Read Lashi YEREMIA 2 Bible Online

YEREMIA 2 - Lashi bible

YEREMIA 2

¹ASEING gi ngoo ri

²Yerusalem mo byu yugkhang" moo" ri he: lu dang: tid fu" nhang: da:. «Nang ngi shi" uri nang khayhi' jhug zug ziri ngoo se'. Nang gi xang: shi" lo, xo' uri ngoo ri khayhi' jheddab ziri ngoo se' da:. Nang gi dain" pyoid yoo khyo" nga" thang: cang lo da:. Shivoo: asho" yu" da" mougmyid khyo" so" lid: lo" da:.

³Israela we"- nang gi ngoo dayug wigi za: seing: zi nghoid da:. Nang gi nga" da" gyeung" shang: jonu" nghoid da:. Ngoo gi nang ri dam tab bang: yugkhang" moo" yau: khi" yo' byo, yoin" da" khyoo: nhang: kaid byid: wa.. Ngoo ASEING tid too" bye:.

⁴Yaku da" amyed ashen yi nanu" we"- Israela byumyu" kung: yi nanu" we"- ASEING mungdang: ri tam" gyoo: we'.

⁵ASEING «Nanu" da" phoug" phyid" yigi ngoo ri ce: yooboo zhug wigi thougtheung bye: go" la". Ce: wigi nyangnu" ri ngoo mo lheing: phug loo" nhang: la". Nyangnu" gi ce: phoug" adab da" soolhoo: joem ri no' wigi Nyangnu" nyang: we' ce: phoug" adab bue" da:.

⁶Ngoo gi nyangnu" ri Egutu mung" mo khyoid yu lho: dain" pyoid yoo yo' midcoo: duang: joem jo, da" moug:- Byu hang" anyid da" moug:- moug: kyug yo' gyoug pho" da" moug:- Byu dayug we' gyung: aso" da" moug: dain" pyoid yoo khyo" shu" lid: lo rilang" nyangnu" ngoo ri cishu: anhang: nghoid da:.

⁷Ngoo gi nyangnu" ri myidxu: ge da" moug: khyoo:- hau: moug: moo ngei pyoo: tung" shivoo: yhoem" wigi hau: moug: mo ge da" ja: joem ri yo" kham: yu wa shid re" shu" vang loo bye:. Nghoid loug we' hau: gungthid nyangnu" gi nga" mougmyid ri phyo' shoin' pyam ago". nyangnu" gi nyangnu" ri ngoo byid: to" da" mungdain: ri ayung" alho' koid pyam ago".

⁸Khainjung yigi «ASEING khayoo: nghoid la"» ga: amyid: nghoid ago". Nga" da" khainjung yi ngoo ri asi' nghoid ago". Vhoeb khang" bang: gi ngoo ri thougtheung gyi koid ago". Lapi: yigi Bala myeing khyo" dang: tid boem. Houg: lho: akyu" abo da" soolhoo: joem ri no' ago".

⁹«Ngoo ASEING gi nga" byumyu" yi yo' phyen: goo" wa. Ngoo gi nyangnu" da" amyed ashen yiri yooboo zhug wa.

¹⁰Bidvang shoid Kupru gagyoo kang khyoo: yhe: loo" we'. Houg: lho: dayug yug ri bidthu shoid Kedara moug: khyoo: nhang: kaid ga. Hid yhang: te" zi shid pyang" khanham we' abue" yu" ziri nang shau" myang loo wa.

¹¹Gootu: kha: byumyu" yi we' Mangsoo gyeing" anghoid da" Nyangnu" yu phara" joem ri athed pyam yu" nghoid da:. Nghoid loug we' nga" byumyu" yigi nyangnu" ri ngi: shab byid lo da" Mangsoo ngoo ri Nyangnu" shid re" ci ayo" koid byid: da" yu phara" joem yo' thid go" pyam abye: go".

¹²Houg: yoomo ngoo gi mougkhung: ri gyoug dain ja: yo' lhei' nhoin' kaid wigi Yu" mau" ziyo' yu" dain wa khyoo: amyeing" byid: kaid wa.

