Read Lashi YEREMIA 31 Bible Online

YEREMIA 31 - Lashi bible

YEREMIA 31

¹ASEING tid zigi «Ngoo gi Israela byumyu" kung: joem dangain" da" Mangsoo bue" lo wigi nyangnu" gi nga" byumyu" bue" loo goo" wa da" ayo, ju" lo nyid da:.

²Shid: jang" mo loid byoin bang: ri dain" pyoid yoo moo ngoo nheig khyeug myid ci: shug byid: bye:. Israela byumyu" yi doug shau" noo: wa ziri myid boem lang"

³Ve: da" joyoo mo ngoo nyangnu" ri yhe: nyid shug bye:. Israela byumyu" yi we"- Ngoo nanu" ri khanham we' jheddab nyid. Houg: lho: xo' lho: nga" abyo, abei: da" jheddab myid nanu" ri ci: shug byid: wa.

⁴Nanu" ri ngoo dalheing: doem coung: yu wa. Nanu" gi dalheing: doem nanu" da" jhu: jang ri koid: yu wigi ngei pyoo: tung" go" loo goo" wa.

⁵Nanu" gi Samari bouggung joem moo zabyid khyam: dalheing: doem sho" wigi hau: joem ri sho" da" bang: gi zabyid khyam: moo zei: da" ashi" ri shoug" zo: loo goo" wa.

⁶Nghoid bye:- zung" bang: gi Ephrim bouggung joem mo ‹Ziun khyoo: do, yhi: shang- ngoonu" ASEING Mangso jhang do, yhi: shang› ga: yoid tid kaid da" ayo, ju" loo wa» ga: tid da:.

⁷ASEING tid zigi «Byumyu" yi da" gyi: sheung: thang da" Israela gang mo ngei pyoo: tung" jikhoin" khoin" ge'. Nanu" da" coung" nghei jikhoin" khoin" ge'. ‹ASEING gi nya: byumyu" yiri khyoid yu bye:. Nyang: gi deing da" bang: dangain" ri khyoid yu bye:.

⁸Nyangnu" gi nyangnu" ri mougzhung: shoid mo shu" lo wigi moug: thang myid thang mo nyangnu" ri ngoo zheing" yu wa. Myo, jed khyid: gyoug: bang:- zoo: voin bang: yo' zoo: khu: wa jhang bang: gi Nyangnu" yo' dage" ju" lo loo goo" wa. Nyangnu" gi byumyu" zeing khyo" doem lo boem goo" wa.

⁹Nga" byumyu" yigi ngoo nyangnu" ri shu" tau" lo uri ngau zoo" re akyu" mho' wigi tau" loo goo" wa. Ngoo gi nyangnu" ri gyid zoo: gyung: khyo" nyangnu" khyid: vhu" azang" thung" wa da" khyoo: dam khyo" shu" yhi: wa. Ngoo gi Israela da" nya: phoo nghoid wigi Ephrim gi nga" zooshid" yuggi zoo: nghoid da» ga: tid.

¹⁰ASEING tid zigi «Byumyu" yi we"- nga" dang: ri tam" gyoo: ge'. Nga" mungdang: joem ri gyid yam mo zi ve: da" joyoo khyoo: tid fu" kaid ge'. Nga" byumyu" yiri ngoo nyhid: sain" kaid bye:- nghoid loug we' ngoo nyangnu" ri doem zheing" yu wa. Houg: lho: yang zung" su: gi nya: yang kyung ri goem loem byid: yhang: ti" nyangnu" ri ngoo goem loem byid: wa.

¹¹Israela byumyu" yiri ngoo loid byoin nhang: bye:. Houg: lho: yoem: gyi: da" byumyu" yi lo, mo nyangnu" ri ngoo khyoid yu bye:.

¹²Nyangnu" re" wigi Ziun boem tho' moo ngei pyo: jikhoin" khoin" boem wa. Houg: lho: nga" jhungshug joem yoomo gau boem goo" wa. Hau: jhungshug joem gi shivoo- zabyid yhid:- zhainloin: xu: Yang yo' nu: jhungshug joem nghoid da:. Nyangnu" gi gyid goolhoo' za: shoin" da" khyam: yo' du loo goo" wa. Nyangnu" ca" ja: ja: khang" moo" yo" yu loo goo" wa.

