Read Lashi YEREMIA 50 Bible Online

YEREMIA 50 - Lashi bible

YEREMIA 50

¹He: zigi Babelon voomoo" yo' nya: voobyu yi khyoo: yo' sen lho: ASEING wigi ngoo ri byid: da" mungdang: nghoid da:.

²Hau: zigi «Byumyu" yiri lu dang: tid kyoo" we'. Hau: ziri tid fu" we'. Avoid alhoo: ri byid: wigi lu dang: joem ri tid fu" we'. Hau: ziri azau" too" goo". Babelon gi gyoeb gyo" byug abye:. Nya: da" yu phara" Madug gi gyoeb mhoin' byug bye:. Babelon yu phara" soolhoo: joem gi sho' phu" nyid. Nya: aco' ajhoid da" soolhoo: joem gi baid khyoeb mhoin' pyam zi shau" abye:.

³«Mougzhung: shoid mo byu damyu" gi Babelon ri gyi koid wa ju" re" wigi hau ziri dain" pyoid yoo koid pyam loo wa. Byu yo' gougnyhoug joem gi tang" phang: lo" byug wigi houg moo hang" we' anyid goo" wa» ga: zi nghoid.

⁴ASEING tid zigi «Hau: ayo, ju" loo lang" Israela yo' Yuda byu yigi ngougbyid ngougnhab yo' nyangnu" Mangsoo ngoo ri sho: loo goo" wa.

⁵Ziun khyoo: yhe: da" khyoo: ri nyangnu" myid: loo goo" wa. Houg: lang" hau: shoid khyoo: yhe: loo" goo" wa. Nyangnu" gi apyaid atoo: dang: theing ri ngoo yo' koid loo goo" wa. Hau: ziri khanham we' nyangnu" aphyo' shoin' pyam wa.

⁶«Nga" byu yigi yang zung" bang: wigi boem joem cang ci: phyug pyam shau" da" yang joem yo' du da:. Yang joem gi boem da loem: mo daloem: khyoo: so" lam" yen" yhang: ti" nyangnu" so" lam" yen" da:. Nyangnu" yhoem: khamoo: nghoid ziri to" myhed pyam ago".

⁷Nyangnu" gi nyangnu" ri shau" myang da" bang: dangain" wigi khaid zain: zi shoug" ago". Nyangnu" da" gyivoo yi tid zigi «ASEING ri nyangnu" yooboo shoid abye: go". Houg: lho: ngoonu" koid zigi ashoid. Nyangnu" phoug" phyid" yigi ASEING ri khau: nghe: ago". Nyangnu" gi nya: akhoug: moo jhug zug za: nyid nyid eung: ago"› ga: tid.

⁸«Israela byu yi we"- Babelon mungdain: mo tang" phang: ge'. Mungdain: mo phang: thug ge'. Xang: shi" to' loo" bang: bui" ge'.

⁹Ngoo gi mougzhung: shoid mo yoem: bo da" byumyu" daphung: ri lhu: zhuang" kaid lho: Babelon ri khaid zain: nhang: wa. Nyangnu" mungdain: ri gyi koid wa shid re" gyipui" moo jen yab jo, lho: hau: ziri oung: pyam wa. Nyangnu" gi shookhaid kung bang: thang" thi: ri khanham we' ashoid loo: sho' myoo: yo" beug da" shookhaid bang: nghoid da:.

¹⁰Babelon gi lhoid zoo: phyo' zoo: shoug" wa. Lhoid zoo: phyo' zoo: bang: gi nyangnu" vho: gu: dangain" ri yu lo" byug wa. Ngoo ASEING tid too" bye:» ga: zi nghoid da:.

¹¹ASEING tid zigi «Babelon byu yi we" nga" byumyu" ri nanu" phyo' zo: pyam abye: go". Nanu" gi pyo: wigi gau ago". Gug nang: da" nuzeing so" lam" yen" yhang: ti"- myeing yen" da" myang: yhang: ti" nghoid ago".

