Read Lashi YEREMIA 48 Bible Online

YEREMIA 48 - Lashi bible

YEREMIA 48

¹He: zigi Moba yo' sen: wigi myhang: thang ASEING tid zi nghoid da:. Hau: zigi «Nebo byu yigi asho" ajhen: nghoid ago". Nyangnu" voogung joem ri phyo' shoin' pyam shau" abye:. Kiriathaim gi seing: yu pyam zi shau" ago". Nya: da" yoem: bo gyidab voogung ri phyo' khyo' pyam abye: go". Nya: da" voobyu yigi sho' phu" zi shau" ago".

²Gyi: sheung: da" Moba gi bei: byug abye:. Gyivoo yigi Heshbon ri seing: yu pyam bye:. Houg: lho: Moba byumyu" mungdain: ri phyo' shoin' pyam wa gau" soin' boem bye:. Madmen voogung gi tam" byug wa. Gyidab joem gi hau: ziri thougtheung zain: loo wa.

³Horonaim byu yigi «Pyijoem: sho: o"- byo, yoin" khyoo: o"» ga: yoid nyho: boem.

⁴‹Moba gi phyo' shoin' pyam zi shau" abye:. Zooshang: yi kyi: ngau nyid ziri tam" gyoo: ge'.

⁵Nyangnu" ngoug thui: ti" Luhit khyoo: do, lo" da" khyoo: cang wigi shau" gyo: da:. Nheigloem: thang wigi kyi: ngau da" thui: ri Horonaim khyoo: gyoo" lo da" khyoo: cang shau" gyo: da:.

⁶‹Myab ge'. Nanu" da" kangso' loid wa shid re" tang" ge'. Dain" pyoid yoo mo loo zei: lam" tang" ziyo' dayhang: ti" tang" ge'› ga: nyangnu" tid go".

⁷«Moba we"- nang gi re" yoem: ri yo' re" jonu" ri loem khau: da:. Nghoid loug we' akhid" lang" nang ri oung: pyam zi shau" abye:. Re" da" yu phara" Khemosha gi nya: da" khokham nu" yi yo' khainjung yi yo' dage" pyoung" shu" lo" zi shoug" wa.

⁸Voogung daloem: we' byo, yoin" zi mo aloid wa. Lang: khung" yo' jang: pa: eig ja: goin" byo, yoin" loo" wa. Ngoo ASEING tid too" bye:.

⁹Moba shid re" loeb lugzeing tu: zhug ge'. Hau: zigi amyang" ri byo, yoin" zi shoug" wa. Houg: mo voogung joem gi byo, yoin" jo, wa. Houg: moo hang" we' adoem nyid loo goo" wa» ga: zi nghoid. (

¹⁰Nya: ung: khoug: nheigloem: dangain" yo' ASEING moo" ri akoid su: gi nheing" khoin" zang" baja" o". Azain: asaid da" su: gi nheing" khoin" zang" baja" o".)

¹¹ASEING tid zigi «Moba gi khanham we' goug: nyu: tung" za: shoug" nyid wigi khanham we' pyoung" shu" lo" zi ashau" yu" nghoid da:. Moba gi aze" lhei' lho: to" to" da" zabyid yhid: yo' du wigi khanham we' jhuang: daloem: mo daloem: khyoo: foid zei zi ashoug" nghoid da:. Nya: da" zabyid shoem: gi khanham we' abyo, nghoid da:. Nya: da" main gi khanham we' ge nyid da:.

¹²«Houg: yoomo akhid"- Moba ri zabyid yhid: yhang: ti" foid pyam wa byu ngoo nhang: kaid wa ayo, gi ju" lo nyid bye:. Nyangnu" gi hau: da" zabyid jhuang: ri akoem: koid pyam lho: hau: joem ri ajab amhoin' baid khyoeb pyam loo wa.

¹³Houg: lang" Israela byu yi nyangnu" loem khau: da" yu phara" Bathela wigi aphid" bui" nhang: pyam yhang: ti" Moba byu yi nyangnu" yu phara" Khemosha wigi phid" nhang: pyam zi shau" loo wa.

¹⁴«Moba byu yi we"- Ciwim yoomo sarhi' yi gyipui" moo jham" yu" bye: voem" da" gyizoo: yi nghoid ein: tid go" la".

¹⁵Moba yo' hau: voomoo" joem gi phyo' shoin' pyam shau" abye:. Hougmo ge thang da" zoolu: yigi said pyam zi shau" abye: go". Ngoo gi myhang: thang ASEING khokham nghoid. Houg: lho: ngoo tid too" bye:.

