Read Lashi YEREMIA 41 Bible Online

YEREMIA 41 - Lashi bible

YEREMIA 41

¹Hau: zain lhammoo" nyhed khyab ein: khyab moo Elishama da" nya: myid:- Nethania da" yuggi zoo: khokham yhoemkhung: mo bo bo ziyo' khokham pho zoug: moo" nghoid da" Ishmaela gi Gedalia ri yhe: koem" wa shid re" Mizpa khyoo: byu daxi: yug yo' dage" yhe: lo" da:. Nyangnu" zoo: noem dage" zo: nyid uri

²Ishmaela yo' byu daxi: yug bang: gi nyangnu" shamcoin" sheing: she: yu wigi Gedalia ri said pyam ago".

³Ishamaela gi Mizpa mo Gedalia yo' dage" nyid boem da" Israela byu yi dangain" ri yo' houg: moo nyid da" Babelon gyizoo: yi dangain" ri we' said pyam da:.

⁴Thang: nyid"- Gedalia ri said pyam da" khyoo: ri hang" asi' shi" ri

⁵Shekhem- Shilo- Samari mo byu shed' xi: yug ju" re" ago". Nyangnu" gi nyangnu" nhoid moug" ri yug pyam- nyangnu" byimi ri lang: ceig pyam- dam ze" tab ci: ago". Nyangnu" gi Noku Yhoem: Moo" moo ngei" byid: wa shivoo: yo' shoem: nam pyo: ja: voin ago".

⁶Houg: lho: Ishmaela gi nyangnu" ri yhe: shoug" wa shid re" thu yhe: lo" da:. Nyang: gi ngau zoo" ri yhe: lo" da:. Nyangnu" jhang ju" yhi: lang" nyang: gi «Jeju" khyo" Gedalia ri re" yu" ge'» ga: tid da:.

⁷Nyangnu" voomoo" khoug: khyoo: ju" yo' dage" Ishmaela yo' nya: byu yigi nyangnu" ri said pyam lho: nyangnu" da" manggung joem ri gyid thung" daloem: moo she: khyo' pyam ago".

⁸Nghoid loug we' daxi: yug bo da" byu phung: daphung: gi Ishmaela ri jeju" khyo" ngoonu" ri asaid pyam goo". Ngoonu" gi yoo moo shoung: to" da" sungsoo:- Yoono,- Zhainloin: xu: joem yo" ga: tid ago". Houg: yoomo nyang: gi houg: bang: ri teing to" da:.

⁹Ishmaela said pyam da" byu yi da" manggung joem ri nyang: she: zei pyam da" gyid thung" gi Ishmaela khokham Basha wigi khokham Asa ri gyi khaid zain: nyid uri nyang: du: to" da" gyid thung" gyi: loem: nghoid da:. Ishmaela gi byu mang joem yo' gyid thung" ri boem" pyam da:.

¹⁰Hau: thang: nyang: gi khokham da" myiyi: zoo: yiri thung: byu koid pyam lho: gyizoug: moo" Nebuzaradan wigi Gedalia yu" coung: da" lo, khoug: moo nyhid: too" kho' shau" boem da" Mizpa mo deing nyid da" byu dangain" ri myheig yu da:. Ishmaela gi thung: byu yiri shu" wigi Amon moug: shoid khyoo: to' lo" ago".

¹¹Yohanan gi nyang: yo' dage" nghoid da" gyizoug: yigi Ishmaela shoid vhang: da" byu said moo" ri shau" gyo: ago".

¹²Houg: yoomo nyangnu" byu yi yo' dage" nya: thang: khyoo: cang khaid ago". Gibeon mo gyid thoem" anam moo nyang: ri lo" myhi: da:.

¹³Ishmaela da" thung: byu yigi Yohanan yo' dage" gyidab vhujhung: yiri myang lang" nyangnu" gau ago".

¹⁴Houg: lho: tau" wigi nyangnu" jhang tang" lo ago".

¹⁵Nghoid loug we' Ishmaela gi nya: byu shed yug yo' Yohanan jang" mo phang: lo" lho: Amon mung" shoid khyoo: phang: loid lo" byug ago".

¹⁶Ishmaela wigi Gedalia ri said pyam thang: Mizpa mo thung: byu yi khyo" shu" loo" shau" boem da" gyizoo: yi myiyi yi zooshang: yi Unug yiri Yohanan- nyang: yo' dage" nghoid da" gyidab vhujhung: yiri shu" lo" da:.

¹⁷Babelon khokham wigi mungdain: mo mung" zoug: koid nhang: to" da" Gedalia ri Ishmaela wigi said pyam yoomo nyangnu" gi Babelon byu yiri gyoug ago". Houg: yoomo nyangnu" gi Babelon byu yi lo, mo loid wa shid re" Egutu khyoo: to' lo" ago". Khyoo: moo nyangnu" gi Bedlehem nam mo Khimham moo theing: ago".