¹³Houg: lang" myiyi: nu" yigi go" wigi ngei pyo: nyid boem goo" wa. Houg: lho: yuggi yi gyi: su: ngi su: ngei pyo: loo goo" wa. Nyangnu" ri ngoo nheig teing byid: lho: nyangnu" koug ngau zigi gau zi Nyangnu" nheig koug zigi ngei pyo: khyoo: bue" loo nhang: wa.

¹⁴Khainjung yiri zoo: noem gi yo' ngoo pyeing byid: wa. Houg: lho: nga" byumyu" yi ca" khyoo: dangain" ziri ngoo nheugdeug nhang: wa. Ngoo ASEING tid too" bye:»

¹⁵ASEING tid zigi «Rama mo thui: dathui: shau" gyo: Nheig khoo" sho' ngau da" thui: ri shau" gyo:. Rakhela gi nya: zooshang: yi shid re" ngau nyid da:. Nyangnu" anyid loo: nghoid da:. Nheig teing byid: wa ziri nyang: he: pyam da:.

¹⁶Nang ngau nyid ziri theing: pyam we'. Houg: lho: re" ngau byid joem ri soid pyam we'. Re" zooshang: yi shid re" nang koid da" moo" dangain" aphoug" jhungshug ayoo" loo abui" wa. Nyangnu" gi gyivoo yi mungdain: mo doem tau" lo boem wa.

¹⁷Ju" loo wa da" ayo, shid re" re" myid byu khyoo: jo, da:. Re" zooshang: yigi yhoem: khyoo: doem tau" loo goo" wa. Ngoo ASEING tid too" bye:.

¹⁸«Israela byu yigi koug wigi tid da" dang: ri ngoo shau" gyo:. Hau: zigi ‹ASEING we"- ngoonu" gi mi" sho' ajhau" to" da" gougnyhoug yo' du da:. Nghoid loug we' nang ngoonu" ri tid dang: tam" gyoo: wa jhau" byid: bye:. Ngoonu" ri doem shu" tau" loo" la. Ngoonu" gi nang ngoonu" da" ASEING Mangsoo jhang doem tau" loo wa jen" jen" nghoid.

¹⁹Ngoonu" nang mo nung phug lo" boem bye:. Nghoid loug we' houg jang: ngoonu" doem tau" loo" noug bye:. Nang ngoonu" ri yooboo dam byid: thang: koug wigi ngoonu" vhuloem ri goeb tau" ci: bye:. Ngoonu" sho' phu" wigi ngi: yoem" bye:. Ciwim gari ngoonu" ngi shi" ayo, ri yooboo shoid boem bye:.›

²⁰Israela we"- nang gi nga" da" jheddab thang da" yuggi zoo: Nga" jheddab thang da" zooshang: nghoid da:. Re" myeing ri ngoo tid khang" moo" jheddab myid yo' ngoo nang ri myid da:. Nga" nheigloem: nang yo' dage" nghoid wigi nang ri ngoo nheig khyeug byid: wa.

²¹Asoo" to" to" wigi khyoo: ri laxoem" koid ge'. Nanu" lid: too" kho' da" khyoo: ri doem shoo: we'. Israela byumyu" yi we"- doem tau" loo ge'. Nanu" too" kho' da" voogung joem mo yhoem: khyo: doem tau" loo we'.

²²Loem khau: myid abo da" byu yi we"- khamyhang ju" sho' ne" nyid boem shi" goo" wa la". Ngoo gi shai" da" moo" aseig daja: ri ngoo phain" so: too" bye:. Hau: zigi myiyi: dayug gi yuggi dayug ri goem loem byid: yhang: ti" shai" da:. Moo" aseig daja: ri ngoo phain" so: too" bye:» ga: tid da:.

²³Israela da" Mangsoo myhang: thang ASEING tid zigi «Byumyu" yiri nyangnu" mougmyid ri doem soin' byid: lang" nyangnu" gi Yuda mung" yo' hau: da" voogung joem moo ‹ASEING gi nyang: nyid da" gyeung" shang: joyoo Yerusalem da" younglho' bouggung ri mainkaid byid: baja" ga: dalheing: doem tid loo goo" wa.

²⁴Byumyu" yigi Yuda yo' hau: da" voogung joem dangain" moo nyid loo goo" wa. Hougmoo: yoo koid zoo: bang:- nyangnu" yang kyung joem ri zung" bang: nghoid loo goo" wa.

²⁵Myung: bang: ri ngoo yoem: doem lung: byid: wa. Zoo yoid bang: yugkhang" moo" ri zoo: noem wigi nheugdeug nhang: wa.

