Read Lashi YEREMIA 39 Bible Online

YEREMIA 39 - Lashi bible

YEREMIA 39

¹Zedekia Yuda khokham koid zi goug: zain- lhammoo" daxi: khyab ein: khyab moo Babelon khokham- Nebukhadneza gi nya: gyidab dangain" yo' ju" re" lho: Yerusalem ri gyi re" zain: da:.

²Zedekia khokham khyo" vhoeb zi daxe: dazain lhammoo" myid: khyab- gau: nyid" nyid" moo voomoo" vang joem byo, gyo" lo" byug da:.

³(Yerusalem ri oung: yu pyam lang" Babelon khokham da" gyizoug: moo" yi dangain" gi re" lho: agung khoem" moo nyangnu" joyoo yu ago". Hougmoo: Nergala Sarezera- Samgara Nebo- Sarsekhin yo' gootu: Nergala Sarezera bang: bo ago".)

⁴Khokham Zedekia yo' nya: gyizoo: yigi cibue" nyid ziri shau" myang lang" nyangnu" gi myen" ayo, moo voomoo" mo phang: thu wa soin ago". Nyangnu" gi khokham khyam: khaid khyo" thu lo" lho: vang eig loem xo' to" da" khoem" duang: khyo" lid: thu lo" wigi Yodan lang: khung" shoid khyoo: phang: loid lo" ago".

⁵Nghoid loug we' Babelon gyiphung: yigi nyangnu" thang: moo cang khaid wigi Yerikho" nam mo jang: pa: moo Zedekia ri shoug" myheig yu ago". Hau: thang: nyangnu" gi nyang: ri Hamad moug: Ribla voomoo" moo nyid da" Khokham Nebukhadneza jhang shu" yhe: lo" ago". Houg: lho: Nebukhadneza gi nyang: ri dang: phyed byid: da:.

⁶Nyang: gi Ribla moo Zedekia da" myo, jang moo nyang: Zedekia da" yuggi zoo: yiri said pyam lho: nyang: gi Yuda gyizoug: yiri we' said pyam da:.

⁷Hau: thang: ri nyang: gi Zedekia da" myojid" ri thau" phug byid: wigi Babelon khyoo: shu" loo" wa shid re" jangcoo" foid to" da:.

⁸Hau: uri Babelon byu yigi khokham kho" yo' mung" byu yi yhoem: joem ri nghe' pyam lho: Yerusalem vang joem ri phyo' khyo' pyam da:.

⁹Lo" thang moo gyizoug: phoo Nebuzaradan gi nya: jhang lo phang: nyid boem da" bang: yo' dage" thung: byu khyo" Babelon khyoo: shu" lo" wa voogung moo nyid deing nyid da" bang: ri shu" lo" da:.

¹⁰Nyang: gi Yuda mung" mo ci: ayo" da" bang: myung thang da" bang: dayham" ri nyhid: too" kho' lho: nyang: gi nyangnu" ri zabyid khyam: joem yo' yoo thung" joem ri byid: kho' da:.

¹¹Nghoid loug we' Nebukhadneza gi gyizoug: moo" Nebuzaradan ri vhoo: mo amyeing" dang: ri byid: kaid bye:.

¹²Hau: zigi «Yeremia ri yhe: sho: wigi nyang: ri nyheing" za: coung: byid: we' Nyang: ri ce: dam atab- nyang: vho: khyoo: ce: ja: ri we' koid byid: ge'» ga: zi nghoid.

¹³Houg: lho: Nebuzaradan- gyizoug: moo" yi nghoid da" Nebushaban- Nergala Sarezera yo' Babelon mo gyizoug: gootu: yi dangain" bang: gi khokham vang khoug: mo ngoo ri re" shu" yu boem.

¹⁴Nyangnu" gi ngoo ri Shaphan da" nya: myidzoo: Ahikam da" yuggi zoo: Gedalia wigi goin coung: da" lo, khoug: moo nyhid: to" ago". Hau: yug gi ngoo ri yhoem: khyoo: goug: goug: za: shu" lo" ziri yu" wa su: nghoid da:. Houg: lho: ngoo gi houg moo mung" byu yi phung: moo nyid nyid bye:.

¹⁵Khokham vang khoug: moo ngoo thung: lung" nyid uri

¹⁶Israela da" Mangsoo myhang: thang ASEING gi Etiopi byu Ebedmeleg ri tid wa shid re" tid nhang: zigi «Ngoo koid wa ein: tid to" ziyo' dayhang: ti" ngoo gi he: voomoo" ri byo, yoin" pyam nhang: lho: anyid gi nhang: loo wa. He: zi bui" lang" nang gi hau: ziri shau" myang wa.

¹⁷Nghoid loug we' ngoo ASEING gi nang ri goem loem byid: wa. Nang gyoug nyid bang: da" lo, moo nang ri ab byid: wa zi anghoid.

¹⁸Ngoo gi nang ri goug: goug: nyid nhang: wa. Houg: lho: nang said pyam zi ashau" wa. Nang ngoo ri loem khau: nyid yoomo re" kangso' yo" phang: loid wa» ga: zi nghoid ngoo ASEING tid too" bye:.