Read Lashi YEREMIA 27 Bible Online

YEREMIA 27 - Lashi bible

YEREMIA 27

¹Yoshia da" yuggi zoo: Zedekia Yuda khokham bue" thang: amyang" ri ASEING gi

²Seig thung" kyoug: moo shooyid tei" tab wigi ngoonya: shid re" kyoug: daloem: koid yu lho: hau: ziri nga" leung zeung: moo ki" wa shid re" ngoo ri tid da:.

³Hau: thang: ASEING gi nyangnu" da" moug vi: lagyoo: yi khyo" wigi Yerusalem khyoo: khokham Zedekia ri re" shoug" wa shid re" ju" re" boem da" Edom- Moba- Amon- Turu yo' Sidon khokham yiri mungdang: foin: kaid byid: wa ngoo ri tid da:.

⁴Israela da" Mangsoo- Myhang: thang da" ASEING gi ASEING tid to" ziri nyangnu" khokham yiri lo" tid kyoo" wa shid re" nyangnu" ri amyeing" byid: wa ngoo ri tid da:.

⁵Hau: zigi «Nga" gyi: sheung: da" yoem: so' yo' yoem: moo" wigi moug: gyab- xangsu: byu- mougmyid moo nyid da" gougnyhoug dangain" ri ngoo phain" so: to". Houg: lho: hau: ziri ngoo khyen: yu su: hang" ri nghoid loug ngoo byid: da:.

⁶Ngoo gi nga" da" dei zoo: Babelon khokham Nebukhadneza da" yoem: so' lo, khoug: moo hau: byumyu" dangain" ri koid too" byid: su: nghoid. Nyang: ri dei byid: wa siyoo gougnyhoug lam" joem rilang" phain" so: too" byid: bye:.

⁷Byumyu" dangain" gi nyang: ri dei byid: wigi nyang: seing: da" byumyu" mungdain: gyoeb gyo" byug da" ayo, ju" sho' nyangnu" gi nya: yuggi zoo: yi nya: myid: zoo: yiri dei byid: loo goo" wa. Hau: thang: nya: byumyu" yigi yoem: so' bo da" byumyu" yi yo' gyi: sheung: da" khokham yiri dei byid: loo goo" wa.

⁸«Nghoid loug we' byumyu"- mungdain: daloem: loem: gi nya: da" vhoebkhang" da" akhoug: moo anyid wa nghoid ri ngoo gi hau: byumyu" ri gyi bue"- zooyoid khyoo:- noo bui" nhang: da" khyoo: khyo" yooboo dam byid: ziyo' hau: ziri ngoo wigi Nebukhadneza ri bain sho' phyo' shoin' pyam nhang: wa.

⁹Nanu" da" lapi: yi dang: ri atam" gyoo goo". Dayug yug yhoebmo, khyo" shid: bang: da" soobyoo ri khe: da" khyo" fa" da" khyo" ju" loo wa ayo, shid re" lapi: yo" pe: ga: tid su: da" dang: ri we' atam" gyoo: goo". Nyangnu" dangain" bang: gi nanu" ri Babelon khokham da" lo, khoug: moo: anyid wa shid re" tid ago".

¹⁰Nyangnu" gi nanu" ri mhau' fain" nyid wigi nanu" da" mungdain: mo shu" lo" byug wa khyoo: nanu" ri bui" nhang: loo wa. Nanu" ri ngoo khaid thu pyam wigi nanu" phyo' shoin' pyam zi shoug" goo" wa.

¹¹Nghoid loug we' Babelon khokham lo, khoug: moo: nyid wa kham: yu wigi nyang: ri dei byid: da" byumyu" kha: kung: nghoid nghoid ngoo gi nya: mungdain: moo nyid nhang: wigi hougmoo: yoo koid wigi nyid nhang: wa. Ngoo ASEING tid too" bye:» ga: tid.

¹²Ngoo gi Yuda khokham Zedekia ri we' hougsu" kyeing" tid bye:. Hau: zigi «Babelon khokham jhang nyid wa shid re" kham: yu we'. Nyang: yo' byumyu" yiri dei nyid wigi nang dei nyid wa.

¹³Nang yo' re" mung" byu yi gyipui" moo zooyoid jang" moo noo bue" wigi ciwim yoomo shid: goo" wa lha". Hau: zigi Babelon khokham lo, khoug: moo nyid wa ziri akham: yu da" byumyu" yi jhang bui" wa ga: ASEING tid to" da" khyoo: nghoid da:.

¹⁴Nyang: ri asoem" abyid: lo, atu: wa shid re" nang ri tid da" lapi: yi dang: ri atam" gyoo: byid:. Nyangnu" gi nang ri mhau' fain" nyid ago".

¹⁵ASEING gi houg: bang: ri nyang: wigi nhang: kaid zi anghoid. Nyangnu" gi ASEING myeing ri mhau' nyid bang: nghoid ago" ga: nyang: tid to" abye:. Houg: yoomo nyang: gi nanu" ri khaid thu pyam loo goo" wa. Nanu" yo' nanu" ri he: mhau" dang: joem ri tid boem da" lapi: yi nanu" said pyam shoug" loo goo" wa» ein: da" dang: nyang: tid kyoo" bye:.

¹⁶Hau: thang: ngoo gi ASEING tid to" da" dang: ri khainjung yi yo' byumyu" yiri tid kyoo" bye:. Hau: zigi «Noku Yhoem: Moo" moo phoug" dab jonu" joem gi amyang" ri Babelon mo doem ci: lo goo" wa ga: tid boem da" lapi: yi dang: ri atam" gyoo: goo"- nyangnu" nanu" ri mhau' nyid ago".

¹⁷Nyangnu" dang: ri atam" gyoo: goo" Babelon khokham vhoeb da" lo, khoug: moo nyid wa shid re" kham: yu wigi nanu" yo" dei nyid wa. He: voomoo" gi ciwim byo, yoin" jo, wa la.

¹⁸Nyangnu" lapi: gyeing" nyang: nghoid boem ri nyangnu" nga" mungdang: ri yo" boem nghoid ri Noku Yhoem: Moo" yo' khokham kho" moo deing jo, da" jonu" joem ri Babelon mung" khyoo: aci: loo" nhang: wa shid re" ngoo myhang: thang ASEING ri nyangnu" mho' baja".

¹⁹(Khokham Nebukhadneza wigi Yehoiakim da" yuggi zoo: Yuda khokham Yehoiakhin yo' Yuda yo' Yerusalem mo vhujhung: yiri Babelon mung" khyoo: shoem" shu" lo" uri nyang: gi zeing boung: joem gyid: mid" gyid thung" lhang"- rheing" joem yo' Noku Yhoem: Moo" mo jonu" gootu: dayham" ri teing too" kho' da:.)

²¹Noku Yhoem: Moo" yo' Yerusalem mo khokham kho" moo deing jo, da" jonu" joem khyoo: yo' sen: wigi Israela da" Mangsoo- myhang: thang ASEING ngoo tid da" dang: ri tam" gyoo: ge'.

²²Hau: jonu" joem gi Babelon khyoo: shoem" ci: lo" zi shau" wigi hau: zi joem ri ngoo doem myid boin: lo da" ayo, ju" sho' houg: moo jo, jo, wa. Hau: thang: ngoo gi hau: joem ri doem tau" yu wigi he: joyoo moo hau: joem ri doem kaid too" wa. Ngoo ASEING tid too" bye:» ga: zi nghoid.