¹⁶Moba da" joem: lo" khyoo: gi jhang lo nyid bye:. Hau: da" byo, yoin" zigi jhang lo nyid da:.

¹⁷«Hau: anam moo nyid boem wigi hau: da" myeing gyi: khyoo: ri shau" gyo: da" nanu" dangain" Hau: byumyu" mungdain: shid re" koug ngoug ge'. Nya: da" yoem: so' vhoeb zigi byo, yoin" byug bye:. Nya: da" phung" yoeb yo' gyi: myhang: zigi ajo, loo nghoid da› ein: tid ge'.

¹⁸Dibon moo nyid bang: nanu" we"- ngi: shab da" nanu" joyoo mo gyoo" loo ge'. Houg: lho: pheilhoug: boem" myidgung moo zhung: ge'. Moba da" phyo' shoin' su: gi hid: moo nghoid wigi Nya: da" gyidab voomoo" gi byo, yoin" jo, abye:.

¹⁹Aroera moo nyid bang: nanu" we"- Khyoo: yam moo yab jo, wigi lang" nyid ge'. Tang" phang: lo" nyid bang: ri myid: ge'. Ci bue" bye: ziri nyangnu" mo myid: co' yu" we'.

²⁰‹Moba gi gyoeb gyo" loo" bye:. Nya: shid re" ngoug ge'. Hau: zigi ngi: yoem" zi nghoid da:. Moba gi phyo' shoin' pyam zi shau" abye: ein: Anon gyung: cang wigi tid fu" ge'› ga: nyangnu" tu" boem goo" wa.

²¹«Bougdoem: mo voomoo" joem ri dang: phyed wa da" akhyeing: ju" bye:. Hau: joem gi Holon- Yaza- Mephad

²²Dibon- Nebo- Bed Diblathim-

²³Kiriathaim- Bathgamula- Bethmeon

²⁴Keriod- Bozra voomoo" joem nghoid da:. Moba voomoo" vi: mo jang" mo dangain" moo dang: phyed zi ju" bye:.

²⁵Moba da" gyi: myhang: zigi mhoin' koid pyam abye:. Nya: da" yoem: so' gi phyo' shoin' pyam shoug" bye:. Ngoo ASEING tid too" bye:» ga: tid da:.

²⁶ASEING tid zigi «Moba ri yhid: yed nhang: ge'. Ciwim gari nyang: gi ngoo ri gyi koid thougtheung abye:. Moba gi nyang: dug boem to" da" jang" moo lu: leung yeing" wa. Houg: lho: byumyu" yigi yi juang" lo boem wa.

²⁷Moba we"- Israela byu yiri nang khasu" yi juang" pyam ziri myid boin: rhe". Nang gi nyangnu" ri khyangtoug: yi yo' dage" shau" myheig yu ziyo' dakhyoo" ti" nyangnu" ri koid da:.

²⁸«Moba moo nyid boem da" byu yi nanu" we"- nanu" voogung joem mo thu loo" ge'. Lug pyo' yoo moo yhe: nyid ge'. Nya: da" suid" ri dung" koem' nhoid moo soid koid da" pheing" kyoug" yhang: ti" bui" ge'.

²⁹Moba gi gye" nghoid boin: da:. Nyang: gye" nghoid boin- gye" phau:- gye" nheigloem: myang: khyoo:- nyangnu" nya: gung ri gye" myid myhang: khyoo: ri ngoo shoug" gyoo: bye:.

³⁰Ngoo ASEING gi nyangnu nghoid boin: ziri se'. Nyangnu" phau: zigi ciwe' anghoid da:. Nyangnu" koid da" moo" gi adeing jo, wa.

³¹Houg: yoomo ngoo gi Moba mo byu yugkhang" moo" ri yo' Kira Heresa mo byu yiri shoem" pyam wa.

³²Ngoo gi Sibma byu yi shid re" Yazera byu yi shid mo tho' lang" ngoug wa. Sibma voomoo" we"- nang gi anyug joem thoem" shid: ri lid: phyed yhe: lho: Yezera ju" sho' nei yhe: da" zabyid nei yo' du da:. Nghoid loug we' akhid" gi re" da" xung" ayo, mo shi" joem yo' zabyid shi" yi phyo' shoin' pyam zi shau" abye:.

