Read Lashi YEREMIA 44 Bible Online

YEREMIA 44 - Lashi bible

YEREMIA 44

¹ASEING gi Egutu mung" mo Migdola- Taphan- Memphi voomoo" joem yo' mungdain: da" mougpyi: shoid moo nyid boem da" Israela byu yi dangain" yo' sen: wigi ngoo ri dang: ji da:.

²Myhang: thang ASEING Israela da" Mangsoo tid zigi «Yerusalem yo' Yuda mung" mo gootu: voomoo" joem dangain" dang moo ngo wigi bui" nhang: da" phyo' shoin' pyam ziri nanu nyang: myang gu nghoid bye:. Akhid" ju" sho' lang" byo, yoin" jo, wigi hang" dayug we' hau: joyoo moo anyid loo: nghoid ago".

³Ciwim gari houg: mo byu yigi akhyeing" da" lo, moo" koid ziyo' ngoo ri nheig yoo: nhang: ago". Gootu: yu phara" joem ri nyangnu" xoin" ngei" byid: wigi nyangnu" we' nang we' re" phoug" phyid" yi we' ano' yu" da" yu phara" joem ri dei byid: ago".

⁴Ngoo ngheing" da" he: gyoug dain tung" da" moo" ri akoid wa shid re" nanu" ri tid kyo" da" nga" dei zoo: Lapi: yiri nanu" jhang ngoo xo' wigi nhang: kaid byid: bye:.

⁵Nghoid loug we' nanu" anau gyoo:- dajhi' we' atam" gyoo: nghoid ago". Gootu: yu phara" joem ri xoin" ngei" byid: da" akhyeing" lo, moo" ri nanu" anau to" pyam nghoid ago".

⁶Houg: yoomo nga" da" nheig yo:- nheig joem: yo: ziri Yuda mung" voogung joem moo yo' Yerusalem khyoo: joem moo foid shoin" khyo' kaid wigi hau: voogung joem ri ngoo myi: nghe' pyam wa. Hau: joem gi akhid" nyid" bue" jo, ziyo' dayhang: ti"- byo, yoin" jo, lho: nyangnu" da" myo, shid ti: moo yu" gyoug yu" dain sho' zi bue" loo bye:.

⁷«Houg: yoomo Ngoo myhang: thang ASEING Israela da" Mangsoo gi nanu" nya: gung ri houg: yhang: ti" akhyeing" zi ciwim koid nyid ago" ein: akhid" ngoo myid: da:. Nanu" da" mung" byu yi dayug we' adeing loo sho' yuggi yi myiyi: yi zooshang: yi zoonu" yi adang moo byo, yoin" zi bui" nhang: nau go" rhe".

⁸Nanu" re" ju" nyid boem da" he: Egutu mung" moo yu phara" soolhoo: joem ri no' byid: da" khyo" we' gootu: soolhoo: ri xoin" ngei" byid: da" khyo" wigi we' nanu" ngoo ri ciwim nheig yoo: nhang: go" la". Mougmyid dang moo nyid boem da" byumyu" khang" moo" nanu" ri yi juang" pyam wa yo' nanu" myeing ri nheing" khoin" khyo" ci: boem shang ein: nanu" gung ri phyo' shoin' pyam wa shid re" he: ziri nanu" koid nyid boem go" rhe".

⁹Nanu" da" phoug" phyid" yi wigi we' Yuda khokham yi yo' nyangnu" da" yhoem: seing: myhi' yi wigi we' nanu" yo' nanu" da" yhoem: seing: myhi' yi wigi we' Yuda mung" voomoo" joem moo yo' Yerusalem khyoo: joem moo koid da" akhyeing" moo" joem ri nanu" dangain" ri to" myhid pyam bye: go" rhe".

¹⁰Nghoid loug we' akhid" nyid" ju" sho' nanu" gung ri nheigloem: anyhoem: khyoo' nghoid ago". Nanu" ngoo ri ngi: ashab byid:. Nanu" yo' nanu" da" phoug" phyid" yiri ngo wigi byid: to" da" tarha" joem dangain" ri cang wigi kangso' adei goo" nghoid da:.

