Read Lashi YEREMIA 35 Bible Online

YEREMIA 35 - Lashi bible

YEREMIA 35

¹Yoshia da" yuggi zoo: Yehoiakim Yuda khokham koid uri ASEING gi ngoo ri

²«Rekhab byumyu" kung: moo bo boem bang: jhang yhe: wigi dang: yhe: tid we'. Hau: thang: nyangnu" ri Noku Yhoem: Moo" moo jo, da" yab dayab khyoo: nyangnu" ri shu" vang yhe: wigi nyangnu" ri zabyid yhid: dajhi' doo" byid: we'» ga: tid.

³Houg: yoomo ngoo gi Rekhab kung: dangain" (Habazinia da" yuggi zoo: nghoid da" Yeremia goo" yug da" nya: yuggi zoo:) Yazania yo' nya: mang: nya: nhung" yi yo' yug gi zoo: yiri shu" wigi nyangnu" ri Noku Yhoem: Moo" khyoo: shu" vang yhe: da:.

⁴Ngoo gi nyangnu" ri Igdalia da" yuggi zoo: Lapi: Hanan da" cang: zoo: yi yab khyoo: shu" vang yhe: da:. He: yab gi Noku Yhoem: Moo" mo yhouggyen: da" zoug: nghoid su: Shalum da" yuggi zoo: Maseia da" atho' mo yab nghoid wigi zoug: gooji yi da" yab joem nam moo nghoid da:.

⁵Hau: thang: khu joem yo' zabyid yhid: byeung" sho' bo da" koem: joem ri Rekhab byu yi da" shidkhoin" moo too" byid: wigi nyangnu" ri «Zabyid yhid: dajhi' shug ge'» ein: tid.

⁶Nghoid loug we' nyangnu" phug tid zigi «Ngoonu" gi zabyid yhid: ashug- ngoonu" da" phoug" phyid" Rekhab da" yuggi zoo: Yonadab gi ngoonu" ri yo' ngoonu" da" amyed ashen yiri zabyid yhid: age shug ga: tid too" bye:.

⁷Yhoem: joem yoo joem ri we' age koid- zabyid khyam: joem ri we' age shoo"- age qei- ga: ngoonu" ri tid too" khoo' bye:. He: mung" moo tungbau byu yi yhang: ti" ngoonu" yo" nyid deing jo, wa shid re" khanham we' zoem" joem moo nyid wa shid re" nyang: ngoonu" ri amyeing" byid: kho' da:.

⁸Yonadab wigi ngoonu" ri byid: too" kho' da" jhau" shid dang: dangain" ri ngoonu" tam" gyo: phau" cang yhe: loo bye:. Ngoonu" nyang: we' khanham we' zabyid yhid: ashug- ngoonu" da" yhoem: seing: myhi' yi yuggi zoo: yi myiyi: zoo: yi we' ashug

⁹Ngoonu" gi ikoin shid re" yhoem: joem akoid- ngoonu" gi zoem" joem khoug: moo nyid ngoonu" gi zabyid khyam:- yoothung"- shivoo we' aseing:. Ngoonu" da" phoug" phyid" Yonadab wigi ngoonu" ri amyeing" byid: kho' gu: ja: khang" moo" ri ngoonu" byeung" sho' tam" gyo: cang yhe loo bye:.

¹¹Nghoid loug we' khokham Nebukhadneza mungdain: khoug: khyoo: jhen" vang re" uri Babelon yo' Suri gyizoo: yi lo, mo loid wa shid re" Yerusalem khyoo: lo nyid wa ngoonu" myid phyed bye:. He: gang mo Yerusalem moo ngoonu" nyid nyid zi nghoid da» ga: phug tid ago".

¹²Hau: thang: Israela da" Mangsoo- myhang: thang ASEING gi Yuda yo' Yerusalem byu yi jhang yhe: wigi tid nhang: zigi «Ciwim yoomo nanu" nga" dang: ri tam" gyoo: wa ngeug pyam wigi nga" da" jhau" shid dang: ri atam" gyoo: acang yhe: boem go".

¹⁴Yonadab da" amyed ashen yigi nyang: wigi zabyid yhid: ashug goo" wa shid re" amyeing" byid: kho' ziri tam" gyo: cang yhe: wigi akhid" nyid" ju" sho' nyangnu" ce: daja: we' ashug nghoid ago". Ngoo gi nanu" ri atheing: theing: dang: ji nyid nghoid loug we' nanu" nga" dang: ri atam" gyoo: nghoid da:.

¹⁵Nga" dei zoo: lapi: yi dangain" ri nanu" jhang xo' wigi nhang: kaid bye:. Nyangnu" gi nanu" ri nanu" da" akhyeing" da" moo" joem ri to" pyam wa yo' jo ziri koid wa shid re" nanu" ri tid abye: go". Ngoo wigi nanu" ri yo' nanu" da" phoug" phyid" yiri byid: to" da" mungdain: moo nanu" xo' wigi yo" nyid goo" wa shid re" gooji yu phara" joem ri anoku wa yo' adei byid: goo" wa shid re" nanu" ri tid poin" byid: abye: go". Nghoid loug we' nanu" gi nga" dang: ri ashoug" gyoo:- nga" dang: ri goolhoo' atam" gyoo: nghoid ago".

¹⁶Yonadab da" amyed ashen yigi nyangnu" da" phoug" phyid" yi wigi nyangnu" ri byid: too" kho' da" amyeing" dang: ri tam" gyo: cang yhe: abye: go". Nghoid loug we' byumyu" yi nanu" gi nga" dang ri atam" gyo: acang yhi: nghoid ago".

¹⁷Houg: yoomo Israela da" Mangsoo- Myhang: thang ASEING ngoo gi Yuda yo' Yerusalem byu yi adang moo ngoo dangsoo" byid: to" da" byo, yoin" zi dangain" bui" nhang: wa. Nanu" ri ngoo dang: tid uri nanu" atam" gyo: boem wigi ngoo nanu" ri khe: uri nanu" atu" boem yoomo he: ziri ngoo koid wa ga: tid da ein: yhe: tid kyoo" we' ga:.

¹⁸Hau: thang: ngoo gi Rekhab kung: yiri Israela da" Mangsoo- myhang: thang ASEING tid zigi «Nanu" gi nanu" da" phoug" phyid" Yonadab wigi nanu" ri amyeing" byid: to" ziri tam" gyo: cang yhe: abye: go". Nyang: jhau" shid too" kho' da" khyoo: dangain" ri nanu" tam" gyo: cang yhe: abye:. Nyang: wigi nanu" ri amyeing" byid: to" gu: ja: khang" moo" ri cang koid abye: go".

¹⁹Houg: yoomo Rekhab da" yuggi zoo: Yonadab gi ngoo ri dei byid: wa amyed ashen khanham we' yo" loo wa ga: Israela da" Mangsoo- myhang: thang ASEING ngoo dangsoo" to" da» ein: tid kyoo" byid: bye:.