Read Lashi YEREMIA 34 Bible Online

YEREMIA 34 - Lashi bible

YEREMIA 34

¹Khokham Nebukhadneza yo' nya: gyidab- nya: lo, khoug: moo nyid da" mungdain: joem dangain" yo' byumyu" yi wigi pang" thoug byid: da" gyidab joem gi Yerusalem yo' aqei: ayam mo voogung joem ri gyi koid nyid uri ASEING gi ngoo ri dang: ji da:.

²Israela da" ASEING Mangsoo gi Yuda khokham Zedekia jhang ngoo ri yhe: tid nhang: zigi «Ngoo ASEING gi he: voomoo" ri Babelon khokham lo khoug: khyoo: ab byid: pyam wa. Houg: lho: nyang: hau: ziri nghe' pyam baja".

³Nang aphang: loid wa. Nang gi myheig yu zi shau" wigi nya: lo, khyoo: ab byid: pyam zi shoug" wa. Nang gi nyang: ri shau" myang goo" wa. Gung du: shau" wigi dang: tid goo" wa. Hau: thang: nang Babelon khyoo: yhe: loo" wa.

⁴Zedekia we"- re" khyoo: yo' sen: wigi ngoo tid da" ziri tam" gyoo: we' nang gi meing: zain: jang: moo said pyam shoug" wa zi anghoid.

⁵Nang gi yug yoo tung" shid: loo" wa. Re" da" phoug" phyid" yi nghoid boem da" re" shid vhu" mo khokham yiri nyangnu" myhoeb pyam boem da" uri byu yi shoem: nam pyo: ja: nghe' nham' boem yhang: ti" nyangnu" gi re" shid mo we' shoem: nam pyo: ja: nghe' nham' byid: boem wa. Nyangnu" ri re" gang mo koug wigi ‹Ngoonu" khokham gi shid: byug bye:› ga: tid loo goo" wa. Ngoo ASEING tid too" bye:».

⁶Hau: thang: Babelon khokham da" gyidab voomoo" ri khaid zain: nyid boem uri Yerusalem moo nyid da" khokham Zedekia ri he: mungdang: ri ngoo tid kyoo" byid: bye:. Gyi dab gi Lakhisha- Yuda mung" mo gyidab voomoo" joem mo daloem: za: deing da" Azeka ri we' khaid zain: ago".

⁸Khokham Zedekia yo' Yerusalem voobyu yigi hang" dayug we' nyang: nya: Israela mang: nhung" ri join khyo" akoid wa shid re" nyangnu" da" Hebre yuggi join- myiyi: join yiri pyoin' kaid byid: wa myid veing" khyoo: daloem: koid ago".

¹⁰Byumyu" yi yo' nyangnu" vhujhung: yi dangain" gi nyangnu" join yiri pyoin' kaid byid: wa yo' houg bang: ri khanham we' join adoem koid wa myid coem' veing" ago". Nyangnu" ri pyoin' kaid boem ago".

¹¹Nghoid loug we' nyangnu" gi thang: ri nyangnu" myid ri thid pyam wigi houg bang: ri doem shu" yu wigi join doem doin: zeig koid nhang: ago".

¹²Hau: thang: Israela da" ASEING Mangsoo gi byumyu" yiri yhe: tid wa shid re" ngoo ri «Ngoo nyangnu" ri Egutu mung" mo khyoid yu wigi join bue" nyid jang" mo nyangnu" ri pyoin' kaid byid: uri nanu" da" phoug" phyid" yi yo' ngoo dang: theing koid too" bye:. Ngoo gi nyangnu" ri

¹⁴khyug zain dei byid: bye: da" Hebre join kha: yug ri nghoid loug we' nyhed zain ein: zain ri pyoin' kaid byid: ca" ein: tid too" bye:. Nghoid loug we' nanu" phoug" phyid" yigi ngoo ri nyeing" atam" gyoo:- ngoo tid da" dang: ri atam" gyo: loo nghoid da:.

¹⁵Akhid" eig soem" nyid" gyoo: moo za: nanu" myid doem thid pyam wigi ngoo ri vho: ngei nhang: da:. Nanu" dangain" bang: gi ngoo ri noku da" joyoo Noku Yhoem: Moo" nga" shidkhoin" moo nanu" da" Israela mang: nhung" yiri nhang: kaid byid: wa myid veing" khyoo: koid abye: go".

¹⁶Nghoid loug we' nanu" da" myid doem thid pyam wigi ngoo ri ngi: ashab byid: nghoid ago". Nanu" dangain" bang: nyangnu" myid vho: ziyo' nanu" nhang: kaid byid: bye: da" join yiri doem shu" yu ago".

¹⁷Houg: lho: akhid" nanu" ngoo ri tid dang: agyoo: nghoid ago" ga: ASEING tid da:. Nanu" da" Israela mang: nhung" yi loid byoin khyoo: ri nanu" abyid: nghoid ago". Houg: lang" gi bye:- ngoo nanu" ri loid byoin khyoo: byid: wa. Gyi khaid khyoo:- noo bue" khyoo: zooyoid kyug shid: wa khyoo: mo loid byoin nhang: wa. Ngo wigi nanu" ri koid da" moo" yo' mougmyid dang moo byumyu" khang" moo" yu" co' yu" gyoug nhang: wa.

¹⁸Yuda yo' Yerusalem mo gyizoug: yi yo' khokham kho" mo gyizoug: yi khainjung yi vhujhung: yi dangain" dage" za: nujung loo: dadu: ri eig gang kho' to" da" agyoo: khyo" so" lid: lo" wigi ngoo yo' dang: theing koid ago". Nghoid loug we' hau: dang: theing ri phyo' pyam wigi aphoug" cang nghoid ago". Houg: yoomo nujung loo ri koid boem bye: ziyo' dayhang: ti" ngoo nyang: he: byumyu" yiri koid wa.

²⁰Nyangnu" ri said pyam nau boem da" nyangnu" da" gyivoo yi lo, khoug: khyoo: ngoo ab byid: pyam wa. Nyangnu" manggung joem ri ngho' joem yo' gougnyhoug lam" joem wigi zo: pyam loo goo" wa.

²¹Yuda khokham Zedekia yo' nya: da" gyizoug: yiri we' nyangnu" ri said pyam nau boem bang: da" lo, khyoo: ngoo ab byid: pyam wa. Nang ri gyi khaid zi theing: pyam boem bye: da" Babelon gyidab khyoo: nyangnu" ri ngoo ab pyam wa.

²²Nyangnu" ri ngoo amyeing" byid: wigi nyangnu" he: voomoo" khyoo: doem tau" lo boem goo" wa. Nyangnu" hau: ziri khaid zain: wigi seing: yu goo" wa. Hau: ziri nghe' pyam wa. Ngoo gi Yuda mung" mo voogung joem ri hang" anyid da" dain" pyoid yoo yhang: ti" nghe' khyo' pyam wa. Ngoo ASEING tid too" bye:» ein: tid kyoo" wa ngoo ri tid da:.