Read Lashi YEREMIA 43 Bible Online

YEREMIA 43 - Lashi bible

YEREMIA 43

¹Nyangnu" ri tid kyoo" wa shid re" nyangnu" ASEING Mangsoo ngoo ri nhang: kaid khyoo: ja: khang" moo" ri byumyu" yiri tid kyo" nyid ziri theing: pyam bye:.

²Hau: thang: Hoshaia da" yuggi zoo: Azaria- Karea da" yuggi zoo: Yohanan yo' gootu: nghoid boin: da" byu gooji dangain" gi ngoo ri «Nang mhau' nyid. Ngoonu" ri Egutu khyoo: ayhe: nyid wa khyo" ngoonu" ri tid wa shid re" ngoonu" ASEING Mangsoo gi nang ri anhang: kaid nghoid da:.

³Babelon byu yi ngoonu" ri yo" vhoeb pyam lho: ngoonu" ri yo" said pyam wa. Anghoid lang" Babelon khyoo: yo" shu" loo" wa shid re" Neria da" yuggi zoo: Barug wigi ngoonu" ri gyi koid sho' nang ri lhu: zhuang" kaid abye:» ga: tid ago".

⁴Houg: yoomo Yuda mung" moo nyid deing nyid wa ASEING da" amyeing" dang: joem ri Yohanan we' gyizoug: dayug we' byumyu" yi dayug we' tid dang: atam" gyoo: nau nghoid da:.

⁵Hau: thang: Yohanan gi gyizoug: yigi yugkhang" moo" ri shu" yu wigi nyid byo nyid da" mungdain: joem mo doem tau" lo da" yuggi- myiyi:- zooshang: yi yo' khokham nu" myiyi: zoo: yi dangain" yo' dage" Yuda mung" mo zi Egutu mung" khyoo: to' yhe: lo" ago".

⁶Nyangnu" gi Barug yo' ngoo bo bo wigi gyizoug: phoo Nebuzaradan wigi Gedalia da" yu" coung: da" vhoo: moo nyid: to" da" bang: yugkhang" moo" ri shu" yu ago".

⁷Nyangnu" gi ASEING da" amyeing" dang: ri atam" gyoo: wigi Egutu mung" khyoo: vang lho: Taphan voomoo" ju" sho' yhe: lo" ago".

⁸Houg: moo ASEING ngoo ri

⁹«Lug moo" zeing dayham" ri koid: yu wigi hau: joem ri voomoo" jo, da" mung" vhoeb yung" yhoem: shidkhoin" vang khyam: khoem" khyoomoo" yam- byu so" khyoo: moo hau: joem ri myhoeb we'. Nang hougsu" koid ziri Israela byu dayham" ri myang nhang: we'.

¹⁰Hau: thang: nyangnu" ri myhang: thang ASEING Israela da" Mangsoo ngoo gi nga" dei zoo: Babelon khokham Nebukhadneza ri he: joyoo khyoo: ngoo shu" loo wa. Nyang: gi nang he: lug moo" zeing joem myhoeb to" da" joyoo dang moo nya: khokham zhungtang lo too" loo wa. Houg: lho: hau: dang moo khokham zoem" lo pyo: nghoeb too" wa.

¹¹Nebukhadneza gi ju" re" wigi Egutu ri oung: pyam wa. Noo bui" wigi shid: wa su: gi noo bue" wigi shid: goo" wa. Thoung: byu khyo" shu" loo" shoug" wa bang: gi thoung: byu khyo" shu" lo" zi shau" boem wa. Gyipui" moo said pyam shoug" wa su: gi gyipui" moo said pyam shoug" wa.

¹²Ngoo gi Egutu da" yu phara" soolhoo: joem da" yhoem: ri myi: nghe' pyam wa. Babelon ri nghe' pyam wa anghoid lang" yu pyam wa. Yang zung" su: gi nya: byimi ri koid: yu wigi shen" joem ri ko: pyam yhang: ti" Babelon khokham gi Egutu mung" ri koid: yu wigi ko: pyam lho: oung: pyam wa.

¹³Nyang: gi Egutu mung" moo jo, da" Heliopoli mo gyeung" shang: da" lug ladoo" zeing joem ri phyo' shoin' pyam lho: Egutu yu phara" soolhoo: joem da" noku yhoem: ri nghe' pyam loo wa» ga: tid da:.