¹²Nghoid loug we' nanu" gyi sheing: da" voomoo" gi nyhoem: khyo' pyam zi shau" wigi ngi: yoem" zi shoug" wa. Babelon gi byumyu" dangain" tho' mo nge thang byumyu" nghoid loo wa. Hau: zigi Kyug hei' lho: gyid ajo, da" dain" pyoid yoo bue" loo wa.

¹³Nga" nheig yo: gang mo Babelon moo hang" we' anyid wa. Hau: zi byo, yoin" jo, boem wa wigi so" lid: loo" bang: dangain" gi dain' mo, lho: mau" hang" byug goo" wa.

¹⁴«Lid: ci: bang: we"- Babelon ri gyi koid wa shid re" jen yab ge'. Hau: ziri lheing khoem too" ge'. Nanu" da" myoo: joem dangain" ziri Babelon: ri beig ge'. Ciwim gari nyang: gi ngoo ASEING ri yooboo shoid yoomo nghoid da:.

¹⁵Voomoo" aqei: ayam mo bang: gyipui" nyhoo: thui: yo' too' ge'. Akhid" Babelon gi lo, tu: pyam abye:. Nya: da" vang joem thung" thoid pyam wigi byo, gyo" jo, da:. Babelon byu yiri ngoo latoo phug wa. Houg: lho: nyangnu" ri nanu" latoo: phug yu ge'. Subi" ri nyangnu" koid yhang: ti" nyangnu" ri koid ge'.

¹⁶Hau: mungdain: moo shivoo: shi" joem ayug nhang: goo". Shivoo: ri we' ashoem" yu nhang: goo". Houg moo nyid nyid da" tungbau byu yugkhang" moo" gi gyi khaid da" gyizoo: yi wigi kyug tain' zi shoug" lho: yhoem: khyoo: phang: lo" boem wa» ga: zi nghoid da:.

¹⁷ASEING tid zigi «Israela byu yigi khangkhyi joem wigi khaid sain" kaid shau" da" yang joem yhang: ti" nghoid da:. Xang: shi" moo nyangnu" ri Asuri khosen wigi khaid zain: zi shau" ago". Houg: lho: Babelon khokham Nebukhadneza gi nyangnu" shooyoug: ri khe" loo bye:.

¹⁸Hau: gang mo Israela da" Mangsoo myhang: thang ASEING- ngoo gi Asuri khosen ri yooboo dam byid: yhang: ti" Khokham Nebukhadneza yo' nya: mungdain: ri yooboo dam byid: wa.

¹⁹Israela byu yiri nyangnu" mougmyid moo doem nyid nhang: wa. Nyangnu" gi Kamela boem mo yo' Bashan moug: moo sho" da" zoo: noem ri zo: boem wa. Nyangnu" gi Ephrim yo' Gilead mougmyid moo sho" to" da" shivoo: shiloem joem ri nyangnu" vho: nhoo' shoug" zo: loo goo" wa.

²⁰Hau: ayo, ju" lang" Israela moo ce: yooboo amyang wa. Yuda mung" moo akhyeing" zi ci: ajo, wa. Ciwim gari ngo wigi kangso' dei nhang: too" bang: ri ngoo yooboo khyoid byid: wa. Ngoo ASEING tid too" bye:» ga: tid da:.

²¹ASEING tid zigi «Merathaim yo' Pekod byu yiri khaid zain: ge'. Nyangnu" ri said toem" pyam' ge'. Ngo wigi nanu" ri amyeing" byid: to" zi ja: khang" moo" ri koid ge'. Ngoo ASEING tid too" bye:.

²²Mungdain: moo gyi khaid thui: shau" gyo:. Hau: zigi gyi: sho' byo, yoin" zi bue" da:.

²³Babelon mung" gi mougmyid goin" ri ajab amhoin" baid mhoin' pyam da:. Akhid" hau: baid du ri baid khyau" pyam shau" ago". Hau: mungdain: moo bui" bye: da" moo" moo byumyu" dangain" dain mau" loo goo" wa.

