Read Lashi YEREMIA 26 Bible Online

YEREMIA 26 - Lashi bible

YEREMIA 26

¹Yoshia da" yuggi zoo: Yehoiakim Yuda khokham bue" thang: amyang" ri

²ASEING gi ngoo ri «Noku Yhoem: Moo" yhoem: vang" moo yhe: yab jo, wigi houg moo noku wa Yuda voomoo" joem mo ju" re" boem da" byumyu" yiri tid kyoo" wa ngo wigi nang ri amyeing" byid: to" gu: dangain" ri tid fu" we' Dakhoin" we' ateing too".

³Byumyu" yigi tam" gyo: wigi nyangnu" da" akhyeing" da" khyoo: joem ri to" ri to" pyam boem abe. Nyangnu" to" pyam boem nghoid rigi nyangnu" da" akhyeing" lo, moo" dangain" shid re" nyangnu" jang" moo bui" nhang: wa ein: ngoo soin' to" da" phyo' shoin' khyoo: yo' sen: wigi nga" myid moo kaid to" ziri ngoo to" pyam wa» ga: tid da:.

⁴ASEING gi byumyu" yiri tid wa shid re" ngoo ri «Nanu" ri ngoo byid: to" da" jhau" shid khyoo: ri phau" cang da" khyo" we

⁵Nanu" jhang ngoo xo' wigi nhang: kaid byid: to" da" nga" dei zoo: yi Lapi: yi da" dang: joem ri goolhoo' za: tam" gyo: da" khyo" wigi nanu" gi ngoo ri tid dang: gyoo: byid: ca" ein: ngoo ASEING tid too" bye:. Nyangnu" tid ziri nanu" khanham we' atam" gyoo: acang yhi: nghoid da:.

⁶Nanu" xo' wigi atam" gyoo: acang yhi: nghoid rigi ngoo Shilo voogung ri koid yhang: ti" he: Noku Yhoem: Moo" ri we' koid wa. Houg: lho: mougmyid gyab goin" mo byumyu" yi dangain" gi he: voomoo" byumyu" yi dangain" gi he: voomoo" myeing ri nheing" khoin" khyo" ci: loo goo" wa» ga: tid.

⁷Khainjung yi lapi: yi yo' byumyu" yi dangain" gi hid su" ga: tid da" nga" dang: ri Noku Yhoem: Moo" moo shau" gyo: ago".

⁸ASEING wigi tid wa ngoo ri amyeing" byid: to" zi dangain" ri ngoo bain tid yo' nyangnu" gi ngoo ri myheig yu wigi nyho: tid zigi «Nang gi he: gang mo said pyam wa ein: su: nghoid da:.

⁹He: Noku Yhoem: Moo" gi Shilo voogung yhang: ti" bui" wa. Houg: lho: he: voomoo" gi phyo' shoin' pyam zi shau" wigi houg moo hang" we' anyid goo" wa ein: ASEING myeing ri lang: wigi nang ciwim tid lha"» ga: nyho: tid ago".- Hau: thang: byumyu" yigi nga" jhang foem: lo ago".

¹⁰Yuda vhujhung: yigi bue" da" khyoo: ri shoug" gyoo: lang" nyangnu" gi khokham kho" mo zi Noku Yhoem: Moo" khyoo:- hain: hain: yhe: lo" wigi khoem" aseig moo joyoo yhe: yu to" ago".

¹¹Hau: thang: khainjung yi yo' lapi: yigi vhujhung: yi yo' byumyu" yiri «Byu he: yug gi said pyam wa shid re" dang: phyed zi shoug" moin: su: nghoid da:. Ciwim gari nyang: gi ngoonu" da" voomoo" ri thougtheung wigi dang: tid da:. Nanu" da" nukhyab wigi nya: dang: ri shau" gyo: abye: go"» ga: tid ago".

¹²Hau: thang: ngoo gi «He: Noku Yhoem: Moo" yo' he: voomoo" ri thougtheung wigi ngoo tid da" dang: ri nanu" shau" gyo: zi ja: khang" moo" ri tid fu" wa shid re" ASEING gi ngoo ri nhang: kaid bye:.

