Read Lashi YEREMIA 22 Bible Online

YEREMIA 22 - Lashi bible

YEREMIA 22

¹ASEING gi ‹David da" amyed ashen nghoid da" Yuda da" khokham kho" khyoo: yhe: wigi houg: moo khokham- nya: gyizoug: yi Yerusalem byu yiri ASEING tid to" da" dang: ri tam" gyoo: boem wa shid re" yhe: tid we' ga› ngoo ri tid da:.

³Hau: zigi «Ngoo ASEING gi deingmain" ziyo' jo ziri koid wa shid re" nanu" ri amyeing" byid:. Mhau' fain" zi shau" da" su ri nyang: ri mhau' fain" su: da" lo, mo goem loem byid: we'. Tungbau byu yi coug" zoo: yi cougmoo" yiri age zi akoid goo"- azeig zoo: goo"- he: gyeung" shang: joyoo moo ce: yooboo ayo" da" bang: ri asaid pyam go".

⁴Ngoo amyeing" byid: to" yhang: ti" nanu" koid boem nghoid rigi David da" amyed ashen yigi khokham xo' bui" wa. Houg: lho: nyangnu" gi nyangnu" gyizoug: yi nyangnu" da" mung" byu yi yo' dage" myang: rheing" joem myang: joem dang moo zhung: lho: he: khokham kho" mo khoem" khyo" xo' wigi vang vang thu thu yo" koid goo" wa.

⁵Nghoid loug we' nanu" gi nga" amyeing" dang: ri atam" gyoo: acang yhi: boem nghoid rigi he: khokham kho" gi byo, yoin" byug wa ein: ziri ngoo nanu" ri jham' tang: wigi tid. Ngoo ASEING tid too" bye:.

⁶«Nga" shid re" Yuda da" khokham kho" gi Gilead mung" yo' Lebanon boem joem yhi' yung" da:. Nghoid loug we' ngoo gi hau: ziri byu hang" anyid da" jham" coug: youg joyoo koid pyam wa.

⁷Hau: ziri phyo' shoin' pyam wa byu yiri ngoo nhang: kaid byid: wa. Nyangnu" dangain" gi nyangnu" da" voozung: joem ri ci: wigi hau: shamu zeing bung: joem ri thug lheing: pyam lho: hau: zi myikhyoem' khoug: khyoo: du" zei pyam byid: goo" wa.

⁸«Hau: thang: ri houg khyo" so" lid: lo" boem da" tungbau byu yigi ngoo ASEING wigi he: gyi: sheung: da" voomoo" ri houg: yhang: ti" da" moo" ciwim koid bye: la" ga: nyang: cang" nyang: myid loo goo" wa.

⁹Houg: lang" nyangnu" gi nanu" Mangsoo nghoid da" ngoo yo' koid to" da" nanu" da" dang: theing ri nanu" she: pyam wigi yu phara" gootu: ri no' wigi dei byid: yoomo nghoid ago" ga: nyangnu" tu" loo goo" wa» ga: tid da:.

¹⁰Yuda byumyu" yi we"- Khokham Yoshia gang mo ngoug byid agyoo" goo". Nyang: shid: ziri akoug ngoug goo". Nghoid loug we' nya: yuggi zoo: Yoahaza gang mo koem gi nheig khoo" sho' ngoug ge'. Nyangnu" nyang: ri shu" lo" byug ago". Khanham we' atau" loo loo: wa. Nyang: khu: lo da" mung" ri khanham adoem myang loo wa.

¹¹ASEING gi Yuda khokham khyo" nya: pho khoo: moo khokham xo' koid su: Yosha da" yuggi zoo: Yoshaza yo' sen: wigi «Nyang: gi khanham we' adoem tau" loo loo: wa shid re" he: joyoo mo o" byug abye:.

¹²Nyang: gi nyang: ri shu" lo" da" mungdain: moo shid: wa. Houg: lho: nyang: gi he: mungdain: ri khanham we' adoem myang loo wa nghoid da» ga: tid.

¹³Adeingmain" da" khyo" yhoem: ri koid wigi hau: ziri adeing amain" khyo" wigi gyi sheing: nhang: da" su:- Nya: mang: nhung" yiri ce: aphoug" abyid: loo moo" koid nhang: wigi Nyangnu" da" bidnyid phoug" ngei abyid: da" su: gi joem: abye:.

¹⁴Ngoo gi atho' pyam: moo gooki' lid yab joem koid lho: Ngoo nya: shid re" yhoem: moo" daloem: koid wa ga: tid su: gi joem: abye:. Houg: yoomo nya: yhoem: moo bangzoo: khoem" ri shamu thi" wigi dung" tab lho: ne ziyo' xau" to" da:.

¹⁵Gootu: tho' je ge da" shamu thi" wigi nang yhoem: joem ri koid wigi hau: ze wigi nang ri je ge da" khokham bui" nhang: wa la". Re" phoo gi kang: sheing: sho' pyoo: pyoo: yo" nyid da:. Nyang: gi khanham we' tarha" deingmain" ziyo' tarha" deing byeung" wigi Nyang: koid khyoo: ja: khang" moo" moo yoo" zoo: yoo" shug khyoo: bo da:.

