Read Lashi YEREMIA 29 Bible Online

YEREMIA 29 - Lashi bible

YEREMIA 29

¹Khainjung yi lapi: yi Byumyu" yi da" vhujhung: yi yo' Nebukhadneza wigi thung: byu yi khyo" Yerusalem mo zi Babelon mung" khyoo: pyoung" shu" loo" shau" boem da" gootu: dangain" bang: jhang ngoo mougsoug" lhid" foin: kaid.

²Ngoo gi he: ziri khokham Yehoiakhin- nya: myhi'- khokham kho" zoug: yi Yuda yo' Yerusalem vhujhung: yi lo, moo" zei: bang:- lo, moo" dab bang: ri pyoung" shu" lo" byug thang: ri lhid" zi nghoid.

³Ngoo gi mougsoug" ri Yuda khokham Zedekia wigi Babelon khokham Nebukhadneza jhang nhang: kaid da" Shaphan da" yuggi zoo: Elasa yo' Hilkia da" yuggi zoo: Gamaria ri byid: kaid da:. Hau: mougsoug" moo

⁴«Israela da" Mangsoo- myhang: thang ASEING gi thung: byu yi khyo" Yerusalem mo Babelon khyoo: Nebukhadneza ri myheig shu" loo" nhang: pyam da" byumyu" dangain" ri tid da:.

⁵‹Yhoem: ri koid wigi tam: nyid ge'. khyam: koid wigi nanu" yo" zi zo: lho: nyid we'.

⁶Lo, xo' wigi zooshang: khu: ge'. Nanu" zooshang: yiri we lo, xo' yu nhang: ge'. Nyangnu" we' zooshang: yoo" goo" baja". Nanu" gi myo: je: loo ca"- age neing: loo" nhang:.

⁷Ngoo wigi thung: byu khyo" nanu" ri yhe: nhang: da" joyoo mo voogung joem shid re" ge da" moo" koid we'. Nyangnu" gungthid ngoo ri akyu" mho' ge'. Ciwim gari nyangnu" yoo" zoo: yoo" shug lo ri nanu" we' yoo" zoo: yoo" shug wa.

⁸Nanu" phung: moo nyid boem da" lapi: yi wigi we' ju" loo wa ayo, shid re" lapi: yo" pe: ga: tid boem da" gootu: hang" wigi we' nanu" ri amhoug fain" nhang: boem wa shid re" Israela da" Mangsoo Ngoo ASEING nanu" ri tid poin: byid: da:. Nyangnu" da" yhoebmo, joem ri we' atam" gyoo: goo".

⁹Nyangnu" gi nga" myeing ri lang: wigi nanu" ri mhau' nyid ago". Nyangnu" ri ngoo anhang: kaid. Ngoo myhang: thang ASEING tid too" bye:.

¹⁰«ASEING tid zigi ‹Babelon da" nyhed xi: zain thang loo" lang" ngoo gi nanu" ri nheig khyeug myid ci: shug byid: wa. Nanu" ri yhoem: khyoo: doem shu" yu wa ein: tid to" da" nga" dangsoo" ri pyeing byid: wa.

¹¹Nanu" shid re" ngoo soin' to" da" khyoo: ri ngoo dayug za: dase'. Houg: zigi nanu" shid re" nyid gi yab ge khyoo:- nanu" myid byu da" ju" loo wa da" ayo, yo' sen: da" zi nghoid. Houg zigi yau: khe" kyi" khyeug khyoo: anghoid.

¹²Houg: lang" nanu" ngoo ri yoid loo goo" wa. Nanu" nga" jhang re" wigi akyu" mho' loo goo" wa. Houg: lho: ngoo nanu" ri tu" byid: wa.

¹³Nanu" ngoo ri sho: loo goo" wa. Nanu oung: khoug: nheigloem: dangain" yo' ngoo ri shoo: wa nghoid yoomo ngoo ri myang loo wa.

¹⁴Nghoid bye:. Ngoo tid zigi nanu" ngoo ri myang boem goo" wa. Ngoo gi nanu" ri nanu" da" mougmyid moo doem nyid nhang: wa. Mungdain: loem: khang" moo" mo yo' ngo wigi nyhid: sain" to" da" joyoo khyi' khang" moo" mo ngoo nanu" ri zheing" yu wa. Ngo wigi pyoung" she: nyhid: pyam bye: da" joyoo mo zi mungdain: khyoo: ngoo doem shu" tau" yu wa. Ngoo ASEING tid too" bye:.

¹⁵«ASEING gi Babelon mung" moo nanu" ri lapi: yiri byid: to" abye: ga: nanu" tid ago".

¹⁶David vhoeb lo da" mungdain: ri vhoeb da" khokham yi yo' sen: wigi we' thung: byu yi khyo" nanu" yo' dage" myheig shu" lo" zi ashau" bang: nghoid boem da" nanu" bidnoem seing" cang" yi nghoid da" he: voomoo" byu yi yo' sen: wigi we' ASEING tid da" dang: ri tam" gyoo: we'.

¹⁷Myhang: thang ASEING tid zigi ‹Ngoo gi gyipui"- zooyoid khyoo:- noo bue" khyoo: ri nyangnu" jang" moo ju" nhang: wigi ngoo gi nyangnu" ri zoo: wa agi loo: sho' boeb da" lafoem' shi" yhang: ti" bui" nhang: wa.