²⁴Babelon we"- nang ngoo ri gyi khaid abye:. Hau: ziri nang asi' nghoid loug we' ngo wigi re" shid re" kham to" da" lhid' moo nang myi" abye:.

²⁵Nga" da" gyi zi gyikhoo: shoung: to" da" joyoo ri ngoo phang byid: bye:. Nga" nheig yo: jang" moo nyangnu" ri ngoo she: thu yu bye:. Ciwim gari ngoo yoem: moo" bo myhang: thang ASEING gi Babelon mung" moo zei: wa moo" yo" da:.

²⁶Shoid khang" moo" khyo" khaid zain: ge'. Nya: da" gugzoo jhi: jo, da" joyoo joem ri thung" thoid yhi: ge'. Shivoo: boem yhang: ti" lanyhoeb joem ri boem too" ge'. Mungdain: ri phyo' shoin' pyam ge'. Dajhi' we' ateing too" goo".

²⁷Nyangnu" da" gyizoo: dangain" ri said pyam ge'. Nyangnu" ri jab pyam ge'. Babelon byu yigi joem: abye:. Nyangnu" ri yooboo dam byid: wa ayo, ju" lo abye:.

²⁸(Phang: khau: nyid bang: gi Babelon mo phang: lo lho: Yerusalem khyoo: ju" lo ago". Ngoonu" ASEING Mangsoo gi Babelon byu yi wigi nya: Noku Yhoem: Moo" ri phyo' shoin' pyam bye: gang mo khasu" latoo: phug byid: da" khyoo: ri nyangnu" tid ago".)

²⁹«Babelon ri khaid zain: wa shid re" lid: beig bang: ri tid ge'. Lid: yo' myoo: ri khasu" ci: wa se' da" bang: yugkhang" moo" ri nhang: kaid ge'. Voomoo" ri vang: to" lho: dayug ri we' aphang: loid nhang: goo". Nyang: koid zi shid re" aphoug" tau" byid: ge'. Subi" ri nyang: koid yhang: ti" nyang: ri we' koid ge'. Ciwim gari nyang: gi Israela da" gyeung" shang: su: ngoo ri gyi khaid wigi nghoid boin: da" lo, moo" koid da:.

³⁰Houg: yoomo nya: da" zoolu: yigi voomoo" mo fu" moo" khyoo: deing joem moo said pyam shau" loo wa. Hau: bidnyid moo nya: da" gyizoo: yi dangain" gi said pyam zi shau" boem wa. Ngoo ASEING tid too" bye:.

³¹Babelon we"- nang gi nghoid boin: myid byeung" jo, da:. Houg: yoomo Yoem: moo" bo myhang: thang ASEING ngoo gi nang ri thougtheung bye:. Nang ri yooboo dam byid: da" ayo, ju" lo abye:.

³²Re" da" nghoid boin: byumyu" gi khyid: vhu" thoung" wigi leung lo" abye:. Nang ri tu: to' yu wa hang" anyid. Re" voomoo" joem ri ngoo myi: wigi nghe' pyam wa. Lheing khoem mo ja: khang" moo" gi phyo' shoin' pyam shoug" goo" wa»

³³Myhang: thang ASEING tid zigi «Israela byu yi yo' Yuda byu yigi zeig zoo: shoug" ago". Nyangnu" ri myheig yu bang: dangain" gi nyangnu" ri tab za: zoung" lho: anhang: kaid nghoid ago".

³⁴Nghoid loug we' nyangnu" ri khyoid yu wa su: gi yoem: bo da:. Nya: myeing gi myhang: thang ASEING nghoid da:. Nyang: nyang: gi nyangnu" moo" ri yoovoin yu lho: mougmyid khyoo: ngei pyo: yug yo khyoo: ci: ri" byid: wa. Nghoid loug we' Babelon byu yiri gi yau: khi" shoug" lo boem goo" wa» ga: tid da:.