¹³Ciwim gari nga" byumyu" yigi yooboo eig ja: shoid abye: go". Nyangnu" gi kangso' gyid bug gyid gyeing: nghoid da" ngoo mo lheing: phug lo" da:. Gyid ayo" deing jo, da" gyid teing thoem"- jo, gyam: byug da" gyid teing thoem" joem ri du: ago".

¹⁴«Israela gi join anghoid- Nyang: gi join khyo" khu: re" zi anghoid. Houg ri Ciwim yoomo nya: gyivoo yigi nyang: ri cang khaid myheig la".

¹⁵Nyangnu" gi nyang: ri khangkhyi joem yhang: ti" myeing ago". Nyangnu" gi nya: da" mougmyid ri dain" pyoid yoo koid pyam ago". Houg: lho: nya: da" voogung joem gi jhoid she: pyam zi shoug" lho: byo, yoin" jo, da:.

¹⁶Nghoid- Memphi yo' Tephan mo byumyu" yigi nya: vhukhang" ri gyoeb nhang: abye:.

¹⁷Israela we"- nang gi he: ziri nanya: gung moo ke" yu abye:. Nang gi nang ri khyoo: khyo" wigi shu" lo uri ngoo ASEING re" Mangsoo ri she: pyam kho' abye:.

¹⁸Nang gi Nila gyid lang mo gyid shug wa shid re" Egutu khyoo: yhe: ri ciyo" yu wa ein: myid la". Nang gi Uphrad gyid lang mo gyid shug wa shid re" Asuri khyoo: yhe: ri ciyo" yu wa ein: myid la".

¹⁹Nanya: akhyeing" ashoeb zigi nang ri yooboo dam byid: loo wa. Houg: lho: ngoo mo phug lo" zigi nang ri dang: phyed loo wa. Nang gi ngoo re" ASEING Mangsoo ri she: pyam kho' ziyo' ngoo moo jhug azug lo zigi khayhi' kho" lho: shoid nhung: ga: ziri yo" se' loo wa. Ngoo yoem: moo" bo myhang: thang ASEING tid bye:.

²⁰Yoem: moo" bo ASEING tid «Israela we"- Goonham' mo nga" amyeing" akhang" ri nang ngeug pyam da:. Nang gi ngoo ri tam" gyo: cang yhi: wa yo' noku wa shid re" he: pyam da:. Nang gi myhang: da" bouggung khang" moo" yo' nyau young" da" seiggam yoeb khang" moo" moo myo loug je: be: nhang: da" yu phara" joem ri no' da:.

²¹Ngoo gi nang ri ge thang da" myoug: shi" mo zabyid nei yhang: ti" sho" too" bye:. Nghoid loug we' nang ci bue" lo ziri yu" yu" we' nang gi ce: phoug" adab da" zabyid nei boeb yo' du da:.

²²Nang gi so' thain: thang da" sapya: yo' cid" pyam loug we' re" yooboo dam khoo: ri ngoo akhid" shau" myang shi" wa.

²³Nang gi Bala ri khanham ano' lo yu" ga: nanya: gung ri agyeing" ashang: akoid ein: yo" tid wa la". Langkhung" moo nang yooboo shoid lo ziri yu" yu" we' nang koid lo ziri yu" we' Nang gi amyoug: mho' da" Gola-ug lam" dain" pyoid yoo cang khaid yen" wigi tang" doin yen" ziyo' du da:.

²⁴Nyang: amyoug: mho' nyid uri hang" yo" zei: ci: wa la". Nyang: ri vho: da" aloo: kha: du: we' gye" youg: sho' yoem: aphain" ca". Nyang: gi amyoug: kaid da" ayo, moo khanham we' khyang: za: yo" kaid da:.

²⁵Israela we"- yu phara" gootu: thang: cang wigi Re" khyid: ri aso" kang pyam nhang: Re" khyung" ri we' ahei' nhang:. Nghoid loug we' nang tid zigi «Anghoid wa ngoo ayo" doem tau" loo. ngoo gi tungbau yu phara" joem ri jheddab byug bye: yoomo nyangnu" thang: khyoo: cang yhi: wa» ga: tid da:.