¹³Nanu" gi nanu" kangso' dei khyoo: yo' nanu" koid nyid boem ziri thid pyam ca" ago". Houg: lho: nanu" ASEING Mangsoo ri tid dang: gyoo: byid: ca" da:. Nanu" thid pyam nghoid rigi nyang: gi nanu" adang moo bui" nhang: wa ga: nyang: tid to" da" phyo' shoin' khyoo: yo' sen: wigi nya: myid ri thid pyam loo wa.

¹⁴Ngoo koem' gi nanu" yoem: so' lo, khoug: moo boo su: nghoid. Deingmain" ziyo' jo ein: nanu" jho: zi ce: zi nghoid nghoid ngoo ri koid ge'.

¹⁵Nghoid loug we' he: ziri se' too" ge'. Nanu" ngoo ri said nghoid rigi nanu" yo' he: voobyu yigi ce: yooboo ayo" da" byu ri said da" yooboo yo" loo goo" wa. Ciwim gari nanu" ri he: zi tid poin" byid: wa ngoo ri nhang: kaid su: gi ASEING nghoid da» ein: tid bye:.

¹⁶Houg: lang" vhujhung: yi yo' byumyu" yigi khainjung yi yo' lapi: yiri «Byu he: yug gi ngoonu" ri ngoonu" ASEING Mangso da" myeing moo dang: tid da:. Nyang: gi said pyam shoug" wa su: aeung: nghoid da» ga: tid ago".

¹⁷Hau: thang: ludaid yi dayham" to' yab wigi zeing: foem: nyid boem da" byu phung: yiri -

¹⁸«Hezekia Yuda khokham koid nyid uri Moreshed mo lapi: Mikha gi Myhang: thang ASEING tid da" khyoo: ri byumyu" yiri tid kyo". Hau: zigi ‹Ziun gi yoothung" yhang: ti" phug se: pyam zi shoug" wa. Yerusalem gi byo, yoin" jo, boem wa Houg: lho: Noku Yhoem: Moo" gi seig moo" yoo bue" byug wa› ga: tid.

¹⁹Khokham Hezekia yo' Yuda byumyu" yigi Mikha ri asaid pyam nghoid ago". Hau: gungthid Hezekia gi ASEING ri ngi: shab byid: wigi ASEING wigi myonhoo: byid: zi shoug" sho' koid yu da:. Houg: lho: ASEING gi nyangnu" ri bui" nhang: wa ga: nyang: tid to" da" yau: khe" kyi" khyeug khyoo: yo' sen: wigi nya: myid ri thid pyam da:. Akhid" ngoonu" gi hau: yau: khe" kyi" khyeug ziri ngoonu" atho' moo gyo" zang" wa khyo" bue" jo, abye:» ga: tid ago". (

²⁰Yeremia yhang: ti" he: voomoo" yo' byumyu" yiri thougtheung wigi ASEING myeing moo dang: ji da" Kiriad Yearim mo Shemaia da" yuggi zoo: Uria ga: da" byu gootu: dayug nyid lid: lo yu" da:.

²¹Khokham Yehoiakim yo' nya: gyizoo: yi gyizoug: yi Uria tid da" dang: ri shoug" gyoo: lang" khokham phoo gi nyang: ri said pyam wa soin' da:. Nghoid loug we' Uria hau: khyoo: ri shau" gyo: wigi gyoug ziyo' Egutu khyoo: phang: loid lo" byug da:.

²²Nghoid loug we' khokham Yehoiakim gi Akhbora da" yuggi zoo: Elnathan yo' gootu: byu dayham" ri Uria ri myheig yu wa Egutu khyoo: nhang: kaid da:.

²³Nyangnu" gi nyang: ri khokham Yehoiakim jhang shu" lo wigi khokham phoo gi nyang: ri said pyam wigi nya: manggung ri shava loeb moo she: pyam ago".)

²⁴Nghoid loug we' ngoo gi Shaphan da" yuggi zoo: Ahikam wigi pang" thoug byid: zi shoug" yu wigi ngoo ri byu phung: yi lo, khyoo: ab byid: wigi said pyam zi ashau" nghoid da:.