Read Lashi YEREMIA 38 Bible Online

YEREMIA 38 - Lashi bible

YEREMIA 38

¹Mattan da" yuggi zoo: Shephatia- Pashura da" yuggi zoo: Gadalia- Shelemia da" yuggi zoo: Yehukhala yo' Malkhia da" yuggi zoo: Pashura bang: gi ngoo tid nyid da" ASEING mungdang: ri shau" gyo: boem.

²Hau: zigi ngo wigi byumyu" yiri «He: voomoo" khoug: moo nyid deing jo, da" bang: hang" nghoid loug we' gyipui" moo zooyoid jang" moo no phyoo" moo shid: boem wa nghoid loug we' thu yhe: lho: Babelon byu yiri lo, yhe: tu: pyam su: hang" nghoid loug we' said pyam zi ashau" wa. Nyang: gi neing: thang nya: kangso' phang: loid wa» ga: ASEING tid.

³Ngoo gi nyangnu" ri «Voomoo" ri Babelon meing: bang: gyidab khyoo: ab byid: pyam lho: nyangnu" gi hau: ziri seing: yu pyam goo" wa» ga: ASEING tid to" ziri we' tid kyoo" bye:.

⁴Hau: thang: moo" voin zoug: yigi khokham pho jhang yhe: lho: «Byu he: yug ri said pyam ca" da:. Nyang: hougsu" tid nyid yoomo he: voomoo" moo nyid da" gyizoo: yigi voem" da" myid byug byug abye: go". Houg: lho: nyang: gi voomoo" khoug: moo nyid deing jo, boem bang: gootu: yugkhang" moo" ri we' dakhyoo" ti" za: tid nyid da:. Nyang: gi byumyu" yiri pang" thoug wa shid re" yoem: akaid nghoid da:. Nyangnu" ri dam za: dab nhang: nau nyid da» ga: tid ago"

⁵Khokham Zedekia gi «Houg: lang" gi bye:- nyang: ri nanu" vho: khyo" koid we'. Nanu" ri ngoo ayo" toem' pyam» ga: tid da:.

⁶Houg: yoomo nyangnu" ngoo ri shu" yu wigi khokham kho" vang khoug: moo jo, da" khokham gungthid Malkhia da" gyid thung" khoug: khyoo: tei" wigi ngoo ri khyo' kaid ago". Hau: gyid thung" moo gyid aboo nghoid da:. Thoem" boeb za: dabo wigi houg: moo ngoo noeb lo" da:.

⁷Nghoid loug we' khokham kho" moo moo" zei: da" unug Etiopi byu Ebedmeleg gi nyangnu" ngoo ri gyid thung" moo kaid to" da" thui: ri shau" gyo: da:. Hau: ayo, moo khokham gi Benyamin khoem" moo nyid da:.

⁸Houg: yoomo Ebedmeleg gi houg: khyoo: yhe: wigi khokham phoo ri

⁹«ASEING khokham we"- he: byu yi koid da" lo, moo" gi shoid da:. Nyangnu" gi Yeremia ri gyid thung" khoug: moo kaid to" ago". Voomoo" koug: moo zoo: noem ajo, loo yoomo nyang: houg moo gyeing" nyang: zoo: yoid shid: wa zi nghoid da» ga: tid da:.

¹⁰Ngoo ashid: shi" ri gyid thung" khoug: mo ngoo ri she: thu yu wa shid re" khokham phoo gi Ebedmeleg byu soem" yug yo' dage" ri" wa amyeing" byid: kaid da:.

¹¹Houg: lho: Ebedmeleg gi hau: byu yi yo' dage" khokham zi too" yab khyoo: cang yhe: wigi mi jeig dayham" ri yhe: yu yu lho: hau: tei" ngoo ri khyoo' byid: da:.

¹²Nyang: gi ngoo ri tei" wigi asei" coid wa shid re" hau: byimi joid joem ri nga" lo, cab khyung" moo kaid too" wa tid da:. Ngoo hougsu" koid bye:.

¹³Nyangnu" gi ngoo ri gyid thung" mo she: thu yu ago". Hau: thang: ngoo ri khokham vang khoug: moo nyhid: to" ago".

¹⁴Dalheing: ri khokham Zedekia gi Noku Yhoem: Moo" khoem" duang: soem" loem: ein: loem: moo ngoo ri nya: jhang khe: yu nhang: wigi «Nang ri ngoo dang: dakhoin" myid: wa nang jo zi tid wa shid re" ngoo vho: da» ga: tid da:.

¹⁵Ngoo gi «Ngoo nang ri jo zi tid nghoid ri nang ngoo ri said pyam wa zi nghoid. Ngoo nang ri phajhi" byid: loug we' nang tam" gyoo: wa zi anghoid» ein: ngoo phug tid bye:.