¹⁸Ngoo gi nyangnu" ri gyipui"- zooyoid khyoo:- noo bue" khyoo: wigi cang khaid lho: mougmyid goin" mo byumyu" dangain" gi nyangnu" ri shau" myang wigi gyoug dain byug goo" wa. Khyi' khang" moo" khyoo: ngo wigi nyhid: sain" kaid wigi nyangnu" adang moo bue" ziri byu joem gi mo, byug wigi gyoug dain byug goo" wa. Byu yigi nyangnu" ri juang" wigi nyangnu" myeing ri nheing" khoin" khyo" ci: loo goo" wa.

¹⁹Nga" dei zoo: yi nghoid da" lapi: yi nhoid khyo" nyangnu" ri xo' wigi foin: kaid da" mungdang: ri nyangnu" atam" gyoo: acang yhi: boem yoomo nyangnu" adang moo he: zi bue" loo wa. Tam" gyoo: wa shid re" nyangnu" ngeug he: pyam da:.

²⁰Babelon mung" khyoo: ngo wigi pyoung" shu" loo" nhang: kaid da" nanu" dangain" bang: ngoo ASEING tid dang: ri tam" gyoo: ge'.

²¹«Israela da" Mangsoo- myhang: thang ASEING gi nya: myeing moo nanu" ri mhau' tid da" bang: nghoid boem da" Kolaia da" yuggi zoo: Ahab yo' Maseia da" yuggi zoo: Zedekia da" khyoo: yo' sen: wigi tid to" da:. Nyang: gi nya: eig yug ri Nebukhadneza da" yoem: so' khoug: moo ab pyam wigi hau: yug gi: nanu" myo, jang moo hau: eig yug ri said pyam wa.

²²Thung: byu khyo" Yerusalem mo zi Babelon khyoo: myheig shu" loo" shoug" bang: dayug yug ri nheing" khoin" kaid nau rigi nyangnu" gi ‹Babelon khokham wigi adei said pyam shau" da" Zedekia yo' Ahab ri yhang: ti" ASEING nang ri koid baja" o"› ga: tid loo goo" wa.

²³Nyangnu" gi yu" gyoug yu" lhung: sho' da" yooboo joem nghoid da" myi: shoid lang shoid khyoo: ASEING myeing ri lang: wigi mhau' dang: tid da" yooboo yo" boem yoomo he: zigi nyangnu" da" vhu" pi: lo, kyo' nghoid loo wa. He: zigi ASEING myid vho: khyoo: ri thougtheung zi nghoid. Nyangnu" cikoid lo ziri nyang: se' da:. Nyang: gi nyangnu" ri thougtheung da" sagse: nghoid da:. ASEING tid to" abye:» ga: tid.

²⁴Israela da" Mangsoo- myhang: thang ASEING gi Nehelam byu Shemaia shid re" mungdang: ngoo ri byid: da:. Hau: yug gi nyang: nya: myeing khyo" Yerusalem byu yi dangain" yo' Maseia da" yuggi zoo: lapi: Zephania ri khainjung gooji yi dangain" ri mougsoug" foin: kaid da:. He: mougsoug" moo Shemaia wigi: Zephania ri lhid" kaid zigi

²⁶«ASEING gi Yehoiada da" khoo: moo nang ri khainjung koid nhang: wigi akhid" nang gi Noku Yhoem: Moo" mo vhujhung: moo" nghoid abye:. Lapi: nghoid goin koid wigi nya: leung zeung: moo jangcoo" yo' joto' leung kui" kaid wigi nyid da" byukoo" yugkhang" moo" ri yu" wa shid re" gi: re" moo" nghoid da:.

²⁷Lapi: nghoid da" khyo" dang: ji lo da" Anathod voobyu Yeremia ri hid su" nang ciwim akoid la"

²⁸Nyang: gi Babelon mung" moo nyid da" bang: ri nyangnu" thung: byu khyo" myang" sho' nyid wigi yhoem: joem koid- ayang: zhug nyid shivoo: sho"- khyam: koid- shoo" zoo: shoo" shug nyid boem wa khyo" tid yoomo nyang: ri toem' pyam ca" da» ga: zi nghoid.

²⁹Zephania gi hau: foin: mougsoug" ngoo ri nghab kyo" wigi

³⁰ASEING gi ngoo ri

³¹He: Shemaia khyoo: yo' sen da" mungdang: ri Babelon mung" moo nyid boem da" thung: byu yi dangain" ri foin: kaid wa tid da:. Hau: zigi «Ngoo ASEING gi Shemaia yo' nya: amyed ashen yiri yooboo dam byid: wa. Nyang: ri ngoo anhang: kaid nghoid loug we' nyang: gi lapi: yhang: ti" nanu" ri dang: ji wigi mhau' dang: ri nyang: nanu" ri loem" nhang: da:. Nyang: gi nanu" phung: gung moo amyed ashen yi ayoo" goo" wa. Nyang: gi nga" byu yiri ngo wigi koid byid: wa da" ge da" ja: yo" myang sho' ayo" dei nyid wa. Ciwim gari nyang: gi nyangnu" ngoo ri thougtheung wa shid re" tid da:. Ngoo ASEING tid too" bye:» ga: tid.