²⁶Houg: lang" byumyu" yigi ‹Ngoo yhoeb myhid lo" wigi yoem: seig yo' doem so" re"› ga: tid goo" wa.

²⁷«Ngoo ASEING ri Israela yo' Yuda mung" ri ngo wigi byu yo' gougnyhoug joem byeung" nhang: wa da" ayo, ju" lo nyid da:.

²⁸Phoin' pyam khyo" lang: khyo' pyam khyo" she: pyam pyam khyo" phyo' shoin' pyam khyo" phyo' tang" pyam khyo" nyangnu" ri shen" lo ziyo' dayhang: ti" nyangnu" ri ngoo doem sho" to" wigi tu: zhug to" byid: wa.

²⁹Hau: ayo, ju" loo lang" ‹Byumyu" yigi myhi' phoo yi zabyid shijhen: zo: wigi zooshang: yi zei: kyoem: ago" ga: atid loo goo" wa.

³⁰Hau: gungthid zabyid shijhen: zoo: su: hang" nghoid loug we' nyang: nya: zei: kyoem: loo goo" wa. Yugkhang" moo" gi nyang: nya: yooboo yoomo shid: loo goo" wa› ga: tid da:.

³¹ASEING tid zigi «Yuda byu yi yo' Israela byu yi yo' ngoo dang: theing aseig koid wa da" ayo, ju" lo nyid da:.

³²Ngoo gi nyangnu" ri lo, mo she: wigi Egutu mung" mo shu" thu lo uri nyangnu" phoug" phyid" yi yo' ngoo koid to" da" dang: theing axoug" yo' adu wa. Ngoo nyangnu" ri yhoem: seing: phoo yhang: ti" koid sho' nghoid loug we' nyangnu" nga" dang: theing ri aphoug" cang nghoid ago".

³³Israela byu yi yo' ngoo koid wa da" dang: theing aseig gi hid su" nghoid da:. Nga" tarha" ri nyangnu" khoug: moo kaid byid: wigi hau: ziri nyangnu" nheigloem: khoug: moo lhid" tab too" wa. Ngoo gi nyangnu" Mangsoo bue" wigi nyangnu" gi nga" byumyu" yi bue" loo goo" wa.

³⁴Nyangnu" mo hang" dayug we' nyangnu" da" yhoem: kyoo" cang" yiri ASEING ri si' wa shid re" jhau" shid byid: aca" loo wa. Ciwim gari: nge thang yug mo gyi: thang yug ju" sho' dangain" bang: ngoo ri se' loo goo" wa. Nyangnu" yooboo joem ri ngoo khyoid pyam byid: wigi nyangnu" shoid da" lo, moo" joem ri khanham ngoo amyid boin: loo wa. Ngoo ASEING tid too" bye:.

³⁵ASEING gi nyid" ri bang wa shid re" bid myen" ri zhoo: wa shid re" lhammoo" yo' kyi: joem ri byid: bye:. Nyang: gi panglai: ri lhu: zuang" to' kaid wigi hau: ziri myeing nhang: da:. Nya: myeing gi myhang: thang ASEING ga: zi nghoid.

³⁶Bue" nyid tarha" khamyhang myang" ri myang" yhi' houg: myang nyang: Israela gi byumyu" damyu" bue" jo, wa ga: nyang: dangsoo" byid: to" da:.

³⁷Mougkhung: ri ke' wigi Myid gung da" apoem: ayang: ri jham" ca: yu" da" bidnyid ju" nghoid rigi Nyangnu" koid wa dangain" gang mo Israela byu yiri nyang: he: pyam loo wa. ASEING gi tid bye: ga:.

³⁸ASEING tid zigi «Bidvang shoid mo Hananela pyuzung mo zi Ajhoin: khoem" moo" ju" sho' Yerusalem ri nga" voogung khyo" doem tu: to' wa da" ayo, ju" loo loo: wa.

³⁹Mougkyoo" ri bidthu shoid khyoo: Gareb bouggung ju" sho' houg mo zi Gova lheing khoem ju" sho' xo' yhe: loo" wa.

⁴⁰Byu shid: mang joem ri myhoeb da" joyoo yo' mhoid' soid boem to" da" lang: khung" goin"- bidthu shoid myang: khoem" moo" ju" sho' yo' Kidron gyid gyung: zoo: tho' du mo mougmyid dangain" gi nga" shid re" gyeung" shang: da" joyoo nghoid loo wa. Voomoo" gi khanham we' phyo' khyo' pyam phyo' shoin' pyam ashau" loo wa» ga: ASEING tid da:.