³⁵ASEING tid zigi «Babelon gi doem: byug wa. Nya: byu yi nya: da" zoug: yi nya: da" phajhi" boo bang: shid: wa.

³⁶Leung jo, da" nyangnu" lapi: yi shid: goo" wa. Nyangnu" khayhi' ko" boem la". Nyangnu" da" gyizoo: yigi shid: goo" wa. Nyangnu" khayhi' gyoug dain pho" zi nghoid la".

³⁷Nya: da" myang: joem yo' myang: rheing" joem ri phyo' shoin' pyam ge'. Nyang: ngho" to" da" gyizoo: yi we' shid: shoug" goo" wa. Nyangnu" khayhi' yoem: neing: boem la". Nya: da" jonu" joem ri lhoid zo: phyo' zo: yu ge'.

³⁸Nya: da" mungdain: moo kyug kyug bui" nhang: wigi Nya: da" gyid gyung: joem kain" lo" byug ago". Babelon gi byu ri koo" nhang: pyam da" yu phara" soolhoo: joem wigi Kyug tain' da" mungdain: nghoid da:.

³⁹«Houg: yoomo Babelon gi mhain: yu joem akhyeing" da" soobyoo joem akyeing" asain' da" ngho' joem wigi kyug zi shau" loo wa. Ju" loo wa ayo, dangain" moo houg: moo byu adoem nyid wa.

⁴⁰Sodom- Gomora yo' aqei ayam mo voogung joem ri ngoo phyo' shoin' pyam uri bue" ziyo' dayhang: ti" Babelon moo hougsu" nyang: bue" loo wa. Houg moo hang" adoem nyid boem wa. Ngoo ASEING tid too" bye:.

⁴¹Mougzhung: shoid moo jo, da" mung" mo byu yi re" nyid wigi Ve: da" mung" mo yoem: bo da" byumyu" ju" re" nyid da:. Khokham myoo" sho' bang: gi gyipui" shid re" soin' nyid ago".

⁴²Nyangnu" gi lid: yo' shamcoin" joem ri yu ci: abye:. Nyangnu" gi akhyeing" zi yo' nheig khyeug myid aboo nghoid da:. Nyangnu" myang: joem gung tho' moo ju: uri panglai: gyid myeing thui: yhang: ti" myeing ago". Babelon ri gyi koid da" gyipui" shid re" nyangnu" jen" jen" koid to" ago".

⁴³Lu dang: joem ri Babelon khokham shau" gyo: wigi Nya: lo, byau" lhang" to" da:. Nyang: gi myid myo: oung: lug ziyo' we' Zookhu: noo no da" myiyi: dayug yhang: ti" no ziyo' we' oung: pyam shau" da:.

⁴⁴«Yodan gyung: cang wigi seig moo" pug mo zi nyau young" da" coung" nu" yoo khyoo: do: thu lo da" khang: khyi: dadu: yhang: ti" ngoo ASEING thu lo wigi Babelon byu yiri nyangnu" voomoo" mo nyeigdain tung" tang" phang: loo" nhang: wa. Houg: lho: ngo wigi khyen: to" da" vhujhung: gi byumyu" yiri vhoeb loo wa. Ngoo ri hang" yo" tu' wa la". Cite" da" vhoebkhang" su: gi ngoo ri yo" thougtheung wa la".

⁴⁵Houg: yoomo Babelon voomoo" ri ngoo thougtheung bye: ziyo' hau: byumyu" yiri ngoo koid wa soin' to" khyoo: ri tam" gyoo: we'. Nyangnu" da" zooshang: yiri lang" she: khyoid pyam zi shau" boem goo" wa. Yugkhang" moo" gi gyoug dain zi shau" boem goo" wa.

⁴⁶Babelon gyo" soem" lo" byug lang" thui: zeing thu' lo wigi mougmyid gyab goin" lhei' noin' loo wa. Tid poin" da" thui: gi gootu: byumyu" yi shau" gyo: loo" goo" wa» ga: tid da:.