Read Lashi YEREMIA 4 Bible Online

YEREMIA 4 - Lashi bible

YEREMIA 4

¹ASEING tid zigi «Israela byumyu" yi we"- nanu" lheing: loo nhau boem nghoid ri nga" jhang lheing: tau" phang: loo we'. Nanu" gi ngoo ri jhug zug wigi ngoo ngheing" da" yu phara" soolhoo: joem ri yu pyam boem nghoid rigi

²Nanu" gi nga" da" myeing lang: wigi jham' tang: zigi jo boem wa. Houg: lang" byumyu" dangain" bang: gi nyangnu" ri mainkaid byid: wa shid re" ngoo ri tid loo goo" wa. Houg: lho: nyangnu" gi ngoo ri coung" loo goo" wa» ga: tid da:.

³ASEING gi Yuda yo' Yerusalem voobyu yiri tid zigi «To" lham' to" da" nanu" da" yoothung" joem ri phug pyam we'. Nanu" da" shivoo myoug: shi" joem ri zu kyen: gam gyoo: cang ashoo" goo".

⁴Yuda yo' Yerusalem mo byu yi we"- nanu" da" ASEING ngoo yo' dang: theing to" ziri zoem: ci: ge'. houg: lho: nanu" nya: gung ngoo ri shugbyid: we'. Hougsu" akoid boem lang" nanu" koid da" akhyeing" ashoeb da" moo" joem yoomo nga" da" nheig yo: zigi myi: yhang: ti" nge" loo wa. Hougsu" nge" dab lo wigi hau: ziri hang" wigi we' ayo" said pyam goo" wa» ga: tid da:.

⁵Damung" goin" moo laboo" moid kaid ge' Thui: zeing yo' jang jang za: nyhoo: we'. Yuda yo' Yerusalem mo byu yiri gyi pyuzung- vang khyam: kyam' to" da" voomoo" joem Khyoo: tang" phang: wa shid re" tid kyoo" we'.

⁶Ziun yhi: khyoo: ri toin" shed we'. goem loem wa shid re" tang" phang: ge'. Ane" nyid goo". ASEING gi mougzhung: shoid khyo" byo, yoin" ziyo' phyo' shoin' pyam khyoo: gyi" sho' zi shu" gyo" loo wa.

⁷Byumyu" mungdain: ri phyo' shoin' su: gi gau" nyid da" joyoo mo thu' lo da" khangkhyi yhang: ti" thu loo bye:. Nyang: gi Yuda ri phyo' shoin' pyam loo wa. Yuda voomoo" joem gi byo, yoin" jo, da" joyoo moo she: pyam to" zi shoug" loo goo" wa. Houg: lho: hau: voomoo" joem moo hang" anyid goo" wa.

⁸Houg: yoomo jid moo" byimi void wigi ngoug ge'. koug myeing nyid ge'. Ciwim gari ASEING da" gyoug pho" nheig yo: zigi Yuda mo alheing: thu lo" byug shi" nghoid da:.

⁹ASEING tid zigi «Hau: bidnyid mo khokham yi yo' moo" voin zoug: yigi voem" da" myid byug byug wigi khainjung yi dain mo, lo" ziyo' Lapi: yigi mau" byug goo" wa» ga: tid.

¹⁰Hau: thang: ngoo gi «Yoem: moo" bo da" ASEING we"- nang gi Yerusalem mo byu yiri bain sho' mhau pyam bye:. Nang gi yug yo myenjham" khyoo: jo, loo wa ga: tid da:.- Nghoid loug we' shamcoin" dacam" gi nyangnu" da" khyung" kang: moo dajo, jo, da:.

¹¹Yerusalem mo byu yiri dain pyoid yoomo lid loung gi nyangnu" jhang hau' lo nyid da ga: tid shed da" ayo, ju" loo wa. Hau: zigi phei" ri za: moid hau' pyam da" lid zoo" gi yen yoo" za: moid wa zi anghoid wa.

¹²ASEING da" amyeing" khyo" ju" lo da lid gi hau: tho' je thain: da" zi nghoid wa. Hau: zigi nya: byumyu" yiri dang: phyed khyoo: tid fu" da" ASEING nyang: nghoid loo wa.

¹³Yu" ge'- gyivoo gi jhoemmoug" joem yhang: ti" lo nyid da:. Nya: da" gyi myang: rheing" joem gi lid shoem' yo' du ago". Houg: lho: nya: da" myang: joem gi zoin bung: joem tho' myab da:. Ngoonu" gi soem" wa bye:. Ngoonu" gi joem: wa bye:.

¹⁴Yerusalem we" nang khyoid yu shoug" wa shid re" re" da" nheigloem: khoug: mo akhyeing" ziri cid" pyam we'. Nang gi khamyhang myang" sho' yooboo moo" ri xo' myid nyid wa la".

¹⁵Dan voomoo" mo yo' Ephrim boem joem mo lu dang: voin da" lagyoo: yigi age da" lu dang: ri tid fu" ago".

¹⁶Nyangnu" gi byumyu" yi yo' Yerusalem ri ve: da" mung" damung" mo gyivoo yi re" nyid boem da" khyoo: ri tid poin" wa shid re" re" lo ago". He: gyivoo joem gi Yuda voomoo" joem ri re" thougtheung nyhoo: goo" wa.

