Read Lashi YEREMIA 20 Bible Online

YEREMIA 20 - Lashi bible

YEREMIA 20

¹Imera da" yuggi zoo: Noku Yhoem: Moo" vhujhung: nghoid da" khainjung Pashara gi ngoo hid su" tid fu" ziri shoug" gyoo: lang"

²Nyang: gi ngoo ri baid wigi Noku Yhoem: Moo" adang pyam: moo: jo, da" Benyamin khoem" anam moo jangcoo" yo' tei" lhang" too" bye: da:.

³Thang: nab kyoo'- Pashura wigi ngoo ri jangcoo" mo phid: kaid thang: ngoo gi nyang: ri «ASEING gi nang ri Pashura ga: myeing amyheing nghoid da:. Nyang: wigi nang ri myheing to" zigi ‹Khyi' khang" moo" gyoug pho"› ga: zi nghoid.

⁴ASEING nyang: nyang: tid da" ‹Ngoo gi nang ri yo' re" byencang" yi shid re" gyoug pho" zi bui" nhang: wa. Houg: lho: nang gi nyangnu" gyivoo yi da" shamcoin" wigi nyangnu" dangain" said pyam khyoo: ri shau" myang wa. Ngoo gi Yuda byu dangain" ri Babelon khokham da" yoem: so' khoug: moo kaid pyam wa. Nyang: gi dayham" ri thung: byu yi khyo" nya: mungdain: khyoo: shu" lo" wigi gooji rigi said pyam wa.

⁵Ngoo gi nyangnu" gyivoo yiri he: voomoo" da" jonu" dangain" ziri lhoid yu pyam nhang: wa. Houg: lho: houg: mo jonu" dangain" ri seing: yu pyam' nhang: wa. Yuda khokham yi phoug" dab da" jonu" joem rilang" yu seing: pyam nhang: wa. Ja: khang" moo" ri Babelon khyoo: ci: loo" nhang: wa.

⁶Pashura we"- nang gi nang yo' re" yhoemkhung: byu dangain" ri myheig yu shoug" lho: Babelon khyoo: shu" lo" zi shoug" goo" wa. Houg: moo nang shid: wigi re" mhoug da" lapi: dang: ri tam" gyo: da" re" byencang" yi dangain" yo' dage" myhoeb pyam zi shoug" goo" wa.

⁷ASEING we" nang ngoo ri mhoug fain" abye:. Houg: lho: ngoo gi mhoug fain" zi shoug" bye:. Nang gi nga" tho' yoem: je boo su: nghoid. Houg: lho: nang gi ngoo ri oung: pyam abye:. Yugkhang" moo" gi ngoo ri juang" pyam bye:. Nyangnu" gi bid gyoem sho' ngoo ri yi juang" pyam ago".

⁸Ngoo dang: tid khang" moo" «Pyi: joem: sho: ziyo' phyo' shoin' zi nghoid o"» ein: nyho: yoid ca" da:. ASEING we"- re" mungdang: ri ngoo tid fu" yoomo Ngoo gi ayo, byeung" juang" ziyo' nyhab' zi shau" nyid.

⁹Nghoid loug we' ngoo gi «ASEING ri to" myhid pyam lho: Nya: myeing moo dang: atid loo wa ein: ngoo tid lang" Re" mungdang: gi myi: yhang: ti" nge" nyid da:. Ge bue" yhi: ngoo hau: ziri zoem: ci: nghoid loug we' hau: ziri ngoo ayo" zoem: ci: nghoid da:.

¹⁰Yugkhang" moo" gi Gyug pho" zi khyi' khang" moo" moo jo, da:. Houg: yoomo amyeing" akhang" yoo" bang: ri nya: lu lo" fu" shang» ga: dang: so' so' go" nyid ziri ngoo shau" gyo:. Nga" da" jhang thang byencang" yi lang" ngoo leung gyoeb loo" wa ziri lang" nyid ago". Nyangnu" gi «Nyang: gi phajhi" mhid" khyau" wigi Ngoonu" nyang: ri shoug" myheig yu wigi latoo: shoug" phug abe» ga: tid ago".

¹¹Nghoid loug we' ASEING we"- nang gi nga" shoid dab wigi yoem: gyi: lho: myhang: thang su: nghoid da:. Ngoo ri shen" yhen bang: gi soem" byug goo" wa. Nyangnu" gi oung: doid khyoo: ayoo" yoomo nyangnu" apyaid atoo: moo ngi: yoem" loo goo" wa. Nyangnu" ngi: yoem" zigi khanham we' ato" myhid pyam wa.

¹²Nghoid loug we' Myhang: thang ASEING we" Nang gi byumyu" yiri tarha" nyeung veung" ziyo' jham" yu" da:. Nyangnu" myid nheigloem: khoug: moo cibo ziri nang se' da:. Houg: yoomo nga" gyivoo yiri nang wigi latoo: phug ziri ngoo ri myang nhang: la. Ciwim gari ngoo gi nga" khyoo: ri re" lo, khoug: moo kaid too" bye:.

¹³ASEING ri jikhoin" khoin" ge'. ASEING ri coung" ge'. Nyang: gi akhyeing" da" byu yi yoem so' lo, khoug: mo zeig zoo: shoug" bang: ri khyoid yu da:.

¹⁴Ngoo khu: da" bidnyid gi nheing" khoin" zang" baja". Ngoo ri nga" myhi' wigi khu: da" bidnyid gi to" myhid pyam shoug" baja".

¹⁵«Yuggi nu" o"- nang yuggi nu" yo" abye:» ga: wigi Nga" phoo ri gau nhang: da" lu dang: tid su: gi nheing" khoin" zang" baja" o".

¹⁶Hau: yug gi: nheig khyeug myid aboo loo: ASEING wigi phyo' shoin' pyam da" Voomoo" joem yo' du baja". Hau: yug gi: nab soin: ri khe" no wigi nyho: yoid da" thui: ri yo' Nyid" gung tu: yo, ri gyi khaid wa tid poin" da" thui: ri hau: yug shoug" gyoo: baja".

¹⁷Ciwim gari hau: yug gi ngoo akhu: shi" ri ngoo ri asaid pyam yoomo nghoid da:. Hougsu" nghoid rigi nga" myhi' da" voem: doug gi nga" loeb nghoid wa bye:.

¹⁸Ngoo ciwim khu: re" la". Yau: khe" ziyo' kougshu: ziri za: shoug" kham zo: wigi Nga" kangso' ri ngi: yoem" jang" moo thang wa shid re" za: nghoid rhe".