Read Lashi YEREMIA 19 Bible Online

YEREMIA 19 - Lashi bible

YEREMIA 19

¹ASEING gi ngoo ri myid vhu" nug jhuang: daloem: yhe: qei wa shid re" tid da:. Nyang: gi byumyu" yi da" ludaid yi dayham"- apyaid gyi: da" khainjung yi dayham" ri shu" wigi

²Hinnom langkhung" khyoo: thu lo" da" oug" go, khyam" khoem" moo" duang: khyo" yhe: loo" we'. Houg moo nyang: wigi byid: wa mungdang: ri ngoo tid fu" wa khyoo: ri ngoo ri tid da:.

³ASEING gi tid fu" wa shid re" ngoo ri «Yuda khokham yi we"- Yerusalem voobyu yi we"- ngoo myhang: thang ASEING- Israela da" Mangsoo tid wa ziri tam" gyoo: ge'. Shau" gyoo: bang: yugkhang" moo" gyo: dain moug" byug sho' da" yau: khe" kyi" khyeug ziri he: joyoo moo ngoo bue" nhang: wa.

⁴Ngoo gi he: ziri koid wa ciwim gari byumyu" yigi ngoo ri she: pyam wigi yu phara" joem ri xoin" ngei" byid: khyo" wigi he: joyoo ri ayung" alhoo' koid pyam bye:. Hau: yu phara" joem khyoo: ri nyangnu" we' nyangnu" phoug" phyid" yi we' Yuda khokham yi we' ci: we' ase' nghoid ago". Nyangnu" gi he: joyoo moo ce: yooboo ayoo" bang: da" suid" za: byeung" sho' koid to" ago".

⁵Houg: lho: nyangnu" gi xoin" joem khyo" myi: moo nyangnu" zooshang: yiri nghe' ngei" wa Bala shid re" phoin: joem ri zhug ago". He: ziri koid wa shid re" nyangnu" ri ngoo khanham we' amyeing" abyid:. Hau: zigi nga" myid moo lang" khanham we' abo yu".

⁶Houg: yoomo he: joyoo ri Tophed anghoid lang" Hinnom langkhung" ga: amyheing loo goo" wa ayo, ju" lo boem wa. Hau: gungthid hau: joyoo gi byu said lang: khung" ga: myheing loo goo" wa.

⁷He: joyoo moo Yuda byu yi yo' Yerusalem byu yi da" myid soin' khyoo: joem ri ze" shoin' pyam byid: wa. Ngoo gi nyangnu" gyivoo yi wigi nyangnu" ri oung: pyam nhang: lho: gyi khaid pui" moo said pyam nhang: wa. Ngoo gi nyangnu" manggung joem ri ngho' joem yo' siyoo gougnyhoug lam" joem ri zo: pyam nhang: wa.

⁸Ngoo gi he: voomoo" ri so" lid: loo" bang: yugkhang" moo" moug" wigi dain byug boem goo" wa da" yu" gyoug yu" lhung: sho' da" phyo' shoin' zi bui" nhang: wa.

⁹Gyivoo yigi voomoo" ri vang: lheing to" lho: voobyu yiri said wa soin' loo goo" wa. Vang: to" zigi gyoug dain pho" zi nghoid wigi voomoo" khoug: moo nyid da" bang: gi nyang: cang" nyang: said zoo: goo" loo wa. Nyangnu" nya: zooshang: yiri lang" said zo: loo goo" wa ga: ngoo ri tid da:.

¹⁰Hau: thang: ASEING gi ngoo ri ngoo yo' dage" cang ri" bang: shidkhoin" moo jhuang: ri kho' mhoin' pyam wa tid lho:

¹¹Myhang: thang ASEING gi «Ngoo gi he: byumyu" yi yo' he: voomoo" ri kho' mhoin' pyam wa. Hau: zigi age doem zhoem: loo sho' go, byug da" he: myid vhu" nug jhuang: yo' dayhang: ti" nghoid wa. Byu yigi nyangnu" byu shid: mang ri Tophed moo lang" myhoeb loo goo" wa. Ciwim gari nyangnu" ri myhoeb wa joyoo gootu: ajo, loo yoomo nghoid da:.

¹²He: voomoo" ri yo' houg: moo nyid boem da" bang: ri Tophed ri yhang: ti" ngoo koid pyam wa ein: ngoo dangsoo" byid: da:.

¹³Yerusalem mo yhoem: joem Yuda khokham yi da" yhoem: joem yhoemkhung: tho' moo kyi: ri shoem: nam pyo: ja: nghe' ngei" byid yu" ziyo' gootu: yu phara" joem ri xoin" khyo" zabyid yhid: foid shoin" yu" da" yhoem: joem dangain"- gyeing" nyang: hau: joem dangain" gi Tophed yhi' ayung" alho' bue" loo goo" wa ga: ziri nyangnu" ri tid kyoo" wa ga» ngoo ri tid da:.

¹⁴Hau: thang: nya: mungdang: ri tid fu" wa shid re" ASEING wigi ngoo ri nhang: kaid da" joyoo Tophed mo ngoo tau" loo bye:. Ngoo gi Noku Yhoem: Moo" vang khyam: khyoo: vang yhe: wigi yab jo, lho:

¹⁵Myhang: thang ASEING Israela da" Mangsoo gi «Nanu" nheigloem: thain: wigi ngoo tid dang: atam" gyoo: goo" wa ngoo koid wa ein: tid to" da" yooboo dam dangain" ri ngoo gi he: voomoo" yo' aqei: ayam voogung khang" moo" adang moo bue" loo nhang: wa ga: tid to" ziri byu dangain" bang: ri tid kyoo" bye:.