Read Lashi YEREMIA 30 Bible Online

YEREMIA 30 - Lashi bible

YEREMIA 30

¹Israela ASEING Mangsoo gi

²ngoo ri «Ngoo nang ri tid da" gu: ja: khang" moo" ri mougsoug" pug moo lhid" too" we'.

³Ciwim gari nga" byumyu" Israela yo' Yuda ri doem shu" tau" wa ayo, ju" lo nyid da:. Ngoo gi nyangnu" phoug" phyid" yiri byid: to" da" mungdain: khyoo: nyangnu" ri doem shu" tau" lo wigi nyangnu" hau: ziri doem yo" seing: yu loo goo" wa. Ngoo ASEING tid too" bye:» ga: tid da:.

⁴ASEING gi Israela yo' Yuda byumyu" yiri

⁵«Ngoo gi ngei pyo: yug yo da" thui: ri anghoid. gyoug dain da" thui: yo' gyoug da" thui: ri shoug" gyoo: bye:.

⁶Akhid" theing: lho: myid yu" ge'. Yuggi dayug gi zooshang: yo" khu: la". Houg ri ciwim yoomo yuggi yugkhang" moo" gi zoo: khu: da" myiyi: yhang: ti" Lo, ri nya: voem doug: dang moo ke" ci: ziri ngoo shau" myang la". Yugkhang" moo" ciwim houg: yhi' boo" boo" wim go" lha".

⁷Gyug dain pho" da" bidnyid gi ju" lo nyid da:. Nga" byumyu" yi shid re" gootu: bidnyid yo' ayo" tu' da" Kyi" khyeug da" ayo, ju" lo nyid da:. Nghoid loug we' nyangnu" gi nyid deing nyid goo" wa» ga.

⁸Myhang: thang ASEING tid zigi «Hau: bidnyid ju" loo lang" nyangnu" leung zeung: mo voin ci: da" kyoug: ri baid khyau" pyam lho: nyangnu" da" jangcoo" joem ri yu pyam byid: wa. Houg: lho: nyangnu" gi tungbau byu yi da" join yi anghoid loogoo" wa.

⁹Hau: gungthid- nyangnu" gi nyangnu" Mangsoo- ngoo ASEING ri we' ngoo wigi khokham khyo" nyang: ri zhungtang moo zhung: nhang: da" David da" amyed ashen dayug ri dei byid: loo goo" wa.

¹⁰Nga" byumyu" yi we"- agyug goo"- Israela byumyu" yi we"- agyug goo"- adain goo". Ngoo gi nanu" ri hau: ve: da" mungdain: mo nanu" thung: byu bue" nyid boem da" mungdain: mo nanu" ri khyoid yu wa. Nanu" yhoem: khyoo: tau" lo wigi ngei pyoo: yug yoo tung" shoug" nyid loo goo" wa. Nanu" goem loem khyoo: shoug" yu wigi hang" dayug we' nanu" ri kyug nhain' wa zi anghoid.

¹¹Ngoo gi nanu" jhang re" wigi khyoid yu wa. Ngoo wigi nanu" ri nyhid: sain" to" da" joyoo mo byu yi dangain" ri said toem" pyam wa. Nghoid loug we' nanu" rigi ngoo asaid toem" pyam wa. Ngoo nanu" ri yooboo dam abyid: loo za: anhang: kaid wa. Nghoid loug we' ngoo nanu" ri yooboo dam byid: uri nyeung veung" khyo" koid wa. Ngoo ASEING tid too" bye:.

¹²ASEING gi nya: byumyu" yiri «Nanu" da" dam joem gi age byang" nghoid da:. Nanu" da" noo dam joem gi ayo" byang" gi nghoid da:.

¹³Nanu" ri yu" coung: byid: wa byu hang" anyid. Nanu" dam joid ri hang" aphoo: byid:. Byang" gi byid: wa nanu" shid re" myid byu khyoo: ajo,.

¹⁴Nanu" da" jheddab bang: dangain" gi nanu" ri to" myhid pyam abye: go". Nyangnu" gi nanu" ri ci: asoin: loo goo" nghoid da:. Ngoo gi nanu" ri gyivoo yiri yhang: ti" khaid zain: wa. Nanu" da" yooboo joem sung myo: ziyo' Nanu" da" akhyeing" ashoeb moo" gi sung xoo: yoomo nanu" da" yooboo dam gi gye" gyi: da:.

¹⁵Nanu" da" noo dam yo' sen: wigi myeing" amyoo: goo". Nanu" shid re" byang" gi wa khyoo: ajo,. Nanu" da" yooboo joem gi sung myo: ziyo' nanu" da" akhyeing" zi sung xoo: yoomo ngoo nanu" ri hid: su" yooboo dam byid: zi nghoid.

¹⁶Nghoid loug we' akhid"- nanu" ri ngaid zoo: bang: dangain" ngaid zo: zi shoug" wa. Nanu" da" gyivoo yigi thung: byu yi khyo" myheig yu pyam zi shau" boem goo" wa. Nanu" ri zeig zoo: bang: dangain" gi zeig zo: zi shau" boem wa. Nanu" ri lhoid zoo: bang: dangain" gi lhoid zo: zi shau" boem wa.

¹⁷Ngoo gi nanu" ri goolhoo' za: doem koid wa. Nanu" gyivoo yi «Ziun gi tungbau nghoid abye:- nyang: ri hang" ci: asoin: loo» ga: tid sho' nghoid loug we' Ngoo gi nanu" dam ri byang" gi byid: wa. Ngoo ASEING tid too" bye:».

¹⁸ASEING tid zigi «Nga" byumyu" yiri nyangnu" da" mougmyid doem byid: wa. Houg: lho: yhoemkhung: khang" moo" ri nheig khyeug byid: wa. Yerusalem gi doem tam: to" zi shau" wigi Hougmo khokham kho" gi doem zhug to" zi shoug" wa.

¹⁹Houg moo nyid bang: gi coung" nghei jikhoin" khoin" loo goo" wa. Nyangnu" gau wigi nyho: loo goo" wa. Nga" mainkaid jeju" yoomo nyangnu" je myo: loo goo" wa. Nga" mainkaid jeju" gi nyangnu" ri ngi: shab byid: loo wa.

²⁰Ngoo gi byumyu" yi da" goonham' mo yoem: so' ri doem byid: wigi hau: ziri geing: teing sho' doem koid wa. Nyangnu" ri zeig zoo: bang: dangain" ri ngoo yooboo dam byid: wa.

²¹Nyangnu" da" vhoebkhang" su: gi nyangnu" nya: byumyu" mo thu loo wa. Nyangnu" da" khokham nya: zoo: gi nyangnu" nya: byumyu" mo thu loo wa. Nyang: ri ngoo khi: lang" nyang: gi nga" jhang tab lo loo wa. Akhe: ri hang" voem" loo wa la. Nyangnu" gi nga" byu yi nghoid lo wigi ngoo gi nyangnu" Mangsoo nghoid wa. Ngoo ASEING tid too" bye:».

²³ASEING da" nheig yo: zigi uglid nghoid. Hau: akhyeing" bang: vhuloem joem moo hau' zang" wa thain: da" uglid nghoid da:. Hau: zigi nyang: koid wa soin' to" gu: abain koid koid gi athang wa. Ju" loo wa bidnyid moo byu yigi he: ziri kyo' kyo' za: se' gyo: loo" goo" wa.