Read Lashi YEREMIA 46 Bible Online

YEREMIA 46 - Lashi bible

YEREMIA 46

¹ASEING gi byumyu" yi khyoo: ri Egutu mo shid" wigi ngoo ri dang: ji da:.

²He: zigi Yuda khokham Yehoiakim khokham koid zi myid: zain ein: zain moo Babelon khokham Nebukhadneza wigi Uphrad gyid lang nam mo Kharakheme joyoo moo gyi khaid oung: pyam da" Egutu khokham Nekho da" gyidab yo' sen lho: nyang: tid da" khyoo: nghoid da:.

³Hau: zigi «Egutu gyizoug: yi nyho: tid zigi ‹Nanu" da" goo joem ri jen" jen" koid lho: gyi khaid pui" khyoo: to' yhe: we'.

⁴Nanu" da" myang: joem mo myang: too: foin: lho: hau: joem moo do, zhung: ge'. Jen yab wigi nanu" da" joto' mug ri zhung" ge'. Nanu" da" lham: joem ri tho' sho' sei" ge'. Nanu" da" gyimi gyibyi: ri void ge› ga: nyho: tid.

⁵ASEING gi «Nghoid loug we' ngoo ci: myang la"» ga: myid:. «Nyangnu" gi gyoug dain wigi tau" lo" ago". Nyangnu" da" gyizoo: yigi khaid baid tau" kaid zi shoug" lho: Gyug yoomo nyangnu" yo" tang" yhi' tang" phang: wigi Nungthang alheing: yu" nghoid ago".

⁶Myab, bang: ri vi: khyoo: alheig kaid go". gyizoo: yigi ayo" phang: loid wa. Mougzhung: shoid Uphrad gyid yam moo nyangnu" khyid: vhu" thung" wigi leung boem ago".

⁷Nila gyid gyung: yhang: ti" do, re" wigi dung" bung ri nhoeb pyam da" gyid gyung: yhang: te" su: gi hang" nghoid boem la".

⁸Nila gyung: yhang: ti" do, re" zi Nya: dung" bung ri nhoeb pyam da" gyid gyung: yhang: te" zigi Egutu nghoid da:. Egutu tid zigi ‹Ngoo do, re" lho: moug myid ri nghoeb pyam wa. Ngoo gi voomoo" joem ri yo' houg: moo nyid bang: ri said toem" pyam wa.

⁹Myang: joem ri to' so" loo" wa yo' myang: rheing" joem ri to' yhi: wa amyeing" byid:. Etiopi yo' Libya mo goo joem ci: da" yuggi yi yo' Ludi mo lid: beig jhang: bang:- Gyizoo: yiri nhang: thu kaid ge'.

¹⁰He: bidnyid gi gyi: sheung: myhang: thang ASEING da" bidnyid nghoid. Akhid" nyid" nyang: latoo: phug loo wa. Akhid" nyid" nya: gyivoo yiri yooboo dam byid: loo wa. Nya: Shamcoin" gi nyangnu" ri gyi: sho' zo: loo wa. Nyangnu" suid" ri nheugdeug sho' shug wa. Myhang: thang da" ASEING ri xoin" khyo" ngei" byid: wa shid re" mougzhung: shoid Uphrad gyid yam moo: nyangnu" ri said pyam shau" loo goo" wa.

¹¹Egutu byu yi we"- Gilead khyoo: yhe: lho: macid" yhe: shoo: ge'. Nanu" da" macid" dangain" gi ci: agi nghoid da:. Nanu" ri ce: wigi we' ayo" byang" gi wa.

¹²Byumyu" mungdain: joem gi re" asho' ashid: ri shau" gyo: abye: go". Nanu" ngau ziri yugkhang" moo" shoug" gyo: abye: go". Gyizoo: dayug yo' dayug nyang: cang" nyang: thei' leung lho: eig yug goin" myidgung khyoo: leung loo" bye:.

¹³Egutu mung" ri gyi koid wa shid re" Babelon khokham Nebukhadneza ju" re" uri ASEING gi ngoo ri dang: tid da:. Nyang: gi

¹⁴«He: ziri Egutu mung" mo voogung joem nghoid da" Migdola- Memphi- Taphan ri tid kyoo" we'. Hau: zigi ‹Nanu" nya: gung ri goem loem wa jen" jen" koid nyid we'. Nanu" moo: jo, da" dangain" gi gyipui" moo said pyam zi shoug" loo goo" wa.

