Read Lashi YEREMIA 36 Bible Online

YEREMIA 36 - Lashi bible

YEREMIA 36

¹Yoshia da" yuggi zoo: Yehoiakim Yuda khokham koid zi myid: zain ein: zain moo ASEING ngoo ri dang: tid zigi

²«Mougsoug" deing: ri yu lho: Israela- Yuda yo' byumyu" dangain" yo' sen: wigi nang ri ngoo tid to" khyoo: ja: khang" moo" ri houg: moo lhid" too" we'. Yoshia khokham nghoid da" ayo, ngoo nang ri xang: shi" dang: ji da" ayo, mo akhid" ju" sho' moo ngoo nang ri tid too" bye: gu: ja: khang" moo" ri lhid" too" we'.

³Ngoo nyangnu" adang moo bui" nhang: wa soin' to" da" byo, yoin" khyoo: dangain" yo' sen: wigi Yuda byu yi shoug" gyoo: lang" nyangnu" da" akhyeing" lo, moo" joem mo to' phug lheing: loo goo" abe. Houg: lang" nyangnu" akhyeing" ziri yo' nyangnu" yooboo joem ri ngoo khyoid byid: wa» ga: tid.

⁴Houg: yoomo Neria da" yuggi zoo: Barug ri ngoo khe: yu lho: ASEING wigi ngoo ri tid too" byid: bye: da" gu: ja: khang" moo" cang lhid" wa shid re" tid byid: bye:. Barug gi hau: ziri dangain" mougsoug" tho' moo lhid" too" bye:.

⁵Hau: thang: ngoo gi Barug ri vhoo: mo jhau" shid dang: ri byid: bye:. Hau: zigi «Ngoo gi Noku Yhoem: Moo" khyoo: yhi: wa akhang" ayoo" loo:-

⁶Nghoid loug we' thang: lheing: byumyu" yi zoo: noem jang" da" ayo, moo ngoo nang ri houg: khyoo: yhi: nhang: nau da:. ASEING wigi ngoo ri tid too" bye: ziyo' ngo wigi nang ri cang lhid" wa tid bye: khyoo: ja: khang" moo" ri nyangnu" shoug" gyoo: wa shid re" nang gi hau: mougsoug" deing: ri thui: zeing yo' nghab wa zi nghoid. Yuda voogung joem mo ju" re" boem da" Yuda byu yi bo wigi yugkhang" moo" re" thui: ri shoug" gyoo: sho' he: ziri nghab wa.

⁷He: byumyu" ri nya: da" yu" gyoug yu" lhoung: sho' da" nheig joem: yo: ziyo' kyug nhain' bye: yoomo nyangnu" ASEING ri akyu" mho' wigi nyangnu" akhyeing" da" khyoo: joem mo doem phug lheing: loo goo" abe» ga: zi nghoid.

⁸Houg: yoomo Barug gi ngo wigi nyang: ri koid wa tid to" ziyo' dayhang: ti" Noku Yhoem: Moo" moo ASEING mungdang: ri toeb za: nghab kyo" da:.

⁹Yehoiakim Yuda khokham bue" zi wim: zain ein: zain lhammoo" goug: khyab ein: khyab moo ASEING wigi myonhoo: byid: zi yo" yu wa shid re" byumyu" yi zoo: noem dalheing: doem jang" boem. Hau: zoonoem jang" ziri Yerusalem mo bang: dangain"- Yuda voogung joem mo houg khyoo: ju" re" boem bang: dangain" jang" ago".

¹⁰Hau: thang: byumyu" yi dangain" bang tam" gyo: nyid boem uri Barug gi ngoo tid to" khyoo: ja: khang" moo" ri mougsoug" deing: mo nghab kyo" da:. Nyang: gi he: ziri Noku Yhoem: Moo" mo Shaphan nya: yuggi zoo: moo" seing: phoo Gemaria da" yab moo nghab da:. Nya: yab gi Noku Yhoem: Moo" khoem" seig khoem" moo" duang: nam mo atho' yab nghoid da:.

¹¹Shaphan da" nya: myid: zoo:- Gamaria da" yuggi zoo: Mikhaia gi ASEING tid to" da" mougsoug" deing: ri Barug wigi nghab da" thui: ri shau" gyo: da:.

¹²Hau: thang: nyang: gi khokham kho" moo" voin zoug: yi zoebphung: phung nyid boem da" moo" seing: phoo da" yab khyoo: yhe: lo" da:. Houg: moo moo" seing: phoo Elishama- Shemaia da" yuggi zoo: Delaia- Akhbora da" yuggi zoo: Elnathan- Shaphan da" yuggi zoo: Gemaria Hanania da" yuggi zoo: Zedekia yo' gootu: zoug: ludaid yi dangain" nyid nyid ago".

¹³Mikhaia gi byumyu" yiri Barug nghab kyo" ziri nyang: shau" gyo: gu: ja: khang" moo" nyangnu" ri tid kyo" da:.

¹⁴Hau: thang: moo" voin Ludaid yigi (Kushi da" myid: ki"- Shelemia da" nya: myid: zoo:- Nethania da" yuggi zoo:) Yehudi ri nhang: kaid lho: byumyu" yiri nyang: nghab kyo" da" hau: mougsoug" deing: ri ci: ri" wa shid re" Barug ri tid nhang: kaid ago". Barug gi hau: mougsoug" deing: joem ri ci: loo byid: da:.

