Read Lashi YEREMIA 21 Bible Online

YEREMIA 21 - Lashi bible

YEREMIA 21

¹Yuda khokham Zedekia gi Makhia da" yuggi zoo: Pashura yo' Maseia da" yuggi zoo: khainjung Zephania ri nga" jhang nhang: kaid lho: hid su" ga: tid nhang: kaid da:.

²«Jeju" khyo" ngoonu" shid re" ASEING ri dang: tid byid: la. Ciwim gari Babelon khokham Nebukhadneza yo' nya: gyidab gi voomoo" ri vang: lheing to" ago". ASEING gi ngoonu" shid re" nya: da" mau" pho" alhoo: again joem mo daja: ri koid shug byid: lho: Nebukhadneza ri agyoo: atho' doem zoid phang: loo" nhang: abe» ga: tid nhang: da:.

³Nghoid loug Yeremia gi nyangnu" ri hid su" ga: tid. Zedekia ri tid we'.

⁴Israela da" ASEING Mangsoo tid zigi «Ngoo gi Babelon khokham ri yo' nya: gyidab ri gyi khaid zain: nyid boem da" re" gyidab ri gyo" soem" loo" nhang: wa. Re" gyizoo: yi da" gyi jonu" joem ri voomoo" voo kang khoug: moo ngoo boem too" wa.

⁵Ngoo gi nang ri nga" yoem- nga" nheig yo: khyoo:- nga" nheig joem: yo: khyoo:- nga" nheigloem: yoin khyoo: dangain" yo' gyi khaid zain: wa.

⁶Voomoo" khoug: moo nyid da" yugkhang" moo" ri ngoo said pyam wa. Byu yi gougnyhoug joem dakhyo" kyeing" za: yu" gyoug yu" lhung: sho' da" noo bui" nhang: wigi shid: loo" goo" wa.

⁷Nghoid loug we' nang yo' re" gyizoug: yi gyipui" moo- phang" khoug moo yo' noo phyoo" moo ashid: loo nyid deing jo, bang: koem' gi nanu" ri said pyam nau da" khokham Nebukhadneza yo' re" gyivoo yi wigi nanu" dangain" bang: ri ngoo myheing yu pyam nhang: wa. Nebukhadneza gi nang ri said pyam wa. Nyang: gi nanu" mo dayug ri we' nheig khyeug shoomyen: khyoo: aci: shug byid: wa.

⁸Byumyu" yiri we' xo' lho: tid we'. ASEING tid zigi «Tam" gyoo ge'. Ngoo ASEING gi nanu" ri kangso' dei khyoo: yo' shid: wa khyoo: eig loem: agyoo: moo khyen: yu wa akho: akhang" nanu" ri byid: to".

⁹Voomoo" khoug: moo nyid bang: hang" nghoid loug we' gyi khaid pui" moo anghoid lang" zooyoid shid: wa anghoid lang" noo bue" wigi shid: boem wa. Nghoid loug we' voomoo" ri khaid zain: nyid boem da" Babelon byu yi lo, khoug: khyoo: yhe: wigi lo, tu: da" yug hang" nghoid loug we' said pyam zi ashoug" wa. Nyangnu" gi neing: thang nyangnu" kangso' yo" phang: loid loo wa.

¹⁰Ngoo gi he: voomoo" ri atoem' too" loo: phyo' shoin' pyam wa shid re" myid phyed too" bye:. Hau: ziri Babelon khokham da" lo, khyoo: ngoo ab byid: pyam wa. Houg: lho: nyang: gi hau: ziri myidgung khyoo: nghe' khyo' pyam wa.

¹¹Xo' lho: Yuda khokham yhoemkhung: byu yiri tid we' «O" David yhoemkhung: byu yi ASEING da" mungdang: ri tam" gyoo: we'. ASEING tid zigi «Nyid" khang" moo" tarha" deingmain" zi bui" bye: ziri yu" we'. Mhau' fain" zi shoug" nyid da" su: ri nyang: ri mhau' fain" nyid su: lo, mo goem loem yu byid: we'. Nanu" hougsu" akoid nghoid rigi nanu" koid nyid da" akhyeing" da" moo" gi nga" nheig joem: yo: ziri ayo" said pyam loo sho' dab nge" nyid da" myi: yhang: ti" nge" nhang: loo wa.

¹³Nang Yerusalem gi janggyoin: tho' moo jo, da" lug moo" boem yhang: ti"- lang: khung" joem da" atho' myhang sho' moo yab jo, da:. Nghoid loug we' ngoo gi nang ri gyi koid wigi khaid zain: wa. Hang" dayug we' nang ri gyi ayo" khaid wa. Nanu" da" gyi goo zung joem ri hang" ayo" khyau" lid: vang yhe: wa ga: nanu tid boem.

¹⁴Nghoid loug we' ngoo gi nanu" koid da" moo" zoo" shid re" nanu" ri yooboo dam byid: wa. Ngoo gi khokham kho" ri myi: nghe' pyam wa. Hau: myi: gi hau: lheing khoem mo jo, da" ja: dangain" ri nge" pyam loo" wa. Ngoo ASEING tid bye:».