¹⁶Houg: lho: khokham Zedekia gi «Ngoo gi nang ri asaid pyam wa nang ri said pyam nau da" bang: lo, khyoo: we' ngoo nang ri a ab pyam wa ein: ziri ngoonu" ri kangso' byid: da" Mangsoo- kangso' dei nyid Mangsoo da" myeing ri lang: wigi ngoo jham' tang: da» ga: sam: zoo: ngoo ri dangsoo" byid: da:.

¹⁷Hau: thang: ngoo gi Zedekia ri Israela da" Mangsoo myhang: thang ASEING tid to" da" khyoo: ri tid kyoo" bye:. Hau: zigi «Babelon khokham da" gyizoug: yiri nang lo, tu: pyam nghoid rigi re" kangso' loid byoin wa. He: voomoo" gi nghe' pyam zi ashau" wa. Nang yo' re" yhoemkhung: byu yi dangain" kangso' loid byoin goo" wa.

¹⁸Nghoid loug we' nang lo, atu: asoem" abyid: pyam nghoid rigi he: voomoo" ri Babelon byu yiri ab byid: pyam wa. Nyangnu" gi hau: ziri nghe' khyo' pyam wigi nyangnu" lo, mo nang aloid wa» ga: tid.

¹⁹Nghoid loug we' khokham phoo gi «Babelon byu yi shoid khyoo: phang: dab byug boem bye: da" ngoonu" byumyu" yiri ngoo gyoug da:. Ngoo gi nyangnu" lo, khyoo: ab pyam zi shau" wigi shen" yhen zi shoug" abe» ga: tu" da:.

²⁰Ngoo tid zigi «Nang gi nyangnu" lo, khyoo: ab byid: pyam zi ashau" wa. ASEING da" Mungdang: ri tam" gyo: cang yhe: wa shid re" ngoo nang ri mho' yoid. Houg: lang" nang yoo yoo nghoid wa. Re" kangso' loid byoin wa.

²¹Nghoid loug we' nang lo, tu: asoem" byid: wa ziri ngeug he: pyam nghoid rigi ci: bui" wa ziri ASEING gi ngoo ri yoeb myang moo toin" shed bye:.

²²Houg: moo Yuda khokham kho" moo nyid deing jo, da" myiyi: dangain" ri Babelon khokham da" gyidab zoug: yi wigi shu" thu lo" nyid ziri ngoo myang da:. Nyangnu" yhe: lo" nyid uri nyangnu" ri citid nyid ziri tam" gyoo: we' ‹Khokham pho da" byencang" seing: yigi nyang: ri khyoo: vhang: shu" vhang: bye:. Nyangnu" gi nyang: ri oung: pyam abye: go". Houg: lho: akhid" nya: khyid: gi thoem" boeb boem" moo noeb jo, abye:. Nya: byencang" yigi nyang: ri she: pyam too" kho' abye:›» ga: tid ago".

²³Hau: thang: ngoo gi «Re" myiyi: yi yo' zooshang: yi dangain" gi Babelon khyoo: shu" lo" zi shau" wigi nang nyang: gi nyangnu" mo ayo" phang: loid wa. Nang gi Babelon khokham wigi thung: byu khyo" myheig shu" lo" zi shoug" wa. He: voomoo" gi myidgung khyoo: nghe' jhoem" khyo' pyam zi shoug" wa» ein: xo' tid bye:.

²⁴Zedekia gi «Hid su" doem go" khyoo: ri hang" ri we' asi' nhang:- re" kangso' ci gyoug aca" wa.

²⁵Ngoo nang yo' doem go" khyoo: ri gyizoug: yi shau" gyo: nghoid rigi nga" eig yug citid go" da" khyoo: ri nyangnu" nang ri re" myid: boem goo" wa. Nang nyangnu" ri ja: khang" moo" tid kyoo" byid: nghoid ri nyangnu" gi nang ri asaid pyam wa ga: dangsoo" byid: loo goo" wa.

²⁶Shid: wa nghoid da" hau: Yonathan da" yhoem: khyoo: nang ri adoem nhang: kaid byid: wa shid re" nang ngoo ri mho' da" khyoo: nyangnu" ri tid kyoo" byid: we'» ga: phug tid da:.

²⁷Hau: thang: gyizoug: yi dangain" nga" jhang ju" re" lho: dang: myid: myid: ago". Ngoo gi nyangnu" ri khokham wigi tid wa shid re" ngoo ri tid to" da" gu: ri toeb lhoem: tid kyoo" bye:. Dang: doem go" ziri nyangnu" hang" we' ashau" gyoo: yoomo nyangnu" gootu: ci we' ayo" koid nghoid ago".

²⁸Yerusalem ri oung: yu pyam da" bidnyid ju" sho' ngoo gi khokham vang khoug: moo lhoung to" zi shau" da:.