¹⁶Nyang: gi myung shoo" bang: ri tarha" deing byeung" da" khyo" tarha" dang: phyed wigi dangain" bang: nyid gi yab ge ago". Hau: zigi ASEING ri se' da" dang: kang: nghoid da:.

¹⁷Nghoid loug we' nang gi nanya: shid re" za: myang da:. Nang gi ce: yooboo ayo" da" bang: ri said pyam wigi Re" mung" byu yiri ajoem: theing zeig zo: da:. ASEING tid too" bye:.

¹⁸Houg: lho: ASEING gi Yoshia da" yuggi zoo: Yuda khokham Yehoiakim yo' sen: wigi «Nyang: shid: yoomo hang" we' akug ngau goo" wa. ‹Nga" byencang" phoo we"- gya: we"- gya: we"› ga: hang" atid goo" wa. Hang" dayug we' ‹Nga" aseing: we"- nga" khokham we"› ga: nya: shid re" akoug ngoug goo" wa.

¹⁹Loo zei: shid: mang ri myhoeb shoung: pyam yhang: ti" nyang: ri she: khyoid yhe: wigi Yerusalem khoem" nghe: shoid khyoo: yhe: she: pyam go" wa zi shau" loo wa» ga: tid da:.

²⁰Yerusalem byu yi we"- Lebanon khyoo: yhe: wigi nyho: we'. Bashan mung" khyoo: yhe: wigi nyho: ge' Nanu" da" myid shoin" bidnoem yi dangain" bang: gyi soem" byug bye: yoomo Moba boem joem mo nyho: yoid ge'.

²¹Nang yoo" zoo: yoo" shug uri ASEING gi nang ri dang: tid da:. Nghoid loug we' nang atam" gyoo: byid: nghoid da:. Hau: zigi nanu" pyaid goin" moo nanu" koid lo zi nghoid abye:. Nanu" gi khanham we' ASEING ri tid dang: alhoung tam" gyo: loo: nghoid da:.

²²Nanu" da" vhujhung: yigi lid wigi hau" tang" lo" zi shoug" goo" wa. Nanu" da" myid veing" bidnoem yigi gyipui" moo thung: byu yi khyo" myheig shu" loo" shau" wigi nanu" koid lo da" akhyeing" da" moo" dangain" gang mo nanu" da" voomoo" gi ngi: yoem" wigi sho' phu" zi shoug" goo" wa.

²³Nanu" gi Lebanon mung" mo de" lo da" shamu gam joem agung moo goem loem zi shau" boem wa. Nghoid loug we' myiyi: dayug zoo: khu: noo no yhang: ti" Kyi" khyeug kham zoo: ziri nang shoug" lang" nanu" gi khayhi' kyi" khyeug shoug" su: nghoid la".

²⁴ASEING gi Yuda khokham Yehoiakim da" yuggi zoo: khokham Yehoiakhin ri «Ngoo gi kangso' dei da" Mangsoo gyeing" nyang: nghoid. Nang gi nga" lo, yo lo, mo dazid lo, pain" nghoid rilang" nang ri ngoo khyoid khyo, pyam wa.

²⁵Houg: lho: nang ri said pyam nau da" byumyu" nghoid da" nanu" gyoug da" byumyu" lo, khyoo: nang ri ngoo byid: pyam wa. Ngoo gi nang ri Babelon khokham Nebukhadneza yo' nya: gyizoo: yi lo, khyoo: byid: pyam wa.

²⁶Ngoo gi nang ri yo' re" myhi' ri goo" mung" khyoo: agyoo: atho' pyoung" shu" loo" nhang: wa. Nang akhu: da" mung" khyoo: yhe: loo" wa. Houg: moo re" mitang: goin" shid: boem wa.

²⁷Nang gi he: mungdain: ri doem myang nau ri" wa. Nghoid loug we' nang khanham we' atau" loo loo: wa» ga: tid.

²⁸Ngoo gi «Khokham Yehoiakhin gi she: pyam bye: wigi hang" avho: da" jhuang: go, yhang: ti" bui" bye: la". Hau: zigi nyang: yo' nya: zooshang: yi ci: ase' to" da" mung" khyoo: pyoung" shu" loo" shau" da" khyoo: nghoid la"» ein: tid.

²⁹O"- mougmyid- mougmyid- mougmyid- ASEING tid to" ziri tam" gyoo: we'

³⁰«He: byu Yehoiakhin yug gi zooshang: yi ci: phyug wa dang: phyed zi shoug" yug Khanham we' oung: doid khyoo: ashau" wa yug nghoid da:. Nyang: gi David da" khoo: moo khokham xo' koid bang: yhang: ti" Yuda mung" ri vhoeb wa bang: nghoid wa da amyed ashen yi ayoo" wa. Ngoo ASEING tid too" bye:» ga: tid da:.