²⁶ASEING tid zigi «Khausu gi shoug" myheig lang" ngi: yoem" yhang: ti" Israela byumyu" nanu" dangain" nanu" khokham yi yo' gyizoug: yi nanu" khainjung yi yo' Lapi: yi ngi: yoem" loo goo" wa.

²⁷Seiggam ri nanu" nya: phoo ga: lug boem ri nanu" nya: myhi' ga: tid da" nanu" dangain" gi ngi: yoem" loo wa. He: ziri bue" loo wa. Ciwim ga: ri nanu" gi nga" jhang lheing: loo wa gungthid nga" jang" mo phug lo ago". Nghoid loug we' nanu" yau: khi" shau" uri nanu" jhang ngoo re" wigi nanu" ri khyoid yu wa shid re" ngoo ri mho' ago".

²⁸«Nanu" nya: shid re" nanu" koid yu da" yu phara" joem gi khakhyoo: loo" bye: la" Nanu" yau: khi" shoug" nyid uri nanu" ri nyangnu" yo" khyoid yu boem nghoid ri khyoid yu boem baja". Yuda we" nang moo voomoo" joem jo, myhoo' yu phara" joem yo" da:.

²⁹Nanu" myeing" myo: zigi ci: nghoid la". Nanu" gi ciwim yoomo ngoo ri thougtheung gyi koid boem la".

³⁰Ngoo gi nanu" ri yooboo dam byid: loug ce: akyu" aboo nghoid da:. Nanu" gi ngoo wigi nanu" ri jhau" shed wa akhang" abyid: nghoid ago". Nanu" gi nheig joem: yo: da" khangkhyi yhang: ti" nanu" da" Lapi: yiri said pyam abye:.

³¹Israela byumyu" yi we"- ngoo tid nyid ziri tam" gyoo: we'. Ngoo gi dain" pyoid yoo yhang: ti" moug coid yhang: ti" yo' gyoug ca" da" mougmyid yhang: ti" bue" lo" zi shau" yu" la". Hougsu" nghoid ri ciwim yoomo nanu" gi nga" jhang khanham we' atau" phang: loo" loo wa ga: nanu" nyang: vho: khyo" koid wa ein: tid boem go" la".

³²Zoomyi: nu" gi nya: da" shoung: yhoung wa phoug" dab lug ri myhi' seig gi nya: da" lo, xo' pui" byimi ri lhoung to" myhed yu" la". Nghoid loug we' nanu" gi bidnyid atho' nghab loo sho' ngoo ri to" myhed pyam ago".

³³Nanu" gi jheddab zooyam phoo yi thang: khyoo: khasu" cang khaid yhi: wa zi goo" lhoo' se' da:. Age thang da" myiyi: myhi' yi lang" nanu" mo yo" jhau" yu ago".

³⁴Nanu" da" byimi joem gi khoug" mo, byo, mo, da" suid" anghoid- myung shoo" mo, yo' yooboo ayoo" bang: da" suid" lhu: tab ci: da:. Nghoid loug we' he: gu: dangain" tho' moo

³⁵nanu" gi ‹Ngoo gi yooboo ayoo"- gyeing" nyang: ASEING gi ngoo ri nheig ayoo: loo: wa› ga: tid ago". Nghoid loug we' nanu" gi yooboo shoid bye: ga: ziri ngeug he: pyam yoomo ngoo ASEING gi nanu" ri yooboo dam byid: wa.

³⁶Nanu" gi gootu: byumyu" yi da" yu phara" joem jhang phug lo" boem da" khyo" nanu" nya: gung ri nanu" nyang: gu gyo" loo" nhang: pyam boem. Nanu" gi Asuri yi wigi nheig adeug bui" nhang: yhang: ti" Egutu yi wigi we' nheig adeug bui" nhang: zi shau" loo wa.

³⁷Nanu" gi sho' ziyo' vhuloem goeb zhug ci: lho: Egutu mo lheing: phang: loo" goo" wa. Nanu" loem nyid da" houg: bang: ri ngoo ASEING ngeug he: pyam bye:. Nanu" gi nyangnu" mo ci: we' shoug" yu wa anghoid» ga: tid.