¹⁵Nyangnu" gi «Gyo" zhoung: wigi hau: mougsoug" deing: ngoonu" ri nghab kyoo" la» ga: tid. Barug we' nghab kyo" da:.

¹⁶Nyang: hau: zi bain nghab thang: ri nyangnu" nyang: cang" tid poin" go" lho: Barug ri «He: khyoo: ri ngoonu" khokham phoo ri lu dang: lo" kyoo" ca" da» ga: tid ago".

¹⁷Hau: thang: nyangnu" gi nyang: ri «Akhid" he: gu: dangain" ri nang khasu" lhid" lha". Yeremia wigi nang ri cang lhid" wa ga: tid rhe"- Ngoonu" ri tid kyoo" la» ga: tid ago".

¹⁸Barug gi «Yeremia gi he: dang: khoin" khang" moo" ngoo ri nghab kyo" wigi ngoo gi he: mougsoug" deing: moo mhug yeing yo' lhid" to" zi nghoid» ga: tid.

¹⁹Hau: thang: nyangnu" gi nyang: ri «Nang yo' Yeremia gi lo" phang: gau" ca" wa. Re" eig yug khamoo: nyid boem khyoo: ri hang" ri we' asi' nhang: goo"» ga: tid ago".

²⁰Gyizoug: yigi hau: mougsoug" deing ri moo" seing: phoo Elishama da" yab moo kaid to" wigi khokham kho" khyoo: yhe: lho: ja: khang" moo" ri nyangnu" khokham ri khyang" lo" shid da:.

²¹Hau: thang: khokham phoo gi Yehudi ri mougsoug" deing: yu nhang: kaid da:. Nyang: gi hau: mougsoug" deing: ri Elishama yab mo yu wigi Khokham phoo yo' nya: lheing khoem moo yab jo, boem da" moo" voin zoug: yi dangain" ri nghab kyo" da:.

²²Hau: ayo, gi ngam" yo, nghoid wigi khokham phoo gi ngam" yo' ri nyid da" khokham kho" mo myikhyoem' nam moo zhung: jo, da:.

²³Yehudi soem" myid: du bain nghab yo' khokham' phoo gi sham: thoo" wigi yham" ceig lho: myikhyoem' khyoo: pyam zei kaid da:. Mougsoug" deing: goin" bain ngi" sho' nyang: hougsu" xo' koid da:.

²⁴Nghoid loug we' he: khyoo: dangain" ziri shau" gyo: da" bang:- khokham phoo we' nya: gyizoo: yi we' gyoug we' agyug nheig koug da" avid we' ci: aci: shug nghoid ago".

²⁵Elnathan- Delaia- Gemaria- bang: gi hau: mougsoug" deing: ri anghe' pyam wa shid re" khokham phoo ri mho' yoid nghoid loug we' nyangnu" ri nyang: ci: atam" gyoo: byid: nghoid da:.

²⁶Hau: thang: nyang: gi ngoo yo' nga" moo" seing: Barug ri myheig yu wa shid re" khokham nya: zoo: Yeramela ri yo' Azriela da" yuggi zoo: Zeraia- Abadela da" yuggi zoo: Shelemia bang: ri amyeing" byid: kaid da:. Nghoid loug we' ASEING gi nga" tang: ri shoung: pyam da:.

²⁷Barug ri ngo wigi tid byid: wigi lhid" to" da" mougsoug" deing: ri khokham Yehoiakim wigi nghe' pyam thang: ASEING gi ngoo ri

²⁸Mougsoug" deing: gootu: dadeing: ri doem yu lho: xang: shi" loem: moo bo zi ja: khang" moo" ri hau: moo: lhid" wa shid re" tid da:.

²⁹ASEING gi khokham phoo ri tid kyoo" wa shid re" ngoo ri «Nang gi mougsoug" deing: ri nghe' pyam abye:. Babelon khokham ju" re" wigi he: mungdain: ri phyo' pyam wa he: mungdain: byu yiri yo' gougnyhoug joem ri said pyam wa ein: ziri ciwim nyang: lhid" khyoo: ri nang Yeremia ri myid: abye:.

³⁰Houg: yoomo akhid" khokham Yehoiakim we"- nang ri ngoo ASEING tid zigi David da" mungdain: moo re" amyed ashen yi dayug we' avhoeb goo" wa. Re" manggung gi tunggung shoid khyoo: she: pyam zi shau" lho: nyid" ri bid lhab' wigi myen" ri gyu boem moo leung jo, wa.

³¹Nanu" dangain" bang: shoid da" yooboo gang mo ngoo gi nang yo' re" amyed ashen yi re" gyizoug: yiri yooboo dam byid: wa. Nang we' Yerusalem yo' Yuda byu yi we' ngoo tid poin" byid: dang: ri dajhi' we' atam" gyoo: nghoid ago". Houg: yoomo ngoo kyug nhain' to" da" yau: khe" kyi" khyeug ziri nanu" dangain" bang: adang moo bui" nhang: wa» ga: zi nghoid.

³²Hau: thang: ngoo gi mougsoug" deing: gootu: dadeing: ri doem yu lho: hau: ziri nga" moo" seing: phoo Barug ri byid: bye:. Nyang: gi ngoo tid da" ja: khang" moo" ri cang lhid" da:. Nyang: gi xang: shi" mo mougsoug" deing: moo bo da" mungdang: yhang: te" ziri lhid" wigi nyang: ri ngoo tid da" mungdang: yhang: te" zi nyang: lhid" da:.