¹⁵Ciwim yoomo nanu" da" myhang: thang yu phara" Apiz gyo" leung lo" byug la". ASEING gi hau: ziri baid khyoeb khyo' pyam bye:›.

¹⁶Nanu" da" gyizoo: yigi khyid: vhu" thung" wigi leung lo" abye:. Yugkhang" moo" nyang: cang" nyang: tid go" zigi ‹Hain: ge'. Ngoonu" byumyu" yi jhang yhoem: khyoo: loo" goo" shang. Houg: lho: gyivoo yi shamcoin" mo phang: loid boem shang.

¹⁷«Egutu khokham ri myeing seig nghoid da" ‹Nya: akho: akhang" ri ci: phyug da" phoug: su:› ein: myeing ge'.

¹⁸Ngoo myhang: thang ASEING gi khokham nghoid. Ngoo gi kangso' dei da" Mangso nghoid. Tabora boem gi boem joem tho' myhang: da:. Khamela boem gi Panglai: atho' moo myhang: jo, da:. Hougsu" nanu" ri gyi koid su: gi yoem: boo su: nghoid.

¹⁹Egutu byu yi we"- thung: byu khyo" shu" loo" shoug" wa ziri jen" jen" koid too" ge'. Memphi ri hang" anyid byo, yoin" jo, da" dain" pyoid yoo koid pyam zi shau" loo wa.

²⁰Egutu gi gye" young" da" nu: myhi' yo' du wigi mougzhung: shoid mo paid da" mho' wigi gyi khaid zain: zi shau" da:.

²¹Nyang: wigi lhung: to" da" gyizoo: yi lang" gi yoem: abo da" nu: nu" joem yhang: ti" bue" jo, da:. Nyangnu" to' yab wigi gyi: azain: nghoid ago". Nyangnu" dangain" bang: tau" wigi tang" phang: loo" goo" wa. Nyangnu" joem: loo" wa bidnyid yo' nyangnu" byo, yoin" wa ayo, ju" lo abye:.

²²Egutu gi gyivoo yi gyidab tab re" nyid uri lhangmyu yhang: ti" shui shui ga: myeing lho: tang" phang: lo" da:. Nyangnu" gi nyang: ri byu yi seiggam joem ri thug lheing: pyam wigi

²³seig moo" yoo ri phyo' pyam yhang: ti" nyang: ri voozung: wigi khaid zain loo wa. Nyangnu" da" gyizoo: yigi atho' nghab loo sho' myo: ago". Nyangnu" gi jhenkhyeug joem tho' je myo: da:.

²⁴Egutu byu yigi sho' phu" zi shau" da:. Nyangnu" gi mougzhung: shoid mo byu yi wigi oung: pyam zi shau" ago". Ngoo ASEING tid too" bye:».

²⁵Israela da" Mangsoo myhang: thang ASEING tid zigi «Ngoo gi Thebe yu phara" Amon ri Egutu yo' nya: yu phara" joem khokham yi yo' dage" yooboo doem byid: wa. Ngoo gi Egutu khokham ri yo' nyang: ri loem khau: nyid da" bang: dangain" ri shu" yu lho:

²⁶Nyangnu" ri said pyam nau nyid bang: yo' Babelon khokham Nebukhadneza yo' nya: da" gyidab lo, khyoo: ngoo ab byid: wa. Nghoid loug we' thang: rigi nyangnu" lid lo da" ayo, moo yo' dakhyoo" ti" byu yigi Egutu moo doem nyid loo goo" wa. Ngoo ASEING tid too" bye:.

²⁷«Nga" byumyu" yi we"- agyug goo"- Israela byu yi we" adain goo". Ngoo gi nanu" ri ve: da" mung" moo nanu" thung: byu yi bue" nyid da" mung" mo ngoo khyoid yu wa. Nanu" yhoem: khyoo: doem tau" phang: lo wigi yug yoo tung" shoug" nyid wa. Nanu" gi goem loem shau" wigi hang" dayug wigi we' nanu" ri ayo" kyug goo" wa.

²⁸Ngoo gi nanu" jhang re" wigi nanu" ri khyoid yu wa. Nanu" ri ngo wigi nyhid: sain" to" da" joyoo mo byu yi dangain" ri said toem" pyam wa. Nghoid loug we' nanu" rigi ngoo asaid toem" pyam wa. Nanu" ri yooboo dam abyid: lho: anhang: kaid wa. Nghoid loug we' nanu" ri ngoo yooboo dam byid: uri deingmain" khyo" koid wa. Ngoo ASEING tid too" bye:» ga: tid.