³³Ngei pyo: ziyo' gau yi zigi myidxu: ge' da" Moba mung" mo yu lo" byug abye: go". Zabyid nang: jang: mo zabyid yeing yau ziri ngoo toem' pyam bye:. Zabyid yhid: koid wigi gau lho: nyhoo: wa byu dayug we' anyid loo.

³⁴«Heshbon byu yo Eleale byu gi nyho: yoid wigi nyangnu" nyho: ngau da" thui: gi Yehaza ju" sho' moo shau" gyo: da:. Hau: ziri Zora mo byu yi wigi shau" gyo: ago". Hau: ziri Horonaim yo' Eglad Shelishiya fi' mo shau" gyo: da:. Nimrim gyid zoo: lang kyug byug bye:.

³⁵Moba byu yiri nyangnu" noku da" joyoo mo xoin" nghe' ngei" byid: zi mo yo' nyangnu" yu phara" joem ri xoin" ngei" byid: jang" mo ngoo toem' pyam wa. Ngoo ASEING tid too" bye:.

³⁶«Houg: yoomo nga" nheigloem: gi Moba yo' Kira Heresa byu yi shid re" byu shid: yhoem: moo dayug yug wigi khoolhang moid ziyo' dayhang: ti" koug ngau da:. Ciwim gari nyangnu" seing: gu: ja: khang" moo" gi bei: byug bye:.

³⁷Nyangnu" dangain" bang: gi nyangnu" vhuloem ri ko' pyam lho nyangnu" nhoid mei: joem ri yug pyam ago". Nyangnu" dangain" bang: nyangnu" lo, joem moo dam khoo: yham" ceig ci: wigi yugkhang" moo" gi jid: moo" byimi void ago".

³⁸Moba bang: da" yhoemkhung: tho' joem dangain" moo yo' hau: da" Shava jang: joem moo ciwe' ajo, koug za koug ngau nyid ago". Ciwim gari hang" wigi we' avho: da" yam: ri yhang: ti" Moba ri ngoo baid kho' pyam bye:.

³⁹Moba gi gyoeb byug bye:. Nyho: boem ge'. Moba gi ngi: yoem" zi shau" abye:. Hau: zigi byo, yoin" jo, lho: hau: lheing khoem moo nyid da" byumyu" yigi yi juang" pyam ago". Ngoo ASEING tid too" bye:.

⁴⁰ASEING dangsoo" byid: zigi dung pei: pyo: ci: da" zoin bung: yhang: ti" byu damyu" gi Moba adang moo dang: gyoo" lo wigi

⁴¹Voogung joem yo' gyidab vang joem ri seing: yu pyam wa. Hau: bidnyid moo Moba gyizoo: yigi zookhu: da" myiyi: gyoug dain yhang: ti" gyoug dain wa.

⁴²Moba gi phyo' shoin' pyam shau" wigi byu damyu" abui" loo wa. Ciwim gari nyangnu" ngoo ri goemlu to' thougtheung yoomo nghoid.

⁴³Gyug nain" ja:- gyoin: duang:- lhid' joem gi Moba byu yiri lang" nyid. ASEING tid too" bye:.

⁴⁴Gyug nain" ja: mo phang: loid wa soin' su: gi gyoin: duang: moo byed gyoo" loo" wa. Gyoin: duang: mo yo" do, loid su: hang" nghoid loug we' lhid' moo myi" wa. Ciwim gari Moba da" byo, yoin" zigi ASEING nyang: ayo, mhe' too" byid: bye:.

⁴⁵Pang" thug byu ayo" da" phang: khau: nyid da" byu yigi goonham' khokham Sihon vhoeb lo da" voomoo" Heshbon moo goem loem khyoo: sho: ago". Nghoid loug we' houg mo myiyham: nghoid da" myi: gi mougkyoo" cang nge" wigi boem myhang: joem mo meing: zain: ziri oung: lung bu da" Moba byu yiri nge" pyam da:.

⁴⁶Moba byu yigi asho" ajhen: nghoid o". Khemosha ri no' da" byu yigi phyo' shoin' pyam shoug" lho: nyangnu" da" yuggi zoo: myiyi: zoo: yigi thung: byu khyo" myheig shu" loo" shau" ago".

⁴⁷Nghoid loug we' doem ju" loo wa da" ayo, moo ASEING gi Moba ri doem nyid de: nhang: wa. ASEING tid to" gu: dangain" gi Moba dang moo bue" loo wa.