" zoolu: yiri zooyam kung" kung" nghoid uri said pyam wa. Houglho: nyangnu" da" nya: myhi' bi" ri kyi" khyeug kham zoo: nhang: wa. Ngoo gi nyangnu" ri kyi" khyeug yau: khi" yo' gyoug dain pho" ja: khyo" nyeigdain tung" shen" yhen bye:.

⁹Zooshang: nyhed yug shid: pyam da" myhi' zeing gi so' moo" she: wigi so' kho' kho' wigi mo, leung loo" bye:. Nya: da" nyid" gung bidbang gi myen" moug: coid bue" byug abye:. Nyang: gi ngi: yoem" wigi nheigloem: no jo, abye:. Ngoo gi nanu" mo dei nyid shi" bang: ri nanu" da" gyivoo yi wigi said pyam zi shau" nhang: wa. Ngoo ASEING tid too bye:.

¹⁰Hid yhi' apyo: da" ngoo we". Nga" myhi' gi ciwim yoomo ngoo ri mougmyid moo khu: kaid lug la". Ngoo gi he: mougmyid moo: nyid da" yugkhang" moo" yo' myeing" myo: wigi ngeig go" ca" da:. Ngoo gi ngei we' ajhid" byid: yu"- subi" mo we' ajhid" yu yu"- nghoid loug we' yugkhang" moo" gi ngoo ri nheing" ago".

¹¹ASEING we" nang ri nyeing" za: adei byid: nghoid rigi nga" da" gyizoo yi yau: khi" shau" wigi nheigloem: thang nyid boem da" uri nyangnu" da" gungthid khyo" ngoo akyu" amho' byid: nghoid rigi nyangnu" nheing" da" nheing" khoin" joem dangain" bue" loo baja". (

¹²Joto' ri hang" ayo" khyau" pyam- je wigi gyid: mid" yo' lheig to" da" mougzhung: shoid mo joto' ri ayo" khyau".)

¹³ASEING ngoo ri «Ngoo gi nga" byumyu" yi hau: mougmyid khyi khang" moo" goem: sho' moo: shoid boem da" yooboo joem gang mo nyangnu" ri yooboo dam byid: wa shid re" gyivoo joem ri nhang: kaid byid: wigi nga" byumyu" yi da" yoo" zoo: yoo" shug khyoo: yo' jonu" ziyoo joem ri de" pyam loo" nhang: wa.

¹⁴Ngoo gi nyangnu" ri nyangnu" ci: we' ase' da" mougmyid moo: nyangnu" da" gyivoo yiri dei byid: nhang: da:. Ciwim gari: nga" da" nheig yo: zigi myi: yo' du wigi hau: zigi apyaid atoo: moo: dab nyid wa» ga: tid da:.

¹⁵Hau: thang: ngoo tid zigi «ASEING we"- nang se' gyo: da:. Ngoo ri myid boin: wigi pang" yu la. Ngoo ri said wa soin bang: ri latoo: cang phug nhang: la. Nyangnu" ngoo ri said wa zi oung: doid sho' nheigloem: sheing: sheing: azeing: ci. Ngoo rue" zi shau" kham zo: zigi re" gang mo nghoid ziri myid boin: byid: la.

¹⁶Nang ngoo ri dang: tid wigi ngoo gi dang: khoin" khang" moo" ri tam" gyoo: bye:. Myhang: thang ASEING Mangsoo we"- ngoo gi nang wigi seing: su: nghoid. Houglho: re" dang: khoin" joem gi nga" nheigloem: khoug: moo: gau yi ngei pyo: ziyo' bo jo, da:.

¹⁷Ngoo gi subi" gootu: yo' yhe: ei". Pyo: ei" wigi ayo, anyid thang pyam. Ngoo gi re" da" amyeing" dang: ri phau" cang khyo" ngoo nyang: kyeing" nyid nyid lho: nheig yo: nyid.

¹⁸Ngoo ciwim kyi" khyeug xo' kham: nyid wa la". Nga" dam joem gi ciwim ayo" byang" ge la". Nyangnu" ciwim ayo" ge la". Nang gi ngoo ri xung" gung ri kyug hei lo" da" gyid zoo: gyung: ri yhang: ti" nheigloem: thang nhang: wa ein: myid soin' to" la"» ein: tid bye:.

¹⁹He: ziri ASEING doem tid zigi «Nang doem tau" lo nghoid rigi nang ri ngoo doem shu" yu lho: nang ri nga" da" dei zoo: doem bue" loo wa. Nang gi ce: dang: kang: abo da" dang: tid wa gungthid phoug" dab da" lu dang: ri tid fu" kyo" nghoid rigi nang gi nga" lapi: doem bui" wa. Byumyu" yigi re" jhang doem tau" lo wigi nang gi nyangnu" jhang ayhi: ca" wa.

²⁰Ngoo gi nang ri gyid: mid" vang khyam: yhang: ti" geing: teing nhang: wa. Nyangnu" gi nang ri khaid zain: nghoid loug we' nang ri nyangnu" oung: pyam wa zi anghoid. Ngoo gi nang ri goem loem byid: wigi nang goug: nyu: tung" za: yo" nyid sho' nang yo' dage" nyid wa.

²¹Ngoo gi nang ri akhyeing" bang: yo' athoug" akhyoug: bang: da" yoem: so' mo khyoid yu wa. Ngoo ASEING tid too" bye:.