¹¹Houg: yoomo ngoo myhang: thang ASEING Israela Mangsoo gi nanu" ri gyi koid wigi Yuda mung" dangain" ziri phyo' shoin' pyam wa.

¹²Yuda mung" mo thu lo" da" Yuda byu yi yo' Egutu mung" khyoo: yhe: nyid wa myid phyed boem da" bang: koem' gi dangain" bang: phyo' shoin' pyam shau" boem goo" wa. Gyi: zoo: nge zoo: nyangnu" dangain" gi gyipui" anghoid lang" zooyoid ziyo' Egutu moo shid: byug goo" wa. Nyangnu" da" myo, shid ti: moo yu" gyoug yu" lhung: sho' da" zi bue" loo wa. Byu joem gi nyangnu" ri juang" yi pyam lho: nyangnu" myeing ri nheing" khoin" khyo" ci: loo goo" wa.

¹³Yerusalem ri ngoo yooboo dam byid: yhang: ti" Egutu mung" moo nyid bang: ri ngoo gyipui"- zooyoid- noo bue" ziyo' yooboo dam byid: wa.

¹⁴Yuda mung" moo nyid deing bang: yo' Egutu mung" khyoo: yhe: ju" nyid boem da" Yuda byu yi mo dayug we' aphang: loid- anyid deing wa. Nyangnu" doem nyid nau da" Yuda mung" khyoo: nyangnu" mo dayug we' ayo" tau" loo goo" wa. Phang: khau: nyid da" byu dajhi' mo jain" wigi hang" we' ashau" tau" loo goo" wa» ga: tid da:.

¹⁵Hau: thang: Yuggi dangain" gi nyangnu" da" yhoem: seing: myhi' yigi gootu: yu phara" joem ri xoin" ngei" byid: lo da" khyoo: ri se' loo goo" wa. Houg: lho: houg: moo yab jo, da" myiyi: yi Egutu mung" mougpyi: shoid moo nyid da" Israela byu yi byu phung: moo: bo wigi nyangnu" dangain" bang: gi ngoo ri

¹⁶«ASEING myeing mo nang wigi ngoonu" ri tid to" da" khyoo: ri tam" gyoo: wa ngoonu" he: pyam boem bye:.

¹⁷Ngoonu" koid wa ein: tid to" da" ja: khang" moo" ri ngoonu" koid wa. Ngoonu" yo' ngoonu" phoug" phyid" yi ngoonu" khokham yi yo' vhujhung: yi Yuda voomoo" joem moo yo' Yerusalem fu" moo" khyoo: moo ngoonu" lhung koid lo ziyo' dayhang: ti"- ngoonu" da" yu phara" myhi' joem mougkhung: moo khokham myhi' joem ri ngoonu" xoin" ngei" byid: wigi nyang: ri zabyid yhid: foid shoin" byid: wa. Houg: lang" ngoonu" gi zoo: noem agoin agoo" yo" wigi nyid de lho: yau: khi" ashau" wa.

¹⁸Nghoid loug we' mougkhung: mo khokham myhi' ri xoin" ngei" byid: ziyo' nyang: ri zabyid yhid: foid ngei" byid: ziri ngoonu" theing: pyam bye:. Hau: ayo, mo ngoonu" ciwe' ayoo" loo: wigi ngoonu" byu yigi gyipui" yo' zooyoid jang" moo shid: abye: go"» ga: tid.

¹⁹Hau: thang: myiyi: yigi «Mougkhung: mo khokham myhi' gung du: soolhoo: zooyho' koid wigi nyang: ri ngei" byid: lho: zabyid yhid: ngoonu" foid ngei" byid: uri ngoonu" koid nyid ziri ngoonu" da" yhoem: seing: phoo yi myid veing" byid: ago» ga: bo tid ago".