¹⁷Houg: lho: yoothung" dain" daloem: ri lhoug zung" nyid da" byu joem yhang: ti" Yerusalem ri re" lheing khoem lhung too" goo" wa. Ciwim ga: ri nya: voobyu yigi ASEING ri thougtheung gyi koid bye:. ASEING tid too" bye:.

¹⁸Yuda we" nang gi nanyang: nyid da" avoid yo' nang koid da" moo" joem khyo" wigi he: ziri nanya: gung moo tu: voin yu abye:. Re" da" yooboo gi he: yau: khi" ri bui" nhang: bye:. Hau: zigi nang ri nheigloem: moo thau" kyang nhang: bye:.

¹⁹Dam noo- dam noo ri ngoo atho' zeing: kham. Nga" seing" nyang: we"- Nga" seing" gug gi gye" thung" nyid. Ngoo gi sam: zoo: ayo" tam" too". Ngoo gi laboo" joem thui: yo' meing: zain: jang: mo thui: ri shau" gyo:.

²⁰Byo, yoin" zi daja: bain daja: cang lo da:. Da mung" goin" zigi byo, yoin" jo, bye:. Ngoonu" da" zoem" joem gi nyeigdain tung" phyo' shoin' pyam zi shoug" bye:. Nyangnu" da" yabkyo' pain" ruang: joem gi amyhoo: myhoo: ceig pyam zi shoug" bye:.

²¹Thain: da" gyi khaid meing: zain: pui" ziri khamyhang myang" sho' ngoo shau" myang ca" wigi Laboo" moid myheing ziri khamyhang myang" sho' shoug" gyoo: ca" wa la".

²²ASEING tid zigi «Nga" byumyu" yigi nheig agyeing: nghoid ago". Nyangnu" ngoo ri asi' nghoid da:. Nyangnu" gi ko" da" zooshang: yi yhang: ti" nghoid boem. Nyangnu" moo Lasi Lajhang: se' gyo: myid aboo nghoid da:. Nyangnu" gi akhyeing" da" moo" koid wa gye" jhang: ago". Nghoid loug we' nyangnu" gi ge zi koid wa abui" adoid nghoid da» ga: tid.

²³Ngoo gi mougmyid gyab khyoo: yu" kaid ri. Hau: zigi jham" coug: youg kyug jo, da:. Mougkhung: khyoo: yu" kaid ri houg moo bidbang ajo, nghoid da:.

²⁴Ngoo gi boem joem khyoo: yu" kaid- hau: joem gi lei" nyid da:. Houg lho: bouggung joem gi thei: shoid he: shoid byam' zhang" nyid da:.

²⁵Ngoo gi houg moo byu anyid ziri shau" myang. Ngho' joem lang" dang: phang: byug abye:.

²⁶Myidxu: ge da" mougmyid gi dain" pyoid yoo bue" byug bye:. Houg mo voomoo" joem gi ASEING da" gyoug pho" nheig yo: da" gang moo byo, yoin" jo, abye:. (

²⁷ASEING gi mougmyid dagyab goin" ziri jham" coug: youg moug: kyug bui" nhang: wa nghoid loug we' nyang: gi hau: ziri bain sho' aphyo' shoin' pyam wa ga: tid too" bye:.)

²⁸Moug: myid gi koug ngau loo wa mougkhung: gi ceig no, loo wa. ASEING gi tid too" bye:. Houg: lho: nya: myid ri athid wa. Nyang: gi myid nheigloem: myid phyed too" bye:. Houg: lho: adoem tau" loo wa.

²⁹Myang: jui: bang: thui: yo' lid: ci: bang: thui: ri shoug" gyoo: lang" yugkhang" moo" gi tang" phang: loo" goo" wa. Dayham" gi seig moo" yoo khyoo: tang" phang: loo" goo" wa. Gootu: gu: gi loug pyo' joem dang khyoo: do, lo" boem goo" wa. Voogung khang" moo" gi akoem: too" kho' zi shoug" wa. Houg: lho: hang" we' hau: jang" moo adoem nyid loo goo" wa.

³⁰Yerusalem we"- nang gi joem: lo" abye:. Nang gi phe" pain" byimi ciwim shoung: void ci: la". Ciwim yoomo phoug" dab lug ri shoung: void ci: wigi myojid" moo xau" ci: la". Nang gi nanya: gung ri ci: anghoid da" shid re" yung" sho' shoung: ci: da:. Re" da" jheddab zooyam phoo joem gi nang ri ngeug he: pyam abye: go". Houg: lho: nyangnu" gi nang ri said pyam nau ago".

³¹Ngoo gi zookhu: noo no nyid da" myiyi: dayug kyi: ngoug ziri shau" gyo:. Zooshid" ri khu: nyid da" myiyi: dayug kyi: nyho: nyid da" thui: yhang: te" ziri shoug" gyo. Hau: zigi so' moo" she: nyid da" Yerusalem da" ngoug myheing" thui: nghoid da:. Nyang: gi nya: lo, ri yhoin" kaid wigi «Ngoo gi joem: bye:. Nyangnu" gi ngoo ri said pyam wa ga: re" lo nyid bye: go"» ga: tid nyid da:.