²⁰Houg: lang" ngoo ri hid: su" tu" da" yuggi myiyi: dangain" bang: ri ngoo tid zigi

²¹«Nanu" yo' nanu" phoug" phyid" yi nanu" da" khokham yi nanu" da" vhujhung: yi mungdain: byu yigi Yuda mung" mo voogung joem moo yo' Yerusalem fu" moo" khyoo: moo ngei" byid: boem da" xoin" joem khyoo: ri ASEING asi' nghoid da:. Anghoid lang" to" myhid pyam bye: da ein: nanu" jhoo: go" rhe".

²²Akhid" nyid" ju" sho' nanu" da" mougmyid gi byo, yoin" jo, lho: houg: moo hang" we' anyid nghoid ago". Hau: zigi yu" gyoug yu" lhung: khyoo: bue" lo wigi nanu" da" akhyeing" ziyo' akhyeing" da" lo, moo" joem ri ASEING gi ayo" zeing: shang" byid: loo yoomo byu yigi nanu" myeing ri nheing" khoin" khyo" ci: loo goo" wa.

²³He: akhid" bue" nyid da" yau: khe" kyi" khyeug gi gootu: yu phara" joem ri nanu" xoin" ngei" byid: lho: nya: amyeing" dang: joem dangain" ri atam" gyoo: khyo" ASEING ri thougtheung yooboo shoid boem bye: yoomo nanu" dang moo ju" re" zi nghoid da» ga: tid bye:.

²⁴Myhang: thang ASEING Israela Mangsoo gi Egutu mung" moo nyid nyid boem da" Yuda byumyu" yiri tid nyid da" dang: ri byu dangain" ri je wigi myiyi: yiri ngoo tid zigi «Nanu" yo' nanu" yhoem: seing: myhi' yigi mougkhung: khokham myhi' ri geing: teing dangsoo" byid: to" abye: go". Nyang: ri nanu" xoin" ngei" byid:- zabyid yhid: foid ngei" byid: wa ga: dangsoo" byid: abye:. Houg: lho: nanu" da" dangsoo" ri tam" gyo: cang yhe: ago". Gye" gi bye:. Nanu" da" dangsoo" ri tam" gyo: cang yhe: we'. Nanu" da" thang" cab ri zei: pyeing we'.

²⁶Nghoid loug we' Egutu mung" mo Israela byu yi dangain" ri ngoo ASEING wigi myhang: thang da" nga" myeing moo thang" cab to" ziri akhid" tam" gyoo: ge'. ‹Kangso' dei nyid gyi: sheung: thang ASEING khyo" ngoo jham' tang:› ga: tid wigi thang" cab koid wa shid re" nga" myeing ri hang" dayug ri we' khanham we' adoem ci: nhang: wa.

²⁷Nanu" nyid gi yab agi wa ziyo' phyo' shoin' pyam shoug" wa. Nanu" mo dangain" bang: gi dayug we' adeing loosho' gyipui" moo anghoid lang" noo bue" ziyo' shid: loo" goo" wa.

²⁸Nghoid loug we' nanu" mo dayham" gi shid: jang" mo phang: loid wigi Egutu mo zi Yuda mung" khyoo: tau" lo boem goo" wa. Houg: lang" nyid deing bang: gi nga" dang: anghoid lang" nyangnu" dang:- khayug dang: joeb byeung" re" ziri se' loo goo" wa.

²⁹He: joyoo moo nanu" ri ngoo yooboo dam byid: wa ziyo' nanu" dang moo bui" nhang: wa ein: ngoo dangsoo" byid: to" da" byo, yoin" zi joeb byeung" ri" wa nghoid ziri ASEING ngoo gi nanu" ri sagse: ci: shug byid: wa.

³⁰Yuda khokham Zedekia ri nya: gyivoo nghoid wigi nyang: ri said pyam nau da" Babelon khokham Nebukhadneza lo, moo ab byid: pyam ziyo' dakhyoo" ti"- Egutu khokham Hophra ri we' nyang: ri said pyam nau da" nya: gyivoo yi lo, moo ngoo ab byid: pyam wa» ein: tid bye:.